Minggu, 22 Desember 2013

JOHANNES 5

Johannes 5


5:1 I pudi ni ai adong ma pesta ni halak Jahudi, jadi tangkog ma Jesus hu Jerusalem. 

5:2 I Jerusalem, i lambung ni horbangan biri-biri ai, adong do sada paridian, na margoran Bethesda bani hata Heber, adong do lima sopou-sopou ijai. 

5:3 Martibalan do ijai buei halak na boritan, na mapitung, na oyangon ampa na matei lopah, na paima-imahon bani pargunsang ni bah ai, 

5:4 ai turun do marnombas malekat ni ELOHIM manggunsang bah ai. Anjaha na parlobei masuk hu bagas, dob hona gunsang bah ai, malum ma atap aha pe naboritni. 

5:5 Adong do ijai sada halak, na dob tolu puluh ualuh tahun dokahni boritan. 

5:6 Dob iidah Jesus ia tibal ijai, anjaha ibotoh, sonai ma dokahni ijai, gabe nini ma dompaksi: Sihol malum ham? 

5:7 Nini na boritan ai ma mambalosisi: Ham tuannami, seng dong dihadihangku, na mangabingkon ahu hu paridian in bani pargunsang ni bah in, ai rohhonsi ahu, domma adong na legan manlobei ahu turun. 

5:8 Nini Jesus ma hubani: Jongjong ma ham, angkat ma podomanmu in, laho ma ham! (Mat. 9:6.) 

5:9 Jadi mintor jorgit ma halak ai, iangkat ma podomanni, lanjar laho ma ia. Tapi ari Sabat do na sadari ai. 

5:10 Jadi ihatahon halak Jahudi ma bani halak na pinamalum ai: Ari Sabat do arian on, seng bulih boanonmu podomanmu! (Jer. 17:21.) 

5:11 Nini ma mambalosi: Halak, na pamalum ahu, Ia do mangkatahon bangku: Angkat ma podomanmu, anjaha laho ma. 

5:12 Isungkun sidea ma ia: Ise mangkatahon bam: Angkat ma anjaha laho ma? 

5:13 Tapi seng itandai na boritan ai Ia, ai domma laho Jesus, halani buei do jolma bani ianan ai. 

5:14 Dob salpu ai, jumpah Jesus ma ia i rumah panumbahan, gabe nini ma hubani: Tonggor ma, domma jorgit ham. Ulang be nunut mardousa, ase ulang sogop bamu siparahan. (bd. 8:11.) 

5:15 Jadi laho ma halak ai, ihatahon ma bani halak Jahudi, paboa Jesus do na pamalumkonsi. 

5:16 Jadi iparburu halak Jahudi ma Jesus, halani ibahen sonai bani ari Sabat. (Mat. 12:14.) 

5:17 Tapi nini Jesus ma mambalosi sidea: Na marhorja do Bapa ronsi nuan, Ahu pe marhorja do. (bd. 9:4.) 

5:18 Halani ai lambin ipindahi Jahudi ma dalan laho mamunuhsi, ai seng be pitah ari Sabat isedai, tapi igoran do homa ELOHIM Bapani, anjaha ipados dirini pakon ELOHIM . (bd. 7:30; 10:33.) 

5:19 Jadi nini Jesus ma mambalosi sidea: Na sintong tumang do na huhatahon on bani nasiam: Aha pe lang tarhorjahon Anak in humbani dirini sandiri, pitah na niidahni do ihorjahon Bapa in. Ai aha na hinorjahon ni Bapa in, ai do homa ihorjahon Anak in. (bd. 3:11, 32.) 

5:20 Ai holong do uhur ni Bapa in bani Anak in, anjaha haganup do ipatuduhkon Bani na hinorjahonni, anjaha patuduhkononni ope Bani horja sibanggalan hunjon, ase longang uhurnasiam. (bd. 3:35.) 

5:21 Ai songon pamuhoi ni Bapa in bani na matei, laho pagoluhkon sidea, sonai do Anak in, ipagoluh do atap ise, na sihol pagoluhonni. 

5:22 Ai seng dong na iuhumi Bapa in, tapi domma iondoskon haganup panguhumon in bani Anak in. (Dan. 7:13, 14; Lah. 7:31.) 

5:23 Ase haganup pasangap Anak in, songon parpasangap ni sidea bani Bapa in. Na so pasangaphon Anak in, ai ma na so pasangap Bapa in, na marsuruhsi. (Pil. 2:10, 11; 1 Joh. 2:23.) 

