Senin, 23 Desember 2013

ROM 2

Rom 2


2:1 Halani ai seng tarapiti ho dirimu, ale jolma sipanguhum, atap ise pe ho. Ai marhitei na manguhum halak na legan, iuhum ho do dirimu sandiri, ai na sonai do homa idalankon ho, ale sipanguhum! (Mat. 7:2; Joh. 8:7.) 

2:2 Ai ibotoh hita, domu hubani hasintongan do mangonai uhum ni ELOHIM hubani na mangkorjahon na sonai ai. 

2:3 Ai iagan ho, ale jolma, tarsimbili ho uhum ni ELOHIM , anggo iuhum-uhumi ho na mangkorjahon na sonai, hape dihut do ho mambahensi? 

2:4 Atap na mapas do uhurmu bani dear ni layakni na buei in, bani panganjuonni age lumbang ni uhurni? Seng ibotoh ho, dear layak ni ELOHIM sihol manogu ho bani hamubahon ni uhur? (2 Ptr. 3:15.) 

2:5 Tapi halani hengkeng ni uhurmu ampa uhurmu na so ra mubah in, ipajunjun ho do bam ringis bani ari parsogop ni ringis ai ampa partalar ni uhum ni ELOHIM na pintor ai, 

2:6 na mambalaskon bani ganup domu hubani horjani bei: (Mat. 16:27; Joh. 5:29; 2 Kor. 5:10.) 2:7 Ai ma hagoluhan na sadokah ni dokahni bani halak na golgol mangkorjahon na madear, anjaha na mangindahi hasangapon, hamuliaon ampa na manongtong ai, 

2:8 tapi ringis ampa gila do bani halak sipanlawan anjaha na so ra mambalosi hasintongan in, ai ma sipambalosi bani hagedukon. (2 Tes. 1:8.) 2

:9 Hamarsikon ampa biar do sogop bani uhur ni sagala jolma, na mangkorjahon hajahaton, bani halak Jahudi parlobei, sonai homa bani halak Gorik. (bd. 1:16; 3:9.) 

2:10 Tapi hasangapon, hamuliaon ampa damei do bani sagala na mangkorjahon na madear, halak Jahudi parlobei, sonai homa halak Gorik. 2:11 Ai seng siidah rupa ELOHIM . (Lah. 10:34; 1 Ptr. 1:17.) 

2:12 Ai sagala sipardousa, na so martitah, magou do homa lang martitah; anjaha sagala na mardousa, sipartitah, uhumon ni titah do. (Mat. 7:21; 1 Joh. 3:7.) 

2:13 Ai seng na mambogei titah in pintor ilobei ni ELOHIM , tapi na mangkorjahon titah in do pintoranni. (Mat. 7:21; 1 Joh. 3:7.) 

2:14 Ai sipajuh begu-begu pe, na so martitah in, ihorjahon do humbani biakni na pinindo ni titah in; ase sidea sandiri ma gabe titah bani sidea na so martitah in. (Lah. 10:35.) 

2:15 Hujai ma taridah, paboa na dob tarsurat do na pinindo ni titah in ibagas uhur ni sidea. Anjaha panggora ni uhur ni sidea pe dihut do manaksihon, anjaha pingkiran ni sideea marsiaduan atap marsiapitan, (bd. 1:32.) 

2:16 ai ma bani ari, rohkonsi ELOHIM , manguhumi sagala na ponop bani jolma in marhitei Kristus Jesus, domu hubani na huambilanhon in. 

2:17 Igoran ho do dirimu Jahudi, marhatengeran do ho bani titah in, anjaha ELOHIM ipangunsagahkon ho. 

2:18 Ibotoh ho do rosuhni, anjaha ibotoh ho do manimbangi na malo ampa na so malo, niajaran ni titah in. 

2:19 Talup do ho, nini uhurmu pambobai na mapitung, panondang bani halak na ibagas hagolapan, (Mat. 15:14.) 

2:20 pamodahi bani na hurang uhur, sipangajari bani na etek, ai dong do bam habotohon ampa hasintongan pasal titah in. 

2:21 Hape halak na legan ipodahi ho, tapi dirimu sandiri lang ipodahi ho. Ho do mangkatahon, seng bulih manangko. (Ps. 50:16-21; Mat. 23:3, 4.) 

2:22 Ihatahon ho, ulang marbangkis, hape ho do marbangkis. Magigi do ho bani gana-gana, hape panrampok do ho i rumah panumbahan. 

2:23 Ipangunsagahkon ho do titah in, tapi ipahiri ho do ELOHIM marhitei panlanggaronmu bani titah in. 

2:24 Songon na tarsurat in: Mahiri do goran ni ELOHIM itongah-tongah ni sipajuh begu-begu halani nasiam. (Jes. 52:5; Hes. 36:20.) 

2:25 Marguna do parsunaton in, anggo idalankon ho titah in. Tapi anggo panlanggar do ho bani tiah in, gabe seng marguna be parsunaton in bam. (Jer. 4:4; 9:24, 25.) 

2:26 Ase anggo idalankon na so tarsunat in pinindo ni titah in, ai lang hiraon ma ia, na so tarsunat ai, songon na tarsunat? (Gal. 5:6.) 

2:27 Ai lang na so marsunat ai ma, anggo idalankon titah in, na manguhumi ho, simada hata ampa parsunaton in, anggo ilanggar ho titah in? 

2:28 Ai sedo pardarat ai Jahudi na sintong, anjaha sedo bani daging ai parsunaton na tongon. (Joh. 8:39.) 

2:29 Tapi Jahudi na sintong, ai ma Jahudi parbagas ai, anjaha parsunaton na botul, ai ma na ibagas uhur ai, marhitei Tonduy sedo marhitei surat ni titah. Sisonai ma dapotan puji-pujian, sedo humbani jolma, tapi humbani ELOHIM do. (5 Mus. 30:6; Kol. 2:11.)

0 komentar:

Posting Komentar