Senin, 23 Desember 2013

ROM 8

Rom 8


8:1 Ase, seng mangonai be nuan uhum bani halak na ibagas Kristus Jesus, (na so marparlahou marguru hubani daging, tapi marguru bani Tonduy do). (ay. 31-39.) 

8:2 Ai titah ni tonduy hagoluhan na ibagas Kristus Jesus do na mamardekahon ahu humbani titah ni dousa ampa hamateian. (bd. 3:27; 7:23, 24.) 

8:3 Ai dob seng margogoh be titah in, pinagalek ni daging, isuruh ELOHIM ma Anakni sandiri marrupa daging pardousaon, marhalanihon ni dousa. Gabe sonai ma ihonahon uhum bani dousa in, ibagas daging ai, (Lah. 13:38; 15:10; Heb. 2:17.) 

8:4 ase jumpah ma hapintoran na pinangindo ni titah in banta, hita na marparlahou mangihutkon Tonduy, seng mangihutkon daging. (Gal. 5:16, 25.) 

8:5 Ai pardagingon do iparuhurhon na mangihutkon daging, tapi partonduyon do iparuhurhon na mangihutkon Tonduy in. 

8:6 Ai hamateian do hauhuron ni daging, tapi hauhuron ni Tonduy ai ma hagoluhan ampa hadameion. (bd. 6:21.) 

8:7 Ia hauhuron ni daging ai ma hamunsuhon dompak ELOHIM ; seng ra tunduk in bani titah ni ELOHIM , ai seng tarbahensi. (Jak. 4:4.) 

8:8 Halak na ibagas daging seng tarbahensi pamalas uhur ni ELOHIM . 

8:9 Ia nasiam, seng ibagas daging, tapi ibagas Tonduy do, anggo tongon Tonduy ni ELOHIM marianan ibagas nasiam. Tapi anggo seng Tonduy ni Kristus bani jolma, seng Kristus simadasi. (1 Kor. 3:16.) 

8:10 Tapi anggo Kristus ibagas nasiam, matei do tongon badan halani dousa, tapi manggoluh do tonduy halani hapitoran. 

8:11 Tapi anggo marianan ibagas nasiam Tonduy ni na mamuhoi Jesus humbani na matei, pagoluhon ni Sipuhoi Jesus humbani na matei in do age badannasiam na ra matei in, marhitei Tonduyni na marianan ibagas nasiam. 

8:12 Ai pe ale hasoman, parutang do hita, tapi sedo bani daging, ase marparlahou marguru hubani daging. (bd. 7:18.) 

8:13 Ai anggo marguru hu daging nasiam marparlahou, maningon matei do nasiam; tapi anggo ipamatei nasiam horja ni daging marhitei Tonduy in, manggoluh ma nasiam. (Gal. 6:8; Ep. 4:22-24.) 

8:14 Ai sagala na binobahon ni Tonduy ni ELOHIM , ai ma anak ni ELOHIM . 

8:15 Ai seng ijalo nasiam tonduy jabolon ase mangulaki biar, tapi tonduy anak do ijalo nasiam; marhitei in do hita mardilo: Abba, Ham Bapa! (Gal. 4:5, 6; 2 Tim. 1:7.) 

8:16 Tonduy in do manaksihon rap pakon tonduyta, paboa anak ni ELOHIM do hita. (2 Kor. 1:22.) 

8:17 Ai anggo anak hita, dihut ma panean, panean bani ELOHIM , hasoman panean ni Kristus. Anggo hasomanni hita manaron, gabe hasomanni ma homa hita ibagas hasangapon. (Gal. 4:7; Pangk. 21:7.) 

8:18 Ai huhira, sitaronon bani panorang sisonari seng satimbang in marimbang hasangapon, na sihol sipatalaron ope banta. 

8:19 Ai masihol do sagala na tinompa in paima-imahon panorangni, ase ipatalar anak ni ELOHIM . (Kol. 3:4.) 

