Senin, 23 Desember 2013

ROM 15

Rom 15


15:1 Tapi hita na margogoh in, patut do manganju hagalekon ni na hurang gogoh, anjaha ulang ma rosuhta sandiri pindahi hita. (bd. 14:1.) 

15:2 Ganup ma hita mambahen rosuh ni uhur ni hasoman, gabe hadearonni, laho pauli-ulihonsi. (1 Kor. 9:19; 10:23, 24.) 

15:3 Ai Kristus pe seng rosuhni sandiri ipindahi, songon na tarsurat in: Risa-risa ni na manrisai Ham mangonai do hu-Bangku! (Ps. 69:10.) 

15:4 Ai sagala na tarsurat hinan, bahen podah banta do ai, ase tarsurat ai, ase marpangarapan hita halani hasabaron ampa apoh-apoh na ibagas Surat in. (bd. 4:23, 24; 1 Kor. 10:11.) 

15:5 Tapi ELOHIM , simada hasabaron ampa apoh-apoh ma mambere bani nasiam hasadaon ni uhur samah nasiam mangihutkon rosuh ni Kristus Jesus, (Pil. 3:16.) 

15:6 ase sauhur anjaha sasora ma nasiam mamuji ELOHIM , Bapa ni Tuhanta Jesus Kristus. 

15:7 Halani ai marsijaloan ma nasiam, songon panjalo ni Kristus banta, bahen hasangapon ni ELOHIM . 

15:8 Ai huhatahon ma bani nasiam, na dob gabe pambalosi do Kristus bani na tarsunat halani hasintongan ni ELOHIM , laho patotapkon bagah-bagah, na hubani ompung na lobei, (Mat. 15:24; Lah. 3:25.) 

15:9 anjaha sipajuh begu-begu pe pasangaphon ELOHIM do halani idop ni uhurni, songon na tarsurat in: Halani ai pujionku do Ham itongah-tongah ni sipajuh begu-begu, anjaha dodingkononku do Goranmu. (bd. 11:30; Ps. 18:50.) 

15:10 Anjaha ihatahon use: Marmalas ni uhur ma nasiam sipajuh begu-begu rap pakon bangsani! (5 Mus. 32:43.) 

15:11 Dob ai use: Puji ma Tuhan in, nasiam haganup sipajuh begu-begu, anjaha haganup ma bangsa mamujisi. (Ps. 117:1.) 

15:12 Anjaha si Jesayas pe, nini do: Adong ma urat ni si Jesse, anjaha jongjong ma na manggomgom sipajuh begu-begu. Bani do mangarap sipajuh begu-begu. (Jes. 11:10; Pangk. 5:5.) 

15:13 Tapi ELOHIM , simada pangarapan in ma manlayak-layakhon bani nasiam hagogok ni malas ni uhur ampa damei marhitei haporsayaon, ase lambin tambah nasiam marpangarapan marhitei gogoh ni Tonduy Na pansing. 

15:14 Ahu pe torang do hubotoh, nasiam saninangku, paboa na dob gok do nasiam bani na madear, marisi bani haganup habotohon, anjaha boi marsipodah-podah samah nasiam. 

15:15 Tapi sonai pe, mapagtu do ahu manurat bani deba surathu bani nasiam, songon na pasingatkon nasiam, halani idop ni uhur na binere ni ELOHIM bangku, (bd. 1:5; 12:2.) 

15:16 ai gabe siparugas bani Kristus Jesus ampa gabe malim ni ambilan na madear na humbani ELOHIM bani bangsa sipajuh begu-begu, ase gabe galangan na hinarosuhkon ni ELOHIM sidea haganup, na pinapansing ibagas Tonduy Na pansing. (bd. 11:13; Pil. 2:17.) 

15:17 Ibagas Kristus Jesus, adong do na mambahen megah uhurhu pasal horjangku ilobei ni ELOHIM . 

15:18 Ai seng barani ahu, mangkatahon atap aha pe, sobali na binahen ni Kristus marhitei ahu, ai ma laho manogunogu sipajuh begu-begu, hu pambalosion ibagas hata ampa pambahenan, (bd. 1:5; 2 Kor. 3:5.) 

15:19 marhasoman hagogohon ni tanda ampa halongangan, ibagas hagogohon ni Tonduy Na pansing, gabe das huambilankon ambil na madear na humbani Kristus, mamungkah hun Jerusalem ampa nagori inggotni ai das ronsi Iliria. (Mrk. 16:17.) 

15:20 Hasangaponku do huhira na mangambilankon ambilan na madear in bani ianan, na so tarbogei ope ijai Goran ni Kristus, ase ulang ahu songon na pauli rumah bani onjolan ni halak na legan, (2 Kor. 10:15, 16.) 

15:21 tapi songon na tarsurat in ma: Marpangidah ma na so dapotan barita pasalsi, anjaha mangarusi ma na so ongga mambogeisi. (Jes. 52:15.) 

15:22 On do halani mambahen gari tarabat ahu marayak nasiam. (bd. 1:13.) 

15:23 Tapi anggo nuan, seng adong be sihorjahononku i nagori ai; anjaha domma piga-piga tahun hinan ihasiholli uhurhu marayak nasiam, bani pardalananku na laho hu Spania. (bd. 1:10, 11.) 

15:24 Ai arap do uhurhu, idahonku nasiam sanggah na montas ahu, anjaha taruhkonnasiam ahu hujai, dob lobei sombuh uhurhu otik mangidah nasiam. (1 Kor. 16:6.) 

15:25 Tapi hu Jerusalem ope langkahku sonari, laho marugas bani halak na pansing ai, (Lah. 18:2; 19:21; 20:22.) 

15:26 ai iputushon kuria na i Mekedonia ampa na i Akaya do, mambahen tumpak pangurupion bani hasoman na mapansing na hurangan i Jerusalem. (1 Kor. 16:1; 2 Kor. 8:1-4; 9:2, 12.) 

15:27 Domma sonai iputuskon sidea, ai parutang do sidea tongon bani sidea ai. Ai anggo gabe parrupei sipajuh begu-begu bani arta partonduyon na adong bani sidea, patut do sipajuh begu-begu mangurupi sidea pasal na porlu bani pardagingon. (bd. 9:4; 1 Kor. 9:11.) 

15:28 Anggo domma husaloseihon ai anjaha hupadas buah ai bani sidea, sihol do ahu bingkat hu Spania, anjaha singgah bani nasiam. 

15:29 Tapi hubotoh do, anggo roh ahu bani nasiam, ibagas hagogok ni pasu-pasu ni Kristus do ahu roh. (bd. 1:11.) 

15:30 Tapi ojur-ojurhu bani nasiam, ale hasoman, marhitei Tuhanta Jesus Kristus ampa marhitei holong ni uhur ni Tonduy in: Hasomani nasiam ma ahu maruntol marhitei na manonggohon ahu bani ELOHIM , (2 Kor. 1:11; Pil. 1:27; 2 Tes. 3:1.) 

15:31 andohar ipaluah ahu humbani halak na so porsaya i Judea, anjaha iharosuhkon halak na mapansing ai horjangku na hu Jerusalem ai, 

15:32 andohar marmalas ni uhur ahu das bani nasiam, domu hubani rosuh ni ELOHIM , boi marsaran bani nasiam. 15:33 ELOHIM Pardamei in ma mangkasomani nasiam ganup. Amen. (bd. 16:20.)

0 komentar:

Posting Komentar