Kamis, 02 Januari 2014

PANGUNGKABON 7

Pangungkabon 7


7:1 Dob ai huidah ma ompat malekat jongjong bani na ompat suhi-suhi ni tanoh on, manjolom na ompat logou ni tanoh on, ase ulang mangombus logou hu tanoh, laut ampa haganup hayu. (Dan. 7:4; Sak. 6:5; Mat. 24:31.) 

7:2 Anjaha huidah ma homa sada malekat na legan, naik hun hapoltakan ni mata ni ari, manjolom sap ni ELOHIM na manggoluh in. Maling do ia mardilo-dilo bani malekat na ompat ai, na dob manjalo kuasa laho mansedahon tanoh pakon laut in, 

7:3 nini ma: Ulang parseda nasiam lobei tanoh pakon laut, age hayu pe, paima isap hanami sagala juak-juak ni ELOHIM nta bani pardompakanni. (bd. 6:6; 9:4; 10:16; Hes. 9:4, 6.) 

7:4 Anjaha hubogei do buei ni sagala na dob marsap ai: Saratus ompat puluh ompat ribu humbani haganup marga ni Israel. (bd. 14:1, 3.) 

7:5 Humbani marga Juda sapuluh dua ribu na dob marsap, humbani marga Ruben sapuluh dua ribu, humbani marga Gad sapuluh dua ribu, 

7:6 humbani marga Aser sapuluh dua ribu, humbani marga Naptali sapuluh dua ribu, humbani marga Manasse sapuluh dua ribu, 

7:7 humbani marga Simeon sapuluh dua ribu, humbani marga Lepi sapuluh dua ribu, humbani marga Isasar sapuluh dua ribu, 

7:8 humbani marga Sebulon sapuluh dua ribu, humbani marga Josep sapuluh dua ribu, humbani marga Benjamin sapuluh dua ribu, na dob marsap. 

7:9 Dob salpu ai, huidah ma humpulan na banggal, na so boi bilangan ni atap ise, humbani ganup bangsa, suku, marga, ampa hata jongjong ilobei ni paratas ai pakon ilobei ni Anak ni biri-biri ai, marhiouhon hiou putih anjaha manjolom bulung ni palem. (bd. 6:11.) 

7:10 Maling do sora ni sidea mardilohon: Bani ELOHIM nta, na hundul bani paratas in do haluahon, ampa bani Anak ni biri-biri in! (bd. 5:10; 11:10; 19:1.) 

7:11 Anjaha jongjong ma sagala malekat inggot paratas ai ampa inggot sintua ampa pargoluh na ompat ai, anjaha manrogop ma sidea ilobei ni paratas ai marsombah bani ELOHIM , (bd. 5:11; 11:16.) 

7:12 nini ma: Amen! Puji-pujian pakon hasangapon, hapentaron pakon tarima kasih, hamuliaon pakon hagogohon ampa kuasa ma bani ELOHIM nta in ronsi sadokah ni dokahni! Amen. (bd. 5:12.) 

7:13 Jadi marsahap ma sada humbani sintua ai, nini ma dompak ahu: Ise do siparhiou putih in, anjaha hunja do in roh? 

7:14 Jadi huhatahon ma dompaksi: Ham tuanku, ham do mambotohsi. Jadi nini ma dompak ahu: In ma, na dob roh humbani hamarsikon banggal ai; domma iburihi sidea hiou ni sidea anjaha ipaputih ibagas daroh ni Anak ni biri-biri in.(bd. 3:10; 2 Mus. 19:10, 14; Heb. 9:14.) 

7:15 Halani ai sai ilobei ni paratas ni ELOHIM do sidea marugas Bani arian pakon borngin ibagas rumahni, anjaha Ia, na hundul bani paratas ai ma, paherbangkon lampo-lamponi iatas ni sidea.(bd. 11:19; 14:15, 17; 21:3, 22.) 

7:16 Seng be loheian sidea, lang be horahan, lang be hona milas ni ari sidea atap aha na milas pe;(Ps. 121:6; Jes. 49:10.) 

7:17 ai parmahanon ai Anak ni biri-biri na itongah-tongah ni paratas ai do sidea, anjaha arahkononni do sidea hubani bah tubuh hagoluhan, anjaha apusan ni ELOHIM ma sagala iluh humbani mata ni sidea.(bd. 5:6; 21:4; Ps. 23:2; Jes. 25:8.)

0 komentar:

Posting Komentar