Sabtu, 21 Desember 2013

LUKAS 7

Lukas 7


7:1 Ase dob salpu ihatahon Jesus haganup hatani ondi bani na mabuei ai, masuk ma Ia hu Kapernaum. 

7:2 Jadi adong ma ijai sada juak-juak ni kopala ni tentara, na hinarga ni tuanni, boritan do ia, pala mangkatarhatos. 

7:3 Dob ibogei kopala ni tentara ai barita ni Jesus, isuruh ma pangintuai ni halak Jahudi marayaksi, laho mangelek-eleksi, ase roh Ia pamalum juak-juakni ai. 

7:4 Jadi dob das sidea bani Jesus, gomos ma pangajar-ajari ni sidea bani, nini ma: Patut do tangihononmu ia. 

7:5 Ai holong do uhurni bani bangsanta, anjaha ia do na pajongjong parguruanta. 

7:6 Jadi laho ma Jesus rap pakon sidea. Tapi sanggah lang daoh be Ia hun rumah ai, isuruh kopala ni tentara ai ma hasomanni mangkatahon hu-Bani: Tuhan, ulang pala loja Ham! Ai lang talup ahu, masukanmu pala rumahku. 

7:7 Halani ai do homa, ase seng talup huahap ahu sandiri marayak Ham. Hatahon Ham ma sangkababah hata gelah, ase malum juak-juakkai. 

7:8 Ai halak na i toruh ni parentah do ahu, anjaha i toruhku pe adong do tentara. Anggo huhatahon bani na sada: Laho! gabe laho do ia. Atap hubani na legan: Roh! gabe roh do ia. Atap hubani juak-juakku: Bahen ai! jadi ibahen do. 

7:9 Mambogei ai longang ma Jesus, lanjar marhusor ma Ia marsahap bani halak na mabuei, na mangirikkonsi ai: Huhatahon ma bani nasiam: Gari bani halak Israel, seng adong jumpah Ahu haporsayaon na sonon. 

7:10 Jadi mulak ma hu rumah na sinuruh ai, anjaha domma malum jumpah sidea juak-juak ai. 

7:11 Dob salpu ai, laho ma Ia hubani sada huta na margoran Nain; susianni do hasomanni saodoran ampa buei jolma.

7:12 Marayak horbangan ni huta ai sidea, tonggor ma, iusung halak ma hu darat sada halak na matei, ai ma anak ni sada puang-puang na mabalu; buei do singkuta ai manaruhkon. (1 Raj. 17:17.) 

7:13 Mangidah na mabalu ai Tuhan in, mabangor ma uhurni, jadi ihatahon ma hubani: Ulang tangis ham! 

7:14 Lanjar idohori ma batang ai, ijamah ma, jadi sonto ma na mangusung ai, anjaha ihatahon ma: Ale garama, Ahu mangkatahon bam, puho ma! 

7:15 Jadi hundul ma halak na dob matei ai, ipungkah ma marsahap, anjaha iondoskon ma ia bani inangni ai. (1 Raj. 17:23; 2 Raj. 4:36.) 

7:16 Gabe mabiar ma sidea haganup, anjaha ipuji sidea ma ELOHIM , nini ma: Domma jongjong itongah-tongahta sada nabi bolon, anjaha itatap ELOHIM do bangsani. (bd. 1:68.) 

7:17 Sar ma baritani ai hu sab nagori Judea, ronsi hu ganup nagori na inggot ai. (ay. 18, 35; Mat. 11:2-19.) 

7:18 Ibaritahon susian ni si Johannes ma ganupan ai hubani. 

7:19 Jadi idilo ma susianni dua halak hu lobeini, lanjar isuruh ma sidea marayak Tuhan in, laho manungkun hu-Bani: Ai Ham do na sihol roh in, atap na legan ope paimaonnami? 

7:20 Ase dob das halak ai hu lobeini, ihatahon sidea ma: Isuruh si Johannes pandidi do hanami marayak ham, laho manungkun: Ai Ham do na sihol roh ai, atap na legan ope paimaonnami? 

7:21 Bani panorang ai, sanggah pamalumhon buei halak do Ia humbani bagei-bagei ni naborit, sitaronon ampa tonduy na jahat, anjaha buei do na mapitung marpangidah ibahen. 

7:22 Ibalosi ma sidea nini ma: Laho ma nasiam mambaritahon bani si Johannes na niidah ampa na binogeinasiam: Na gabe marpangidah do na mapitung, mardalani na repat, gabe borsih na gadamon, marpanangar na nengel, mulak manggoluh na matei, ambilan na madear iambilankon do bani halak na masombuh, 

7:23 anjaha martuah ma na so sangsi Bangku! 

7:24 Anjaha dob laho suruhan ni si Johannes ai, itarsingati ma si Johannes bani halak na mabuei ai: Aha do na sihol idahonnasiam, ase roh nasiam hu halimisan on? Arung-arung na niombus ni logou do? 

7:25 Na sihol mangidah aha do, ase luar nasiam? Halak parhiou na lampot do? Tonggor ma, i rumah bolon do siparhiou na jenges ampa sipangan na mantin-mantin. 