5:24 Na sintong tumang do na huhatahon on bani nasiam: Barang ise, na manangihon hatangku anjaha porsaya bani na marsuruh Ahu, domma das bani hagoluhan na sadokah ni dokahni; seng pala be ia hu paruhuman, domma mandipar ia humbani hamateian hu hagoluhan. (bd. 3:16, 18.) 

5:25 Na sintong tumang do na huhatahon bani nasiam: Na roh ma panorangni, anjaha domma masa ai nuan, bogeion ni na matei in ma sora ni Anak ni ELOHIM , gabe manggoluh ma na mambogeisi. (Ep. 2:5, 6.) 

5:26 Ai songon Bapa in pargoluh ibagas dirini, lanjar sonai do ibere bani Anak in, ase pargoluh Ia ibagas dirini. (bd. 1:1-4.) 

5:27 Anjaha ibere do Bani kuasa manguhumi, halani Anak ni jolma Ia. (ay. 22.) 

5:28 Ulang ma longang uhurnasiam pasal ai, ai na roh ma panorangni, bogeion ni haganup halak na i tanoman in ma sorani, 

5:29 jadi mandarat ma, sihorjahon na madear puho hu hagoluhan, tapi sihorjahon na jahat puho bani uhum. (bd. 6:40.) 

5:30 Seng tarhorjahon Ahu atap aha pe humbani diringku sandiri, domu hubani na hubogei do panguhumhu, anjaha pintor do uhumhu, halani seng hupindahi rosuh ni uhurhu, rosuh ni na marsuruh Ahu do. (ay. 19; bd. 6:38.) 

5:31 Anggo Ahu manaksihon pasal diringku, seng na sintong hasaksiankai. 

5:32 Adong do na legan manaksihon Ahu, anjaha hubotoh sintong do hasaksianni ai pasal Ahu. (ay. 36; Mat. 3:17.) 

5:33 Domma isuruh nasiam na marayak si Johannes, anjaha domma isaksihon hasintongan ai. (bd. 1:19.) 

5:34 Ia Ahu, seng huporluhon hasaksian ni jolma, tapi husahapkon pe ai, andohar maluah nasiam. 

5:35 Palita na gara anjaha na marsinalsal do ia, anjaha marosuh do nasiam tongkin marmalas ni uhur ibagas sondangni ai. 

5:36 Adong do hasaksian bangku na surungan humbani si Johannes; ai horja, na niondoskon ni Bapa in Bangku, sidobhononku, in ma horja na hubahen in, in do manaksihon paboa na isuruh Bapa in do Ahu. (bd. 1:33; 3:2; 1 Joh. 5:9.) 

5:37 Anjaha Bapa na marsuruh Ahu pe isaksihon do Ahu. Seng ongga ibogei nasiam sorani, anjaha rupani pe seng ongga iidah nasiam. (Mat. 3:17.) 

5:38 Hatani pe seng marianan ibagas nasiam, ai seng porsaya nasiam bani na sinuruhni. 

5:39 Ipareksa nasiam do Surat in, ai jumpah nasiam do ijin, nini uhurnasiam, hagoluhan na sadokah ni dokahni. Surat in do tongon na manaksihon pasal Ahu. (Luk. 24:27; 2 Tim. 3:15-17.) 

5:40 Tapi seng ra nasiam roh hu-Bangku, ase dapotan hagoluhan nasiam. (bd. 6:35.) 

5:41 Seng hujalo hasangapon humbani jolma. (1 Tes. 2:6; Heb. 5:5.) 

5:42 Tapi hutanda do nasiam, seng dong holong dompak ELOHIM bani nasiam. 

5:43 Roh do Ahu ibagas goran ni Bapa, hape seng ijalo nasiam Ahu. Tapi anggo roh na legan ibagas goranni sandiri, ijalo nasiam do anggo ai. 

5:44 Sonaha ma tarbahen nasiam porsaya, ai marsijaloan sangap do nasiam samah nasiam; tapi anggo sangap na humbani ELOHIM na sasada in, seng ipindahi nasiam. (bd. 12:43.) 

5:45 Ulang ma iagan nasiam, Ahu mangaduhon nasiam bani Bapa in. Adong do na mangaduhon nasiam, ai ma si Musa, hatengeran ni uhurnasiam ai. (5 Mus. 31:26.) 

5:46 Ai ambit na porsaya nasiam bani si Musa, porsaya do nasiam age Bangku, ai pasal Ahu do isuratkon. (1 Mus. 3:15; 49:10; 5 Mus. 18:15.) 

5:47 Tapi anggo seng porsaya nasiam bani suratni, sonaha ma porsaya nasiam bani hatangku? (Luk. 16:31.)

0 komentar:

Posting Komentar