Senin, 23 Desember 2013

ROM 14

Rom 14


14:1 Anju nasiam ma na galek marhaporsayaon, ulang ma marsalisih pasal pingkiran. (bd. 15:1; 1 Kor. 8:9.) 

14:2 Porsaya do na sada boi panganonni haganup, tapi na galek ai sayur-sayuran do hansa ipangan. (1 Mus. 1:29; 9:3.) 

14:3 Na mangankon ulang ma mapas uhurni bani na so mangankon; anjaha na mangorom pe ulang ma iuhum-uhumi na mangankon, ai na dob ijalo ELOHIM do age ia. (Kol. 2:16.) 

14:4 Ai ise do ham, mambahen na iuhumi ham jabolan ni halak na legan? Marguru bani tuanni do ia, atap na jongjong ia barang na tompas. Tapi totap do ia, ai tarpatotap Tuhan in do ia. (Mat. 7:1; Jak. 4:11, 12.) 

14:5 Bani uhur ni na deba, marsisurungan do ari, bani uhur ni na legan, dos do ari in. Ganup ma marsijoloman bani hatengeran ni uhurni bei. (Gal. 4:10.) 

14:6 Na papansing ari in, bani Tuhan in ma ipapansing in: na mangankon, halani Tuhan in ma ipangan, ai bani ELOHIM do ia martarima kasih; anjaha na mangorom, halani Tuhan ma ia mangorom, anjaha bani ELOHIM ma ia martarima kasih. 

14:7 Ai ganup hita seng manggoluh bani dirinta, anjaha ganup hita seng matei bani dirinta. 

14:8 Ai manggoluh pe hita, manggoluh bani Tuhan in do, anjaha matei pe hita, matei bani Tuhan in do. Ase manggoluh barang matei pe hita, tong do bani Tuhan in hita.(Gal. 2:20; 1 Tes. 5:10.) 

14:9 Ai ase matei pe Kristus anjaha mulak manggoluh, ase Ia do Tuhan ni na matei age na manggoluh. 

14:10 Ia ham, mase ma uhum-uhumonmu hasomanmu, anjaha mase ma mapas uhurmu bani hasomanmu? Ai lang haganup do hita maningon jongjong ilobei ni paratas ni ELOHIM ? 

14:11 Ai tarsurat do: Na manggoluh do Ahu, nini Tuhan. Bangku do manrogop sagala towod, anjaha sagala dilah mangakui ELOHIM . (Jes. 45:23; Pil. 2:10, 11.) 

14:12 Ase ganup do hita marbalos pasal dirinta bei ilobei ni ELOHIM . (Gal. 6:5.) 

14:13 Ase ulang be hita marsiuhum-uhuman! Tapi dearan ma naputushon, ulang be nabahen partolsuan atap parsangsian bani sanina. 

14:14 Torang do hubotoh marhitei Tuhan Jesus, na so adong na butak hinan, tapi gabe butak do ai bani na mangahapkon ai butak. (Mat. 15:11; Lah. 10:15; Tit. 1:15.) 

14:15 Ai anggo ipusoki ham uhur ni hasomanmu marhitei na pinanganmu, seng be mardalan ibagas holong ham. Ulang ma magou hasomanmu halani sipanganon, ai na dob matei do Kristus manghophopsi. (1 Kor. 8:11-13.) 

14:16 Ulang ma na madear ai bani nasiam, gabe sirisaon ni halak. (Tit. 2:5.) 

14:17 Ai sedo sipanganon barang siinumon harajaon ni ELOHIM , tapi hapintoran ampa damei ampa malas ni uhur do ibagas Tonduy Na pansing. (Luk. 17:20.) 

14:18 Ai anggo pambalosi ham bani Kristus pasal ai, harosuh ni ELOHIM ma ham anjaha harga bani jolma. 

14:19 Halani ai parayak hita ma na padameihon ampa na patorsa-torsahon hita samah hita! (bd. 12:18; 15:2.) 

14:20 Ulang ma parseda horja ni ELOHIM halani sipanganon. Haganup do namin pansing, tapi gabe hasedaon do ai bani sada halak, anggo sangsi ia ibagas na mangankon ai. (ay. 14.) 

14:21 Dearan ma, ulang mangan gulei, ulang minum anggur, atap mangkorjahon aha pe, anggo mambahen parsangsian do ai bani hasomanmu. (1 Kor. 8:13.) 

14:22 Ia adong pe haporsayaonmu, bamu ma ai ilobei ni ELOHIM . Martuah ma halak, na so mansalahkon dirini be, pasal na dob hinadearhon ni uhurni. 

14:23 Ise na sangsi, tapi ipangan do, domma hona uhum, halani seng humbani haporsayaon ai. Ai sagala na so tubuh humbani haporsayaon, dousa do. (Tit. 1:15.)

0 komentar:

Posting Komentar