8:20 Ai bani na lang do ipatunduk na tinompa in, seng humbani rosuhni, tapi halani na patundukkonsi do, ase dong pangarapan, (1 Mus. 3:17-19; 5:29.) 

8:21 ai simardekahononkon do age na tinompa in, humbani parjabolonan ni hamagouan hu hamardekaon hasangapon ni anak ni ELOHIM . (2 Ptr. 3:13.) 

8:22 Ai ibotoh hita do, rap marhoih anjaha mangarou do sagala na tinompa in ronsi sonari. 

8:23 Ambah ni ai, age hita, na dob manjalo limbuah ni Tonduy in, marhoih do ibagas uhurta, paima-imahon haanakon, ase maluah pamatangta. (2 Kor. 5:2.) 

8:24 Ai ase marpangarapan do, ase ipaluah hita. Ai anggo naidah na niarapkon in, seng pangarapan be ai; ai anggo domma naidah, mase arapkonon be ai. (2 Kor. 5:7.) 

8:25 Tapi, anggo mangarap do hita bani na so niidah ope, sabar ma hita paima-imahonsi. 

8:26 Tapi age Tonduy in, iurupi do hita bani hagalekonta. Ai seng ibotoh hita, barang aha do na patut sipindoonta, gabe iapiti Tonduy in do hita marhitei hoih na so tarhatahon. 

8:27 Tapi ibotoh Sitanda uhur in do paruhuron ni Tonduy in, ai marguru bani rosuh ni ELOHIM do pangapitini bani halak na mapansing in. 

8:28 Ai ibotoh hita do, haganup do manumpak hubani na ma-dear bani sagala na marholong ni uhur bani ELOHIM , na nidiloni humbani sura-surani hinan. (Ep. 1:11; 3:11.) 

8:29 Ai na tinandani hinan, ai do itodoh, ase usih sidea hubani rupa ni Anakni in, ase Ia ma na parlobei tubuh humbani sanina na buei in. (Kol. 1:18; Heb. 1:6.) 

8:30 Ai na tinandani hinan, ai do idilo, anjaha na nidiloni, ai do ipintori, anjaha na pinintoranni, ai do ipasangap. 

8:31 Ai pe, aha ma hatahononta pasal ai? Anggo ELOHIM hasomanta, ise ma imbangta? (Ps. 118:6.) 

8:32 Seng ilioi Anakni sandiri, tapi iondoskon do mangkophop hita haganup; mintor lang ma layak-layakkononni rap pakonsi haganupan ai banta? (Joh. 3:16.) 

8:33 Ise ma na mangaduhon na pinilih ni ELOHIM ? ELOHIM do na mamintori. 

8:34 Ise ma na mandabuh uhum? Domma matei Kristus Jesus, lobih ni ai ope tene, domma mulak manggoluh, i siamun ni ELOHIM do Ia mangapiti hita. (1 Joh. 2:1.) 

8:35 Ise manirang hita humbani holong ni uhur ni Kristus? Hamarsikon do atap hasosakan, parburuon do atap lohei, hatalanjangon do atap mara atap podang do? 

8:36 Songon na tarsurat in: Halani Ham do hanami ibunuhi layur ari, songon biri-biri si sayaton do hanami ihira. (Ps. 44:23; 2 Kor. 4:11.) 

8:37 Tapi ibagas haganupan ai monang do hita halani na mangkaholongi hita ai. 

8:38 Tenger do uhurhu, seng tarbahen sirang hita humbani holong ni uhur ni ELOHIM , na ibagas Kristus Jesus Tuhanta in, barang bahenon ni hamateian, barang hagoluhan, barang malekat, barang siparkuasa, barang na masa sonari, barang na sihol masa, barang hagogohon pe, 

8:39 barang bahenon ni na iatas age na itoruh, ronsi sagala na tinompa na legan pe.

0 komentar:

Posting Komentar