Sabtu, 28 Desember 2013

HEB 2

Heb 2


2:1 Halani ai, maningon lambin poltikni do panjolomta bani hata, na dob binogeita, ase ulang mayub hita. 

2:2 Hata, na hinatahon ni malekat, totap do, anjaha sagala panlanggaron ampa pangengkaron dapot pambalason na pintor. (Lah. 7:53; Gal. 3:19.) 

2:3 Tumaram ma boi maporus hita, anggo lansei hita bani haluahon na sain banggal? Tuhan in sandiri do manghatahon haluahon ai lobei, anjaha na mambogei ai manaksihon banta hasintonganni ai, (bd. 10:29; 12:25.) 

2:4 anjaha isaksihon ELOHIM ope ai marhitei tanda, halongangan, bagei-bagei ni hagogohon ampa Tonduy Na pansing, na binagihonni domu hubani rosuh ni uhurni. (Mrk. 16:20; 1 Kor. 12:4, 11.) 

2:5 Ai seng malekat ibahen ELOHIM panrajai bani dunia na sihol roh ai, ai ma dunia na sinahapkonta on. 

2:6 Tapi adong do isaksihon ibagas Surat in: Aha do jolma in, ase idingat Ham ia, barang anak ni jolma in, ase itatap Ham ia? (Ps. 8:5-7.) 

2:7 Ipatoruh Ham do ia tongkin toruhan marimbang malekat; hasangapon ampa hamuliaon do isortalihon Ham bani. 

2:8 Haganup do ipatunduk Ham hutoruh ni naheini. Marhitei na pinatundukni ai haganup hu-Bani, seng adong na tading ibahen, na so unduk hu-Bani; tapi anggo sonari, lang iidah hita ope, na dob tunduk hu-Bani haganup. 

2:9 Tapi Ia, na pinatoruh ai tongkin itoruh ni malekat, ai ma Jesus, iidah hita do marsortali hasangapon ampa hamuliaon, halani na dob itaron hamateian, ase marhitei idop ni uhur ni ELOHIM ihophop haganup marhitei hamateian na tinaronni ai, (Pil. 2:8, 9.) 

2:10 Ai patut do, Ia parmulaan ampa na mandobhon haganup, ibagas na sihol boanonni buei anak hu hasangapon, pajongjongonni gokan dear marhitei sitaronon pambobai in, na mamboan sidea hu haluahon. (Rom 11:36.) 

2:11 Ai Ia, na papansingkon ai ampa na pinapansingni ai, sada do harohanni haganup. Halani ai, seng maila Ia manggoran sidea saninani, (Mat. 25:40; Mrk. 3:34, 35; Joh. 20:17.) 

2:12 ai nini do: Ambilanhononku do goranmu hubani saninangku; itongah-tongah ni kuria in do dodinghononku Ham. (Ps. 22:23.) 

2:13 Dob ai use: "Ia do bahenonku hatengeran ni uhurhu". Ambah ni ai: "Ijon do Ahu ampa dakdanak in, na binere ni ELOHIM hubangku". (Jes. 8:17, 18.) 

2:14 Ase, songon dakdanak parrupei bani daging ampa daroh, sonai do homa Ia parrupei ijai, ase marhitei hamateian ai iparseda sibolis in, na markuasa bani hamateian, (ay. 17; Joh. 12:31; 2 Tim. 1:10.) 

2:15 ase ipaluah haganup na pinarjabolon ni biar bani hamateian, sadokah manggoluh. 

2:16 Ai sedo malekat na sinarihonni, tapi ginompar ni si Abraham do. 

2:17 Halani ai maningon gabe dos do Ia pakon saninanin pasal haganup, ase gabe paridop ni uhur Ia ampa Sintua ni malim hatengeran ni uhur ilobei ni ELOHIM , laho pasaloseihon dousa ni bangsa in.(Pil. 2:7.) 

2:18 Ai, halani dob marsitaronon Ia anjaha tarlajou, margogoh do Ia mangurupi sagala na tarlajou. (bd. 4:15.)

0 komentar:

Posting Komentar