Sabtu, 28 Desember 2013

JAKOBUS 4

Jakobus 4


4:1 Hunja do roh ni parmunsuhon ampa partinggilon, na bani nasiam? Ai lang humbani hisap-hisap nasiam do, na marsilawanan ibagas pagorinasiam? (1 Ptr. 2:11.) 

4:2 Na marsura-sura do nasiam, tapi lang dapotan; mamunuh nasiam anjaha marsimburu, lanjar seng marulih nasiam. Na marsiimbangan do nasiam anjaha marporang, tapi seng dong bani nasiam, halani seng ipindo nasiam. 

4:3 Mangindo do namin nasiam, tapi seng manjalo, halani salah pangindonasiam, ai sihol parbois-boiskononnasiam do ai marhitei hisap-hisapnasiam. 

4:4 Nasiam parbangkis, ai lang ibotoh nasiam, ia parhuan-huanon dompak dunia on hamunsuhon dompak ELOHIM do in? Ase, na sihol huan-huan ni dunia on, ipajongjong do dirini gabe munsuh ni ELOHIM . (Luk. 6:26; Rom 8:7; 1 Joh. 2:15.) 

4:5 Atap iagan nasiam, gurou-gurou do na hinatahon ni Surat in: Parsimburu do Tonduy in, na dob ibahen marianan ibagas hita? (2 Mus. 20:3, 5; Mat. 6:24.) 

4:6 Tapi lambin bueini do idop ni uhur ibere. Halani ai do ase ihatahon: Ilawan ELOHIM do sigijang uhur, tapi ibere do idop ni uhur bani na toruh maruhur. (Mat. 23:12; 1 Ptr. 5:5.) 

4:7 Ai pe, ondoskon nasiam ma diri nasiam bani ELOHIM ; lawan nasiam ma sibolis in, jadi maporus ma ia humbani nasiam. (Ep. 6:12; 1 Ptr. 5:8, 9.) 

4:8 Padohor nasiam ma bani ELOHIM , jadi padohoronni ma bani nasiam.Paborsih nasiam ma tangannasiam, nasiam pardousa, anjaha papitah nasiam ma uhurnasiam, nasiam na mardua uhur! (Jes. 1:16; Sak. 1:3.) 

4:9 Marhoru ma nasiam, tangis anjaha doruh-doruh. Mubah ma tawanasiam gabe partangison, malas ni uhurnasiam gabe pusok ni uhur! 

4:10 Patoruh nasiam ma uhurnasiam ilobei ni Tuhan in, jadi pagijangonni ma nasiam. (1 Ptr. 5:6.) 

4:11 Ulang ma nasiam marsipahata-hataan, nasiam sanina! Barang ise na manghatai anjaha na manguhum-uhumi hasomanni, na manghatai anjaha na manguhum-uhumi titah in do ia ai. Tapi anggo iuhumi ham titah in, seng be sihorjahon titah in ham ai, tapi panguhum do. 

4:12 Sada do Sibere titah anjaha Panguhum, na boi paluahkon ampa mangagou. Tapi, ise ma ham, ase uhumonmu hasomanmu? (Mat. 7:1; Rom 2:1; 14:4.) 

4:13 Ee nasiam, na mangkatahon: Sadari on atap patar laho ma hanami hu kota ai, ase ijai hanami soh pala satahun on, martiga-tiga ampa mansari-sari. (Pod. 27:1.) 

4:14 Hape pasal ari patar pe seng ibotoh nasiam. Ai aha do goluhnasiam in? Usih do nasiam bani timus, na taridah tongkin, dob ai seng taridah be. (Luk. 12:20.) 

4:15 Gantih ni ai, sonon ma patut hatahononnasiam: Anggo marosuh Tuhan in anjaha manggoluh hanami, bahenonnami ma on atap ai. (Lah. 18:21.)

4:16 Hape mangenjeng do nasiam anjaha sombong; na jahat do pangenjengon na sonai ai. 

4:17 Ase, na mambotoh mambahen na madear, hape seng ihorjahon, na mardousa do ia ijai.(Luk. 12:47.)

0 komentar:

Posting Komentar