Senin, 23 Desember 2013

ROM 1

Rom 1


1:1 Ahu Paulus, juak-juak ni Jesus Kristus, na tardilo gabe apostel, na pinapulig mangambilankon ambilan na madear na humbani ELOHIM , (Lah. 9:15, 13:2; Gal. 1:15.) 

1:2 na pinarbagahni ai hinan ibagas Surat na pansing in marhitei nabi-nabini, (bd. 16:25, 26; Tit 1:2.) 

1:3 pasal Anakni, na tubuh humbani ginompar ni si Daud ia dagingni, (bd. 9:5; 2 Sam. 7:12; Mat. 22:42.) 

1:4 anjaha na pinabangkit gabe Anak ni ELOHIM ibagas hagogohon, mangihutkon Tonduy Na pansing, marhitei na puho humbani na matei, ai ma Jesus Kristus, Tuhanta in. (Lah. 13:33.) 

1:5 Hum-Bani do ijalo hanami idop ni uhur ampa jabatan apostel, laho manuankon haporsayaon ampa pambalosion bani Goranni, itongah-tongah ni bangsa sipajuh begu-begu, (bd. 15:18; Lah. 26:16-18; Gal. 2:7-9.) 

1:6 humbani sidea do homa nasiam, nasiam na dob nidilo ni Jesus Kristus. 

1:7 Nasiam haganup, na i huta Rom, na hinaholongan ni ELOHIM , na mapansing anjaha na tardilo: Idop ni uhur ma bani nasiam ampa damei humbani ELOHIM Bapanta ampa Tuhan Jesus Kristus! (4 Mus. 6:25-26; 1 Kor. 1:2; 2 Kor. 1:1; Ep. 1:1.) 

1:8 Parlobei huhatahon ma tarima kasih bani ELOHIM ngku marhitei Jesus Kristus halani nasiam haganup, ai tarambilan do haporsayaonnasiam i sab dunia on. (bd. 16:19; 1 Tes. 1:8.) 

1:9 ELOHIM , na hubalosi ibagas tonduyhu marhitei na mangambilankon ambilan na madear ni Anakni in, Ia do saksingku, paboa na so marnamaronti ahu mardingat nasiam. (Pil. 1:8; Ep. 1:16.) 

1:10 Tongtong do hupangindo ibagas tonggongku, andohar boi ahu marayak nasiam, atap antigan pe, domu hubani rosuh ni ELOHIM . (bd. 15:23, 32; Lah. 19:21.) 

1:11 Ai masihol do uhurhu mangidah nasiam, andohar tarbere ahu deba bani nasiam sibere-bere partonduyon, laho patoguhkon haporsayaonnasiam, (Lah. 28:31.) 

1:12 artini ai, ase dapotan gogoh age ahu humbani nasiam halani haporsayaonta rombang. (2 Ptr. 1:1.) 

1:13 Tapi sihol ma botohonnasiam, ale hasoman, na dob gati do husurahon marayak nasiam, ase marbuah ahu bani nasiam songon na bani bangsa na legan, tapi tarlanglang do ronsi sonari. 

1:14 Parutang do ahu bani halak Gorik age bani bangsa na legan, bani halak na pentar-pentar age bani halak na bodoh, 

1:15 halani ai do ase husurahon mangambilankon ambilan na madear in age bani nasiam i huta Rom. 

1:16 Ai seng huhailahon ambilan na madear in, ai hagogohon ni ELOHIM do in paluahkon sagala na porsaya, halak Jahudi parlobei, dob ai halak Gorik. (Ps. 119:46; Lah. 13:46; 1 Kor. 1:18, 24.) 

1:17 Ai ipatalar do ijin hapintoron ni ELOHIM , humbani haporsayaon hubani haporsayaon, songon na dob tarsurat in: Na manggoluh do parpintor in halani haporsayaonni. (bd. 3:21, 22; Hab. 2:4.) 

1:18 Ai ipatalar do ringis ni ELOHIM hun nagori atas dompak sagala jolma na so daulat anjaha na geduk, na mangambat hasintongan in marhitei hagedukon. 

1:19 Halani pambotoh pasal ELOHIM , torang do bani sidea, ai ELOHIM sandiri do pabotohkon ai bani sidea. (Lah. 14:15-17; 17:24-28.) 

1:20 Ai boi do taridah biak ni ELOHIM na ponop in, ai ma hagogohonni na manongtong in ampa haELOHIM onni, timbangon ni uhur humbani pambahenanni ai, dob itompa dunia on, ase ulang adong sidalian ni sidea. (Ps. 19:2; Heb. 11:3.) 

1:21 Halani age pe ibotoh sidea adong ELOHIM , seng ipasangap sidea, Ia songon ELOHIM , anjaha seng ipuji, gabe ipaoto-oto pingkiranni ma sidea, anjaha golap ma pingkiran ni sidea na so marpangarusion ai. (Ep. 4:18.) 

1:22 Iagan na maruhur sidea, hape na oto do. (Jer. 10:14; 1 Kor. 1:20.) 

1:23 Itukar sidea do hasangapon ni ELOHIM na manongtong in bani gana-gana ni jolma na laho salpu in, bani manuk-manuk, binatang ampa sipanjulur. (5 Mus. 4:15-19.) 

1:24 Halani ai iondoskon ELOHIM do sidea ibagas hisap-hisap ni uhur ni sidea hu habutakon, pala ipabutak sidea dagingni samah sidea. (Lah. 14:16.) 

1:25 Itukar sidea do hasintongan ni ELOHIM gabe ladung, gabe isombah anjaha ibalosi sidea ma na tinompa gantih ni Panompa, sipujion ronsi sadokah ni dokahni. Amen. 

1:26 Halani ai iondoskon ELOHIM ma sidea bani hisap-hisap habadoron; iubah parinangon ni sidea do hasomalan na patut hubani ulah na so somal. 

1:27 Sonai homa dalahi, itadingkon do ruhut pardomuan bani parinangonni, gabe garang ma sidea ibagas hahisapon, pala dalahi samah dalahi mambahen habadoron, gabe sonai ma ijalo sidea upah ni hakahouon ni sidea bani dirini bei. (3 Mus. 18:22; 20:13; 1 Kor. 6:9.) 

1:28 Halani lang iporluhon sidea na mananda ELOHIM , gabe iondoskon ELOHIM ma sidea bani paruhumon na so margagan, ase ihorjahon na so patut. 

1:29 Gok do sidea bani masam ni hagedukon, hajahaton, hasamboron, uhur haut, latei, pamunuhon, paringoran, uhur sipakulah-kulah ampa akal-akal. 

1:30 Sidea, ai ma sipanghata-hatai, munsuh ni ELOHIM , sipanrisai, na jungkat, sigijang uhur, sibuei hata, paruhur na masambor, silawan na matoras, 

1:31 na so maruhur, siosei padan, na so mambotoh holong ampa idop ni uhur. 

1:32 Ibotoh sidea do namin aturan ni ELOHIM , na mangkatahon patut do marutang hosah na mangkorjahon sisonai, hape tong do ihorjahon, tapi seng pitah ihorjahon sidea, marosuh do sidea tene bani na mangkorjahon ai.

0 komentar:

Posting Komentar