Sabtu, 21 Desember 2013

LUKAS 24

Lukas 24

24:1 Tapi bani ari parlobei dob Sabat ai, roh ma sidea girah sogod hu tanoman ai mamboan rium-riuman, na dob pinasirsir ni sidea ai. 

24:2 Tapi domma igulingkon batu ai hun tanoman ai jumpah sidea. 

24:3 Anjaha dob masuk sidea, seng dong be jumpah sidea bangkei ni Tuhan Jesus. 

24:4 Anjaha sanggah na jut ai uhur ni sidea pasal ai, jadi jongjong ma i lambung ni sidea dua halak parhiou na marlinang-linang. 

24:5 Tapi sanggah tarsonggot ai sidea anjaha unduk mangkawah dompak tanoh, jadi nini halak ondi ma hubani sidea: Mase ipindahi nasiam na manggoluh bani ianan ni na matei? 

24:6 Seng ijon Ia, domma puho. Ingat nasiam ma na hinatahonni ai bani nasiam, sanggah i Galilea ope Ia. 

24:7 Ai ihatahon do, paboa maningon ondoshonon do Anak ni jolma in hubagas tangan ni pardousa anjaha parsilangkononkon, tapi mulak manggoluh do ari patoluhon. (bd. 9:22; Mat. 17:22, 23.) 

24:8 Jadi idingat sidea ma hatani ondi. 

24:9 Mulak ma sidea hun tanoman ai, ibaritahon sidea ma haganupan ai bani na sapuluh sada ai ampa bani haganup na legan ai. 

24:10 Si Maria Magdalena ma ai, ambahni ai si Johanna ampa si Maria, inang ni si Jakobus, ampa na legan ai na rap pakon sidea, ipatugah sidea ma ai bani apostel ai. (bd. 8:2, 3.) 

24:11 Hira turi-turian do ai, nini uhur ni sidea, seng ihaporsayai sidea ai. 

24:12 Tapi laho ma si Petrus marlintun hu tanoman ai, itungkir ma hubagas, tapi seng dong iidah sobali hiou putih pambalutini ai. Dob ai mulak ma ia, longang uhurni pasal na masa ai. 

24:13 Bani na sadari ai adong ma dua halak humbani sidea na laho hu sada huta, na margoran Emmaus, hira-hira sapuluh sada batu do daohni hun Jerusalem, 

24:14 anjaha marsahapi do sidea samah sidea pasal na masa ai. 

24:15 Jadi sanggah na marsahapi ai sidea anjaha marsipatorangan, roh ma Jesus mandohori sidea, rap mardalan pakon sidea. (Mat. 18:20.) 

24:16 Tapi mubah do panonggor ni sidea ibahen, ase ulang itanda sidea Ia. 

24:17 Jadi nini ma dompak sidea: Aha do na sinahapkon nasiam in itongah dalan on? Sonto ma sidea, anjaha horu do sidea idahon. 

24:18 Dob ai marbalos ma sada halak, na margoran si Kleopas, nini ma dompaksi: Pitah Ham do gakni na marianan i Jerusalem na so mambotoh na masa ijai bani panorang on? 

24:19 Jadi nini ma dompak sidea: Sonaha? Nini sidea ma mambalosi: Ai ma pasal Jesus, halak Nasaret in, ai ma nabi na gogoh ibagas horja ampa hata ilobei ni ELOHIM ampa haganup bangsa in, (Mat. 21:11.) 

24:20 anjaha sonaha pangondoskon ni sintua ni malim ampa pambobainta Bani ase hona uhum Ia, marutang hosah anjaha iparsilangkon. 

24:21 Tapi mangarap hinan do hanami, Ia ma na paluahkon Israel. Anjaha patolu-arihon ma sadari on, dob na masa ai. (Lah. 1:6.) 

24:22 Anjaha adong do deba naboru hun tongah-tongahnami, na mambahen tarsonggot hanami, girah do sidea nasogod laho hu tanoman ai. (ay. 1-11.) 

24:23 Seng dong jumpah sidea bangkeini ai, tapi mulak do sidea patugahkon, na dob iidah sidea do malekat, na mangkatahon, na manggoluh do Ia. 

24:24 Anjaha dong do deba humbannami na laho hu tanoman ai; jumpah sidea do tongon songon na hinatahon ni puang-puang ai, tapi anggo Ia, seng adong iidah. (ay. 12; Joh. 20:3-10.) 

24:25 Jadi nini ma dompak sidea: E nasiam, na hurang uhur, anjaha na mahol mangkaporsayai na hinatahon ni nabi-nabi! 

