Sabtu, 28 Desember 2013

KOLOSSE 1

Kolosse 1


1:1 Humbani si Paulus, apostel ni Kristus Jesus Marhitei rosuh ni ELOHIM , ampa si Timoteus sanina in, 

1:2 marayak halak na mapansing na i Kolosse ampa sanina na porsaya bani Kristus in: Idop ni uhur ma bani nasiam ampa damei humbani ELOHIM , Bapanta in. (Rom 1:7.) 

1:3 Mangkatahon tarima kasih do hanami tongtong bani ELOHIM , Bapa ni Tuhanta Jesus Kristus, ibagas tonggonami bani nasiam, 

1:4 ai ibogei hanami do pasal haporsayaonnasiam bani Kristus Jesus ampa holong ni uhurnasiam dompak haganup halak na mapansing in, (Ep. 1:15.) 

1:5 halani pangarapan, na dob pinasirsir bani nasiam i nagori atas. Domma ibogei nasiam hinan pasal in marhitei hata hasintongan in, in ma ambilan na madear in. 

1:6 In ma na dob adong bani nasiam, age i sab dunia on; na marbuah do in anjaha lambin marbanggal, songon na bani nasiam, mulai humbani panorang, dob ibogei nasiam anjaha itanda nasiam idop ni uhur ni ELOHIM ibagas hasintongan. 

1:7 Sonin do iguruhon nasiam humbani si Epapras, hasomannami juak-juak, na hinaholongan, ia do parugas hatengeran ni Kristus manghopkop nasiam, (bd. 4:12.) 

1:8 anjaha ia do patugahkon bannami holong ni uhurnasiam ibagas Tonduy. 

1:9 Halani ai, mulai humbani panorang dob ibogei hanami in, seng maronti hanami manonggohon nasiam anjaha mangindo, ase igoki bani nasiam panandaion pasal rosuh ni uhurni, marhasoman sagala hapentaran ampa pangarusion partonduyon, (Ep. 1:16, 17.) 

1:10 ase marparlahou na talup nasiam bani Tuhan in, gabe harosuh tumang Bani, marbuah nasiam bani sagala horja na madear, anjaha martambah bani nasiam panandaion pasal ELOHIM , (Ep. 4:1; Pil. 1:27.) 

1:11 gabe ipargogohi tumang nasiam domu hubani gogoh ni hasangaponni in, mangkorhon hasabaron ampa hatahanon marhasoman malas ni uhur; 

1:12 martarima kasih bani ELOHIM , na dob pataluphon nasiam marparbagianan bani siteanon ni halak na mapansing ibagas haliharon.(Ep. 1:11.) 

1:13 Ia do, na paluahkon hita humbani kuasa ni hagolapan, anjaha ipapindah do hita hubagas harajaon ni Anak, na hinaholongan ni uhurni in.(bd. 2:15.) 

1:14 Ibagas Ia do adong banta haluahon, ai ma hasasapan ni dousa.(Ep. 1:7.) 

1:15 Anjaha Ia do usihan ni ELOHIM na so taridah in, na parlobei tubuh humbani sagala na tinompa,(Heb. 1:3.) 

1:16 ai marhiteihonsi do itompa haganup, na i nagori atas ampa na i tanoh on, na taridah pakon na so taridah, atap paratas pe ai atap harajaon atap gomgoman atap kuasa. Haganupan ai itompa marhiteihonsi anjaha marhadoban hu-Bani.(Joh. 1:3, 10.) 

1:17 Parlobei do Ia humbani haganup, anjaha ganupan in marhiteihonsi do torus adong. (Pod. 8:25-27.) 

1:18 Ia do ulu ni badan in, in ma kuria in. Ia do parmulaan, na parlobei tubuh humbani na matei, ase Ia na parlobei bani haganup. (Lah. 26:23; Ep. 1:22; Pangk. 1:5.) 

1:19 Ai ibagas Ia do itontuhon ELOHIM , marianan hagogokni in, (bd. 2:9; Joh. 1:16.) 

1:20 anjaha padear haganup marhiteihonsi bani Dirini, na i tanoh on age na i nagori atas, dob ipajongjong damei marhitei darohni na madurus in bani hayu pinarsilang. (Joh. 2:2; Ep. 1:10.) 

1:21 Anjaha nasiam na daoh hinan anjaha munsuh marhitei paruhuron ampa horja hajahaton, (Rom 5:10; Ep. 2:12; 3:18.) 

1:22 ipadear Jesus nuan ibagas daging hajolmaonni, marhitei parmateini, laho pajongjongkon nasiam pansing, lang dong sihataon anjaha sipinsangon i lobeini. (Ep. 5:27.) 

1:23 Asal ma marianan nasiam jonam, anjaha toguh ibagas haporsayaon, anjaha lang ra mosor humbani pangarapan na binogeinasiam ibagas ambilan na madear, na binaritahon bani haganup na tinompa, na itoruh ni langit, anjaha ahu, si Paulus do gabe siparugas bani in. 

1:24 Malas do uhurhu nuan ibagas sitaronon manghophop nasiam, anjaha ibagas dagingku hugoki na so jumpah ope bani na tinaron ni Kristus, laho manghophop angkulani, in ma kuria in. (Ep. 3:13.) 

1:25 Na dob gabe siparugas ni in do ahu, domu hubani jabatan, na pinadas ni ELOHIM bangku halani nasiam, laho padaskon hata ni ELOHIM , 

1:26 in ma rusia in, na ponop marabad-abad ampa marsundut-sundut; tapi sonari ipatalar do bani halak na mapansingni in. (Rom 16:25, 26.) 

1:27 Hubani sidea do pabotohkonon ni ELOHIM surung ni hamuliaon ni rusia on, itongah-tongah ni sipajuh begu-begu, ai ma: Kristus ibagas nasiam, pangarapan in bani hasangapon. (1 Tim. 1:1.) 

1:28 Ia do ibaritahon hanami; ipaingat anjaha iajari hanami do sagala jolma pasal sagala hapentaron, laho pajongjongkon ganup jolma gokan dear ibagas Kristus. (ay. 22) 

1:29 Halani in do loja anjaha maruntol ahu, domu hubani hagogohonNi na marhorja gogoh ibahen ibagas ahu.

0 komentar:

Posting Komentar