7:26 Na sihol mangidah aha do, ase luar nasiam? Nabi do? Ai ma tongon. Huhatahon ma bani nasiam: Lobihan do ia humbani nabi. (bd. 1:76) 

7:27 Ia do na hinatahon ni surat in: Suruhonku ma suruhanku, parlobeimu, sipaturei dalanmu i lobeimu! (Mal. 3:1.) 

7:28 Huhatahon ma bani nasiam: Seng dong na tubuh humbani naboru sibanggalan marimbang si Johannes; tapi sietekan pe ibagas harajaon ni ELOHIM , banggalan do ai humbani. (bd. 1:15.) 

7:29 Ia na mabuei ai haganup, na manangar ai, ampa sijalo sohei, pintor do ELOHIM iahap sidea, ai ijalo do pandidion humbani si Johannes. (bd. 3:7, 12; Mat. 21:32.) 

7:30 Tapi anggo halak Parisei ampa sibotoh surat itulak sidea do sura-sura ni ELOHIM na bani sidea, ai seng ra sidea padidihon dirini hubani. (Lah. 13:46.) 

7:31 Ase hubani ise ma pausihonku halak na sasundut on? Usih hubani ise ma sidea? 

7:32 Usih do sidea hubani dakdanak na hundul i tiga, na marsidiloan: Isompul hanami do sarunei i lobeinima, tapi seng manortor hanima, ipabogeihon hanami do tangis-tangis, tapi seng tangis hanima. 

7:33 Ai roh do si Johannes pandidi, na seng mangan ruti anjaha na seng minum anggur, hape ihatahon nasiam: Na setanon do ia. (bd. 1:15; Joh. 10:20.) 

7:34 Roh do Anak ni jolma in, na mangan anjaha minum, hape ihatahon nasiam: Tonggor ma sipangan magou ampa siparminum-minum, huan-huan ni sijalo sohei ampa pardousa. (bd. 15:2.) 

7:35 Tapi gabe pintor do Hapentaran in marhitei haganup anak-anakni. 

7:36 Dob ai iarahkon sada halak Parisei ma Ia mangan, jadi masuk ma Ia hu rumah ni Parisei ai, lanjar hundul ma ijai. 

7:37 Anjaha tonggor ma, roh ma sada naboru pardousa, pangisi ni huta ai, dob ibotoh, na dob hundul Ia i rumah ni Parisei ai; iboan do sada botol alabaster marisi minak na morum. 

7:38 Mariluh-iluh do ia roh hun pudi mandohori nahei ni Jesus; iarbahi ma naheini ai marhitei iluh-iluhni, iapusi ma ai marhitei jambulanni, isummah ma anjaha iminaki ma naheini ai marhitei minak na misbou ai. 

7:39 Mangidah ai, marpingkir ma Parisei na mangarahkonsi ai hu rumahni: Ambit nabi do halak on, tandaonni do naboru na manjamahsi on, anjaha botohonni do parlahouni, ai pardousa do ia. 

7:40 Jadi nini Jesus ma mambalosisi: Ale Simon, adong do sihatahononku bamu. Balosni: Ham Guru, hatahon Ham ma! 

7:41 Adong ma dua halak paridouan ni sada halak sipaanakkon duit; utang ni na sahalak lima ratus dinar, na sada nari lima puluh. 

7:42 Halani seng targalar sidea ai, ibalihon ma utang ni sidua halak ai. Ise do humbani sidea siholongan uhurni bani? 

7:43 Nini si Simon ma mambalosi: Nini uhurhu, parutang sibueinan, na binalihon ai do. Balos ni Jesus hubani: Sintong do timbanganmu ai. 

7:44 Sanggah na nidompakkonni ai naboru ai, nini Jesus ma dompak si Simon: Iidah ham do naboru on? Roh do Ahu hu rumahmu, seng ibere ham bah pamurihi ni naheihu, tapi anggo ia, iluhni do ibahen mangarbahi naheihu anjaha iapusi bani jambulanni. (1 Mus. 18:4.) 

7:45 Seng isummah ham Ahu, tapi anggo ia, masukkonsi Ahu, seng marparsaranan manummah naheihu. (Rom 16:16.) 

7:46 Seng homa iminaki ham ulungku, tapi anggo ia, iminaki do naheihu bani minak na misbou. 

7:47 Halani ai huhatahon ma bamu: Domma sasap dousani na buei in, mambahen banggal holong ni uhurni. Halak na otik hona sasap dousani, otik do holong ni uhurni. 

7:48 Lanjar nini ma hubani naboru ai: Domma sasap ganup dousamu ai! 

7:49 Gabe nini hasomanni sapanganan ma samah sidea: Ise do on, ase dihut ampa dousa isasap? 

7:50 Ambahni ai ihatahon Jesus ma bani naboru ai: Haporsayaonmu do na paluahkon ham. Mardamei ma ham mulak. (bd. 8:48; 17:19; 18:42.)

0 komentar:

Posting Komentar