24:26 Ai lang maningon sonai do marsitaronon Kristus in, laho masuk hu hasangaponni in? 

24:27 Jadi jojor ma humbani si Musa ampa humbani sagala nabi ipatorang bani sidea sagala na tarsurat pasalsi. 

24:28 Jadi dohor ma sidea bani huta siparayakon ni sidea ai, anjaha ipakulah ma manorushon pardalananni, 

24:29 tapi igogohkon sidea ma mangarahkonsi, nini ma: Tondok ma Ham bannami, ai laho bod ma ari anjaha manabad ma mata ni ari! Jadi masuk ma Ia, tondok bani sidea. 

24:30 Anjaha sanggah na hundul Ia rap pakon sidea mangan, ibuat ma ruti, ihatahon ma tonggo tarima-kasih, dob ai itopiki ma ai anjaha ibere ma bani sidea. (bd. 22:19.) 

24:31 Ijai ma buka mata ni sidea, gabe itanda sidea ma Ia; anjaha Ia pe magou ma humbani pangidah ni sidea. 

24:32 Jadi nini sidea ma samah sidea: Ai lang gara do uhurta ibagas, sanggah na pinarsahapkonni ai hita itongah dalan, laho patorangkon banta na tarsurat in? 

24:33 Jadi mintor misir ma sidea mulak hu Jerusalem, gabe tumpu ma jumpah sidea na sapuluh sada ai ampa hasoman ni sidea. 

24:34 Nini sidea ma: Tongon do, domma puho Tuhan in, anjaha ipataridahkon do dirini bani si Simon! 

24:35 Anjaha sidea pe ibaritahon ma na masa itongah dalan ai, ampa panandai ni sidea Bani, sanggah na manopiki ruti ai Ia. 

24:36 Mangkatahon ai ope sidea, jongjong ma Jesus itongah-tongah ni sidea. 

24:37 Gabe tarsonggot ma sidea anjaha mabiar, iagan sidea begu-begu do na niidah ni sidea ai. (Mat. 14:26.) 

24:38 Jadi nini ma dompak sidea: Mase ma tarsonggot hanima? Mase ma sungkun-sungkun uhurnima ibagas? 

24:39 Tonggor hanima ma tanganku ampa naheihu, paboa Ahu do on. Jamah hanima ma Ahu, anjaha tonggor ma, ai anggo tonduy seng mardaging barang marholi-holi, songon na adong iidah hanima Bangku. 

24:40 Sanggah na mangkatahon ai ipatuduhkon ma tanganni ampa naheini bani sidea. 

24:41 Tapi lanjar ope seng porsaya sidea, halani malas ampa longang ni uhur ni sidea, gabe ihatahon ma bani sidea: Adong do ijon bannima sipanganon? 

24:42 Jadi ibere sidea ma Bani dengke na pinanggang samponggol. (Joh. 21:10.) 24:43 Ai ma ijalo, lanjar ipangan ma ai ipaidah-idah sidea. 

24:44 Jadi nini ma dompak sidea: On ma hatangku, na dob huhatahon bannima, sanggah rap ope Ahu pakon hanima, ai ma, maningon saud do haganup na tarsurat pasal Ahu ibagas titah ni si Musa, buku ni nabi-nabi ampa bani buku Psalm. (ay. 27; bd. 9:22; 18:31-33.) 

24:45 Jadi ibuhai ma uhur ni sidea, ase iarusi ma na tarsurat ai. 

24:46 Ihatahon ma bani sidea: Sonai do tarsurat, maningon marsitaronon do Kristus in, anjaha mulak manggoluh bani ari patoluhon. 

24:47 Anjaha ambilanonkon do marhitei Goranni hamubahon ni uhur bahen hasasapan ni dousa, hubani sagala bangsa, mamungkah hun Jerusalem. 

24:48 Hanima do saksi pasal ai. 

24:49 Anjaha suruhonku do bennima na pinarbagah-bagah ni Bapa in. Tapi soh ma lobei hanima i huta on, paima isorungkon bannima hagogohon na hun datas. (Joh. 15:26; 16:7; Lah. 1:4.) 

24:50 Jadi iarahkon ma sidea hu darat, dohor hu Betania. Jadi ipaherbang ma tanganni laho mamasu-masu sidea. 

24:51 Jadi sanggah na mamasu-masu ai Ia, sirang ma Ia humbani sidea, tarangkat hu surga. 

24:52 Manrogop ma sidea manombahsi, dob ai mulak ma sidea hu Jerusalem, marmalas ni uhur banggal. 

24:53 Anjaha tongtong do sidea i rumah panumbahan mamuji-muji ELOHIM .


0 komentar:

Posting Komentar