Senin, 23 Desember 2013

LAHOAN NI APOSTEL 26

Lahoan ni Apostel 26


26:1 Dob ai ihatahon si Agrippa ma hubani si Paulus: Dear ma marsahap ho pasal dirimu! Jadi iangkat si Paulus ma tanganni, lanjar marsahap ma ia mangapiti dirini. 

26:2 Na martuah do ahu huahap, ham raja Agrippa, halani boi ahu sadari on mambahen pangapition pasal diringku dompak sagala pangaduan ni Jahudi, 

26:3 halani botoh tumang do ham pasal adat ampa parsalisihan ni halak Jahudi; halani ai mangindo ma ahu bamu: Sabar ma ham manangihon hatangku! 

26:4 Ibotoh halak Jahudi do ganup parlahouhu humbani haetek-etekonku nari itongah-tongah ni bangsangku i Jerusalem. (bd. 22:3; Gal. 1:13.) 

26:5 Tongon domma dokah itandai sidea ahu, anjaha ambit ra sidea, tarsaksihon sidea do, paboa na huirikkon do golongan Parisei, ai ma situlimatan pasal ugamanta. (bd. 23:6; Pil. 3:5.)

 26:6 Anjaha sonari jongjong do ahu i paruhuman, halani pangarapan ni uhur bani bagah-bagah, na binere ni ELOHIM bani ompungta. (bd. 28:20.) 

26:7 Sihol das hujai do na niarapkon ni bangsanta na sapuluh dua marga in, mambahen na ibalosi sidea ELOHIM arian pakon borngin humbani bois ni gogoh ni sidea. Halani pangarapan ai do, ale rajanami, mambahen na iaduhon halak Jahudi ahu. (bd. 24:15.) 

26:8 Sonaha ma, ase adong itongah-tongahnasiam na so mangkaporsayai, paboa pagoluhon ni ELOHIM do na matei? (ay. 9-18; bd. 4:2; 9:1-22; 22:3-16.) 

26:9 Ahu sandiri huagan do lobei, maningon patut do lawanon Goran ni Jesus na hun Nasaret in sagogoh-gogohni. 

26:10 Anjaha sonai do hubahen i Jerusalem. Seng pitah hupatutupkon buei humbani halak na mapansing ai, marhitei kuasa na humbani sintua ni malim, tapi anggo tarbunuh sidea, huhadearhon do ai. 

26:11 Gati do huarsik sidea bani haganup rumah parguruan, andohar ra sidea manrisai; halani gila ni uhurhu, huparburu do sidea ronsi huta sidaohan. 

26:12 Sonai homa laho do ahu hu Damaskus marhitei kuasa ampa parpaingkat ni sintua ni malim. 

26:13 Tapi sanggah itongah dalan, ham rajanami, sanggah tongah arian, huidah ma sinalsal na liharan marimbang mata ni ari roh hun langit, manondangi ahu inggot ampa hasomanku saodoran. 

26:14 Jadi martompasan ma hanami haganup hu tanoh, anjaha hutangar ma sada sora ibagas hata Heber: Saul, Saul! Mase pardakdakonmu ahu? Sunsah ma ho manandaki suga-suga! 

26:15 Tapi ningku ma: Ise do Ham, Tuhan? Jadi nini Tuhan in ma: Jesus do Ahu, na pinardakdakmin! 

26:16 Tapi jongjong ma ho! Ase hupataridahkon pe diringku bam, on do sura-surangku, ai ma pabangkit ho gabe juak-juak ampa saksingku, laho manaksihon na dob niidahmu ampa na sihol pataridahonku ope bam! (Gal. 1:2.) 

26:17 Hupaluah pe ho humbani bangsa on ampa humbani bangsa sipajuh begu-begu, ai hubani sidea do ho suruhonku, (Jer. 1:18, 19.) 

26:18 laho mambuka mata ni sidea, ase mulak sidea humbani hagolapan hubani haliharon, anjaha humbani kuasa ni sibolis hubani ELOHIM , ase ijalo sidea hasasapan ni dousa ampa rupei rap pakon halak na pansing, halani haporsayaon Bangku. (bd. 20:32; Jes. 42:7; Kol. 1:12-17.) 

26:19 Halani ai, ale raja Agrippa, seng mangengkar ahu bani panonggoran na hun nagori atas ai, (Gal. 1:16.) 

26:20 gabe huambilankon ma parlobei bani halak na i Damaskus, dob ai bani na i Jerusalem, sonai homa bani haganup na i Judea ampa halak sipajuh begu-begu, ase ipaubah uhur ni sidea anjaha mulak bani ELOHIM , anjaha iparlahouhon na patut domu bani uhur na dob mubah. (bd. 9:20, 28, 29; 20:21; Mat. 3:8.) 

26:21 Halani ai do ase itangkap Jahudi ahu i rumah panumbahan, anjaha domma sihol bunuhon ni sidea ahu. (bd. 21:30, 31.) 

26:22 Tapi iurupi ELOHIM do ahu ronsi sadari on, mambahen boi ahu jongjong marambilan bani na etek-etek ampa na magodang, anjaha seng dong na huhatahon na so domu hubani na jinahaan ni nabi-nabi ampa si Musa, (Luk. 24:44-47.) 

26:23 paboa, na maningon manaron do Kristus, anjaha Ia parlobei puho humbani na matei, laho mamaritahon haliharon bani bangsa in ampa bani bangsa sipajuh begu-begu.(bd. 13:47; Luk. 24:26; 1 Kor. 15:4, 20.) 

26:24 Halani sonai pangkatahonni mambela dirini, nini si Festus ma marsora na gogoh: Na podoan do ho Paulus! Parbinotohanmu na buei in do mambahen podoan ho. 

26:25 Nini si Paulus ma: Seng na podoan ahu, ham Festus, na pinarsangapan, tapi hata na tongon anjaha na torang do na huhatahon. 

26:26 Halani torang do in ibotoh raja in, mambahen na hinsah uhurhu mansahapkon ai bamu; ai tenger do uhurhu seng adong age sada hunjai na lingod i lobeimu, ai seng masa ai bani na ponop. (Joh. 18:20.) 

26:27 Ham raja Agrippa, porsaya do ham bani nabi? Hubotoh na porsaya do ham! 

26:28 Jadi nini si Agrippa ma hubani si Paulus: Tongkin nari mando ase gabe Kristen ahu ibahen ho. 

26:29 Jadi nini si Paulus ma: Ipangindo uhurhu humbani ELOHIM , tongkin atap dokah, seng pitah ham, tapi haganup halak na adong ijon na mambogei hatangku, gabe songon ahu on ma namin sobali gari on. (bd. 28:20.) 

26:30 Jadi jongjong ma raja ai ampa gubernur ai ampa si Bernike ampa hasoman ni sidea, (bd. 25:23.) 

26:31 anjaha dob holang sidea, nini sidea ma samah sidea: Seng dong ihorjahon ia, na mambahen marutang hosah ia barang tartutup pe. 

26:32 Lanjar nini si Agrippa ma hubani si Festus: Na boi do namin maluah halak ai, ambit lang apel ia bani Kesar. (bd. 25:11.)

0 komentar:

Posting Komentar