Jumat, 27 Desember 2013

GALATIA 6

Galatia 6


6:1 Nasiam sanina, anggo dong tardapot halak ibagas sada panlanggaron, nasiam na marpartonduyon ma patorsa-torsahonsi marhitei tonduy halamlamon, tapi jaga dirimu, ase ulang dihut ham tarlajou. (Mat. 18:15; Jak. 5:19.) 

6:2 Marsiurupan ma nasiam, mamorsan na borat in, ai marhiteihon ni in idalankon nasiam do titah ni Kristus. (Rom 14:1.) 

6:3 Ai anggo ipajuntul-juntul halak dirini, hape aha pe lang ia, na paoto-otohon dirini do ai. 

6:4 Tapi ganup ma mamareksa horjani bei; jadi halani dirini tumang ma ia mamuji-muji diri, sedo halani na legan, (2 Kor. 13:5.) 

6:5 ai ganup do adong siporsanonni bei. (Rom 14:12; 2 Kor. 5:10.) 

6:6 Tapi patut do na niajaran bani hata ni ELOHIM mambere humbani sagala artani bani na mangajarisi. (1 Kor. 9:14.) 

6:7 Ulang ma kahou nasiam, seng ra ELOHIM apasan! Ai ia in itidahkon halak, ai do sabionni. 

6:8 Na manidahkon bani dagingni, manabi do humbani dagingni hamagouan; tapi na manidahkon bani tonduy, manabi do humbani tonduy hagoluhan sisadokah ni dokahni.(Rom 8:13.) 

6:9 Tapi ulang ma marnaloja hita mambahen na madear, ai na manabi do use hita bani panorangni, anggo seng gabe galek hita sonari. (2 Tes. 3:13.) 

6:10 Ai pe, halani sompat ope, horjahon hita ma na madear bani haganup halak, tapi bueinan bani hasomanta sahaporsayaon. (2 Ptr. 1:7.) 

6:11 Tonggor nasiam ma, sonaha banggal-banggal ni huruf na husurat bani nasiam marhitei tanganku sandiri. 

6:12 Haganup na marsura-sura sangap bani pardagingon, ai do na mamaksa nasiam ase tarsunat, pitah, ase ulang marsitaronon sidea halani silang ni Kristus. (bd. 5:11; Pil. 3:18.) 

6:13 Ai gari sidea, siparsunat ai, seng idalankon titah in, tapi ihasiholhon sidea do, ase tarsunat nasiam, ase boi sidea mamuji diri marhitei dagingnasiam. 

6:14 Tapi daoh ma humbangku na mamuji diri, anggo lang halani silang ni Tuhan Jesus Kristus! Marhiteihonsi domma tarsilang dunia on bangku, anjaha ahu bani dunia on. (1 Kor. 1:31; 2:2.) 

6:15 Atap na marsunat atap na so marsunat, seng dong age aha artini ai, tapi na tinompa na baru ai do. (bd. 5:6; 1 Kor. 7:19.) 

6:16 Anjaha haganup na marparlahouhon ruhut sisonai ai, damei ampa idop ni uhur ma bani sidea, sonai homa bani Israel ni ELOHIM . 

6:17 Hu lobeian on ulang adong be na manlojai ahu, ai hupaboan-boan do tanda ni ugah ni Jesus bani angkulangku. (2 Kor. 4:10.) 

6:18 Idop ni uhur ni Tuhanta Jesus Kristus ma mangkasomani tonduynasiam, nasiam sanina! Amen.

0 komentar:

Posting Komentar