Minggu, 29 Desember 2013

PANGUNGKABON 1

Pangungkabon 1


1:1 On ma pangungkabon ni Jesus Kristus, na binerehon ni ELOHIM hu-Bani, laho patuduhkon hubani juak-juakni na laho podas masa; jadi isuruh ma malekatni pabotohkon ai bani juak-juakni, si Johannes. (bd. 22:6.) 

1:2 Isaksihon do hata ni ELOHIM pakon hasaksian pasal Jesus Kristus, ai ma haganup na dob niidahni. (ay. 9; 6:9.) 

1:3 Martuah ma na mambasa pakon na mambogei hata ni panjahaion on, na marimbagaskon na tarsurat ibagas on, ai dohor ma panorangni. (bd. 22:7, 10.) 

1:4 Humbani si Johannes hubani na pitu kuria i Asia: Idop ni uhur ma bani nasiam pakon damei hum-Bani, na dong sonari, na dob dong hinan ampa na laho roh, pakon humbani tonduy na pitu na ilobei ni hotakni, (bd. 3:1; 5:6; 2 Mus. 3:14, 15.) 

1:5 ampa humbani Jesus Kristus, saksi na bonar in, na parlobei tubuh humbani na matei, sigomgom sagala raja ni dunia on. Ia, na manghaholongi hita anjaha na paluahkon hita humbani dousanta marhitei darohni, (bd. 3:14; Ps. 87:28; Kol. 1:18.) 

1:6 na manjadihon hita gabe harajaon hamalimon bani ELOHIM Bapani: Bani ma hasangapon pakon hagogohon ronsi sadokah ni dokahni! Amen. (bd. 5:10; 2 Mus. 19:6; 1 Ptr. 2:5, 9.) 

1:7 Tonggor ma, na roh ma Ia marhasoman hombun, anjaha idahon ni sagala mata ma Ia, sonai homa sidea na mamantom-Si; jadi mandoruh ma sagala bangsa na i tanoh on marhalani-Si. Sonai ma tongon. Amen. (Dan. 7:13; Sak. 12:10; Joh. 19:37.) 

1:8 Ahu do Alpa pakon Omega, Bonani pakon Ujungni, nini Tuhan ELOHIM , na dong sonari, na dob dong hinan pakon na laho roh, Pargogoh na so tarimbang.(ay. 4; Jes. 41:4; Heb. 13:8.) 

1:9 Ahu si Johannes, saninanasiam anjaha hasomannasiam ibagas sitaronon pakon ibagas harajaon ampa ibagas hasabaron ibagas Jesus Kristus; i pulou Patmos do ahu ijia halani hata ni ELOHIM pakon halani panaksihon bani Jesus. (bd. 22:8; 2 Tes. 3:4.) 

1:10 Ibagas Tonduy do ahu bani ari ni Tuhan in; jadi hubogei ma i pudingku sora na maling songon sora ni tarompit, (ay. 15.) 

1:11 na manghatahon: Atap aha na niidahmu, suratkon ma in bani sada buku anjaha tongoshon ma bani kuria na pitu ai, ai ma Epesus, Simirna, Pergamon, Tiatira, Sardes, Piladelpia pakon Laodikea. 

1:12 Jadi marhusor ma ahu dompak sora na marsahap pakon ahu ai. Sanggah na marhusor ai ahu, huidah ma pitu parsuluhan omas. (Sak. 4:2.) 

1:13 Anjaha itongah-tongah ni parsuluhan ai adong ma sada songon Anak ni Jolma, na marbaju ganjang das hu naheini anjaha na 

1:14 Lopak do uluni pakon jambulanni songon ambulu ni biri-biri silopak, songon salju, anjaha songon gara ni apuy do ia matani. (Dan. 7:9; 10:6.) 

1:15 Naheini songon tombaga na ilala ibagas parhasak ni bah banggal. (bd. 2:18.) 

1:16 Ijolom do pitu bintang ibagas tanganni siamun, anjaha humbani pamanganni luar do podang sidua mata na marot, anjaha bohini marsinalsal songon mata ni ari sanggah hadetenganni. (ay. 20; Jes. 49:2.) 

1:17 Sanggah huidah Ia, tompas ma ahu songon na matei ilobei ni naheini. Jadi itampeihon ma tangan siamunni hubangku, nini ma: Ulang mabiar! Ahu do Na parlobei pakon Na parpudi, 

1:18 anjaha na manggoluh. Na dob matei do Ahu, anjaha tonggor ma, na manggoluh do Ahu ronsi sadokah ni dokahni, anjaha Bangku do anakkunsi ni hamateian pakon nagori toruh.(bd. 2:8; Jes. 44:2, 6; Dan. 10:9, 19.) 

1:19 Ase suratkon ma na niidahmu, ai ma na masa sonari, age na laho masa ope ipudi ni on. 

1:20 Anjaha on do rusia pasal bintang na pitu, na niidahmu bani tangan siamunku pakon parsuluhan omas na pitu in: Ia bintang na pitu in, in ma malekat ni kuria na pitu in, anjaha na pitu parsuluhan in, in ma na pitu kuria in. (Mat. 2:7.)

0 komentar:

Posting Komentar