Senin, 23 Desember 2013

ROM 13

Rom 13


13:1 Unduk ma ganup halak bani pamarentah na markuasa. Ai seng dong pamarentah anggo seng na humbani ELOHIM , na dong ai pe ELOHIM do manotapkon ai. (Pod. 8:15; Joh. 19:11; Tit. 3:1.) 

13:2 Ase, na manlawan aturan ni ELOHIM do na manlawan pamarentah. Anjaha na manlawan ai, jaloonni do uhum bani. 

13:3 Ia pamarentah seng sihabiaran ai bani sihorjahon na madear, tapi bani sihorjahon na jahat do. Marosuh ham seng mabiar bani pamarentah? Na dear ma horjahon, ase dapotan puji-pujian ham humbani sidea. (1 Ptr. 2:13, 14.) 

13:4 Juak-juak ni ELOHIM do sidea, laho mambahen na madear bamu. tapi, anggo na jahat ihorjahon ham, patut do mabiar ham, ai seng gurou-gurou podang na binoanni ai. Juak-juak ni ELOHIM do sidea, laho mangkonahon uhum bani sihorjahon hajahaton. (Ps. 82:6.) 

13:5 Halani ai patut do unduk hita, seng pitah ringis ai, tapi homa halani panggora ni uhur in. 

13:6 Halani ai galar nasiam ma balasting. Pagawei ni ELOHIM do sidea na tongtong mardiateihon pasal in. 

13:7 Galar nasiam ma bani ganup halak na patut situngguonni. Balasting bani na patut manjalosi, sohei bani haondosanni, biar bani na patut habiaran anjaha sangap bani na patut pasangapon. (Mat. 22:21.) 

13:8 Ulang ma marutang nasiam age bani ise pe, sobali na marsihaholongan, ai na mangkaholongi hasoman, in do na manggoki titah in. (Gal. 5:14; 1 Tim. 1:5.) 

13:9 Ai titah na mangkatahon: "Ulang ho marbangkis, ulang ho mamunuh, ulang ho manangko, ulang ho manguhur-uhuri," ronsi titah na legan pe, on do rimpunni: Haholongi ma hasomanmin songon dirimu! (2 Mus. 20:13-17; 3 Mus. 19:18.) 

13:10 Ia holong in seng ibahen na jahat dompak hasamon; ase holong do hagogok ni titah in.(Mat. 22:40; 1 Kor. 13:4.) 

13:11 Ambah ni ai, ibotoh nasiam do, sonaha panorang on, paboa na jumpah ma panorangni puho humbani na modom, ai domma lambin dohor haluahonta nuan, marimbang mulai porsaya hita. (Ep. 5:14; 1 Tes. 5:6, 7.) 

13:12 Na laho salpu ma borngin, na dohor ma siang ni ari. Ai pe, tanggali hita ma pambahenan hagolapan, anjaha pakei hita ma sinjata haliharon! (Ep. 5:11; 1 Joh. 2:8.) 

13:13 Tipak ma parlahouta songon na patut arian, ulang marmangan-mangan ampa marminum-minum, ulang marhabutakon ampa uhur na so maila, ulang maringor ampa marsimburu! (Luk. 21:34; Ep. 5:18.) 

13:14 Tapi pakei nasiam ma Tuhan Jesus Kristus, anjaha ulang ma balosi nasiam dagingnasiam, laho mamuhoi hisap-hisapni. (Gal. 3:27.)

0 komentar:

Posting Komentar