Senin, 23 Desember 2013

ROM 3

Rom 3


3:1 Ase aha ma hasurungan ni Jahudi, anjaha aha ma gunani parsunaton ai? 

3:2 Buei do, ibagas haganup. Parlobei, ondosan ni hata ni ELOHIM do sidea. (bd. 9:4; 5 Mus. 4:7, 8; Ps. 147:19, 20.) 

3:3 Ai sonaha? Anggo seng porsaya deba, mintor halani na so porsaya ai ma sidea gabe seda habujuron ni ELOHIM ? (bd. 9:6; 11:29; 2 Tim. 2:13.) 

3:4 Seng sonai. On do tene, parsintong do ELOHIM , tapi parladung do haganup jolma, songon na tarsurat in: Ase pintor Ham bani hatamu, anjaha monang Ham ibagas panguhumonmu. (Ps. 51:6; 116:11.) 

3:5 Tapi anggo hagedukonta mambahen jongjong hapintoran ni ELOHIM , aha ma sihatahononta? Ai na so adil ma ELOHIM , anggo ipadalan ringisni? Sahap hajolmaon do sahapkai. 

3:6 Seng sonai. Ambit sonai, ija ma taruhum ELOHIM dunia on? 

3:7 Tapi anggo ladungku pabanggal habonaron ni ELOHIM gabe hasangaponni, mase uhumonni ope ahu songon pardousa? 

3:8 Ai lang dearan ma horjahon hita na masambor ase roh na madear? Patut do hona uhum halak sisonai ai. (bd. 6:1, 2.) 

3:9 Ase sonaha ma? Marhasurungan do hita? Otik pe lang. Domma hupatorang: Halak Jahudi pe atap halak Gorik, rap ginom-goman ni dousa do, (bd. 1:18--2:24.) 

3:10 songon na tarsurat in: Seng dong na pintor, sahalak pe lang. (Ps. 14:1-3; 53:2-4.) 

3:11 Seng dong na maruhur, seng dong na pindah-pindah bani ELOHIM . 

3:12 Haganup do manlembang, rap na so margagan do sidea; seng dong sihorjahon na madear, sahalak pe lang. 

3:13 Tanoman na ngangang do tolonan ni sidea, dilah ni sidea mansahapkon ladung; bisa ni ulog darih do itoruh ni bibir ni sidea. (Ps. 5:10; 140:4.) 

3:14 Gok do babah ni sidea bani bura-bura ampa hata podou. (Ps. 10:7.) 

3:15 Hinsah do nahei ni sidea manduruskon daroh. (Jes. 59:7, 8.) 3:16 Hamagouan ampa hamarsikon do ibagas dalan ni sidea, 

3:17 ia dalan hadameion in, seng ibotoh. 3:18 Seng dong biar dompak ELOHIM ibagas pangidah ni sidea. (Ps. 36:2.) 

3:19 Tapi ibotoh hita do, bani na ginom-goman ni titah in do haganup hata ni titah in, ase sip sagala pamangan, anjaha marsalah ganup sindunia on ilobei ni ELOHIM . (bd. 2:12; Gal. 3:22.) 

3:20 Ai marhitei na mangkorjahon titah seng adong jolma na dapotan hapintoran ilobei ni ELOHIM . Ai marhitei titah panandaon bani dousa do roh. (bd. 7:7; Ps. 143:2; Gal. 2:16.) 

3:21 Tapi sonari domma torang hapintoran ni ELOHIM , sedo humbani titah, songon sinaksihon ni titah in ampa nabi-nabi, (Lah. 10:43.) 

3:22 ai ma hapintoran ni ELOHIM , na das marhitei haporsayaon bani Jesus Kristus hubani haganup na porsaya. 

3:23 Ai seng dong ubahni, sabonar haganup do sidea mardousa, anjaha seng dong sipujion ilobei ni ELOHIM . (ay. 9, 19; 5:2.)

3:24 Gabe ipintori do sidea marhitei silayak-layak halani idop ni uhurni, hinorhon ni panobusion na ibagas Kristus Jesus. (bd. 5:1; Ep. 2:8.) 

3:25 Ia do ipajongjong ELOHIM gabe hitei pardearan marhitei haporsayaon bani darohni ai, laho patalar hapintoranni, halani domma isalpuhon dousa sapari ibagas sabar ni uhurni, (3 Mus. 16:12-15; Heb. 4:16.) 

3:26 laho patalar hapintoranni bani panorang sonari, ase pintor Ia, anjaha ipintori na porsaya bani Jesus. 

3:27 Ase adong ope siunsagahhononkon? Seng dong be ai. Marhitei titah ja do? Marhitei titah horja do? Lang, tapi marhitei titah haporsayaon in do. (1 Kor. 1:29, 31.) 

3:28 Ase on do ijolom uhurta: Marhitei haporsayaon do ipintori jolma, sedo marhitei na mangkorjahon titah. (Gal. 2:16.)

3:29 Ai pitah Jahudi do simada ELOHIM ? Ai lang dihut do bangsa sipajuh begu-begu? Nai ma tongon, dihut do bangsa sipajuh begu-begu! (bd. 10:12.) 

3:30 Ai sada do ELOHIM na mamintori na tarsunat marhitei haporsayaon ni sidea ampa na so marsunat halani haporsayaon ni sidea. (bd. 4:11, 12.) 

3:31 Ase na manrumbakkon titah do hita halani haporsayaon in? Seng sonai, tapi na pajongjongkon titah in do hita. (bd 4:3; 8:4; Mat. 5:17.)

0 komentar:

Posting Komentar