Minggu, 22 Desember 2013

LAHOAN NI APOSTEL 3

Lahoan ni Apostel 3


3:1 Jadi rap tangkog ma si Petrus ampa si Johannes hu rumah panumbahan, pukul tolu, bani panorang martonggo. (bd. 10:3.) 

3:2 Anjaha adong ma sada halak na repat humbani partubuhni iboan halak hujai. Siap ari do itaruhkon sidea ia hu lambung ni horbangan ni rumah panumbahan ai, na margoran horbangan na jenges, laho mangindo sibere-bere humbani halak na masuk hu rumah panumbahan ai. (bd. 14:8.) 

3:3 Jadi sanggah iidah halak na repat ai si Petrus ampa si Johannes sihol masuk hu rumah panumbahan ai, ipindo ma sibere-bere. 

3:4 Tapi ikawahkon si Petrus ampa si Johannes ma ia, nini sidea ma: Tonggor dompak hanami! 

3:5 Jadi ikawahkon ma sidea, iarap uhurni adong jaloonni humbani sidea atap aha. 

3:6 Tapi nini si Petrus ma: Pirak pakon omas seng dong bangku, tapi na dong bangku ai ma hubere bam: Marhitei goran ni Jesus Kristus na hun Nasaret in, mardalan ma ho! 

3:7 Lanjar itangkap ma tanganni siamun, laho pajongjongkonsi, jadi mintor totap ma hae-haeni ampa towodni. 

3:8 Mintor ijongjongkon ma lanjar mardalan, masuk ma ia rap pakon sidea hu rumah panumbahan ai mangentes-entes anjaha mirjak-irjak lanjar mamuji ELOHIM . (Jes. 35:6; Luk. 5:25.) 

3:9 Iidah haganup halak na mabuei ai do ia, na mardalan anjaha na mamuji-muji ai bani ELOHIM . 

3:10 Tapi ibotoh sidea do, ia do na hundul mangindo-indo ilambung ni horbangan na majenges ai; longang do sidea anjaha himong mangidah na masa bani ai. (Luk. 5:26.) 

3:11 Tapi halani na sai odor ai ia pakon si Petrus ampa si Johannes, marurup ma roh haganup halak na mabuei ai bani sidea, bani ianan na margoran surambih ni si Salomo, halani longang ni uhur ni sidea. (bd. 5:12; Joh. 10:23.) 

3:12 Mangidah ai si Petrus, nini ma dompak halak na mabuei ai: Nasiam halak Israel, mase longang uhurnasiam pasal on, mase ma sai hanami ikawahkon nasiam, songon gogohnami sandiri atap hadaulatonnami mambahen na mardalan halak on? 

3:13 Na ipasangap ELOHIM ni si Abraham, si Isak ampa si Jakob, ELOHIM ni ompungta in do Jesus juak-juakni in, na iondoskon anjaha na iparsilangkon nasiam in ilobei ni si Latus, age pe paluahon do Ia namin mangihutkon timbanganni. (bd. 2:3; 5:30; Luk. 23:22, 23.) 

3:14 Iparnalang nasiam do Na pansing anjaha na pintor in, tapi ipindo nasiam do paluahon bani nasiam pamunuh in. (Mat. 27:20.) 

3:15 Pambobai hu hagoluhan do ibunuh nasiam. In ma na dob ipapuho ELOHIM humbani na matei, anjaha hanami do saksi pasal ai. (bd. 5:30; Luk. 24:48.) 

3:16 Halani haporsayaon bani Goranni do, ase ipargogohi Goranni halak on, songon na niidah, anjaha na tinanda nasiam on; ibere haporsayaon na humbani Tuhan in do hamalumon bani i lobeinasiam haganupan. (bd. 4:10.) 

3:17 Ai pe, nasiam sanina, huahap, na hurang botoh do nasiam, ase ihorjahon nasiam in, sonai age pangintuainasiam. (bd. 13:27; Luk. 23:34; 1 Kor. 2:8.) 

3:18 Tapi na ipasaud do na dob pinatugahni hinan marhitei pamangan ni ganup nabi, ai ma: Sitaron na marsik do Kristusni. (Jes. 53:5; Luk. 24:25-27.) 

3:19 Ase paubah nasiam ma uhurnasiam, anjaha mulak ma nasiam, ase tarsasap dousanasiam, (bd. 2:38.) 

3:20 andohar roh panorang malas ni uhur hun lobei ni Tuhan in, anjaha ase isuruh bani nasiam Jesus Kristus, songon na dob sinurahonni hinan, 

3:21 ai ma na dob ijalo nagori atas lobei, paima roh panorang parsuang ni haganup, na dob hinatahon ni ELOHIM humbani na hinan marhitei pamangan ni nabini na pansing in. 

3:22 Ai ihatahon si Musa do: Pajongjongon ni Tuhan ELOHIM do sada nabi humbani saninanasiam songon ahu on, Ia do sitangihononnasiam pasal haganup sihatahononni bani nasiam. (5 Mus. 18:15, 19.) 

3:23 Tapi sagala na so manangihon nabi ai, boishononkon do humbani bangsa in! 

3:24 Anjaha sagala nabi na ongga marsahap, mamungkah humbani si Samuel ampa na ipudini ai, pasal ari on do ibaritahon sidea. (Luk. 1:70-75.) 

3:25 Nasiam do anak ni nabi-nabi ai anjaha parrupei bani padan na binahen ni ELOHIM bani ompungta, sanggah na hinatahonni ai bani si Abraham: Anjaha marhitei ginomparmai dapotan pasu-pasu do haganup bangsa na i tanoh on. (1 Mus. 12:3; 22:18.) 

3:26 Bani nasiam do parlobei ipapuho ELOHIM juak-juakni, anjaha isuruh do ia, mamasu-masu nasiam, sagala na mulak humbani hajahatonni bei. (bd. 13:46; Mat. 10:6.)

0 komentar:

Posting Komentar