Jumat, 27 Desember 2013

GALATIA 4

Galatia 4


4:1 Tapi on do na huhatahon: Sadokah danak ope panean in, seng dong leganni humbani jabolon, age pe ia tuan simada haganup, 

4:2 tapi itoruh ni kuasa ni sipanramoti ampa sijolom anakkunsi do ia, das bani panorang, na tinontuhon ni bapani hinan. 

4:3 Sonai do homa hita: Sadokah danak hita, iparjabolon kuasa ni unsur-unsur ni dunia on do hita. (bd. 3:23; 5:1; Kol. 2:20.) 

4:4 Tapi dob gok panorangni, isuruh ELOHIM ma Anakni, tubuh humbani naboru, ginomgoman ni titah,(Ep. 1:10.) 

4:5 ase itobus na ginomgoman ni titah in, ase ijalo hita hak haanakon. (bd. 3:13.) 

4:6 Tapi halani anak nasiam, isuruh ELOHIM do hubagas uhurta Tonduy ni Anakni in, na mandilohon: Abba, Bapa! (Rom 8:15.) 

4:7 Ase, seng be jabolon ham, tapi anak do. Tapi anggo anak, lanjar panean ma, marhitei ELOHIM . (bd. 3:29; Rom 8:16, 17.) 

4:8 Tapi ijia, sanggah lape itandai nasiam ELOHIM , ibalosi nasiam do ELOHIM -ELOHIM , na so ELOHIM mangihutkon hadirionni. 

4:9 Tapi sonari, domma itanda nasiam ELOHIM , atap sasintongni, ELOHIM do na mananda nasiam. Mase ma nasiam marbalik use, mulak hubani kuasa ni unsur-unsur na so margogoh anjaha na lumei, ase balosannasiam ai use? 

4:10 Gabe siramotkon ari, bulan, panorang na tinontuhon pakon tahun do nasiam. (Rom 14:5; Kol. 2:16.) 

4:11 Mabiar do uhurhu pasal nasiam, atap na soya do halojaonku manghophop nasiam. (2 Joh. 8.) 

4:12 Nasiam sanina, hupindo ma bani nasiam, songon ahu ma nasiam, ai ahu pe songon nasiam do. Seng ongga na so pintor ibahen nasiam bangku. (2 Kor. 2:5.) 

4:13 Tapi ibotoh nasiam do, ibagas hagalekon ni daging do huboan ambilan na madear bani nasiam bani mulani ondi. (Lah. 16:6; 1 Kor. 2:3.) 

4:14 Anjaha sanggah na tarlajou nasiam halani pardagingonku, seng magigi barang mapas uhurnasiam pasal ai, tapi songon malekat ni ELOHIM do ijalo nasiam ahu, songon Kristus Jesus do tene. 

4:15 Ija do nuan hatuahonnasiam in? Ai husaksihon ma bani nasiam, sihol buatonnasiam do ijia matanasiam, laho mambere ai bangku, ambit na tarbahen. 

4:16 Ai na gabe imbangnasiam do ahu, halani huhatahon bani nasiam hasintongan? (Ams. 5:10.)

4:17 Seng pitah haringgason ni sidea ai bani nasiam, tapi sihol padaraton ni sidea do nasiam, ase ringgas nasiam manghophop sidea. (bd. 1:7.) 

4:18 Dear do tongtong marringgas ni uhur nasiam dompak na madear, anjaha ulang ma pitah sanggah i lambungnasiam ahu. 

4:19 Nasiam niombahku, na dob huarou use, paima manjadi rupa ni Kristus ibagas nasiam. (1 Kor. 4:15.) 

4:20 Iparsinta uhurhu do, ase itongah-tongahnasiam ahu sonari, anjaha tarpadear-dear ahu sorangku, ai jut do uhurhu pasal nasiam. 

4:21 Nasiam na marosuh gomgoman ni titah in, hatahon nasiam ma bangku: Ai lang domma ibogei nasiam titah in? (ay. 9; 3:23.) 

4:22 Tarsurat do ijai: Dua do anak ni si Abraham, sada humbani jabolonni naboru anjaha na sada nari humbani boru mardeka ai. (1 Mus. 16:15; 21:2.) 

4:23 Tapi mangihutkon daging do partubuh ni na humbani boru jabolon ai, tapi humbani bagah-bagah do na humbani boru mardeka ai. (Rom 9:7-9.) 

4:24 Limbaga na mararti do in. Ai padan na dua in do sidea: Na sada hun dolog Sinai, na manubuhkon anak gabe jabolon, ai ma si Hagar. (bd. 5:1; Rom 8:15.) 

4:25 Ai Hagar ai ma dolog Sinai i tanoh Arab, anjaha usih ma ai bani Jerusalem sisonari, ai jabolon do ai rap pakon niombahni. 

4:26 Tapi Jerusalem na iatas ai, ai do boru mardeka ai, anjaha ai do inang banta. (Heb. 12:22.) 

4:27 Ai tarsurat do: Marmalas ni uhur ma ho na lambang, na so tubuhan tuah; marolob-olob ma ho anjaha marsora na gogoh, na so mangarou anak. Ai buei do niombah ni na punjung in, bueinan humbani na marparamangon. (Jes. 54:1.) 

4:28 Tapi nasiam sanina, anak bagah-bagah do nasiam mangihuthon si Isak. (Rom 9:7, 10.) 

4:29 Tapi ijia age sonari, iparburu na tubuh mangihutkon daging do na tubuh mangihutkon Tonduy. (1 Mus. 21:9; 2 Tim. 3:12.) 

4:30 Tapi aha do nini Surat in? Usir ma boru jabolon in rap pakon anakni, ai seng bulih anak ni boru jabolon in rap manean pakon anak ni boru mardeka in. (1 Mus. 21:10, 12.) 

4:31 Ase, nasiam sanina, sedo anak ni boru jabolon hita, tapi anak ni boru mardeka do. (bd. 3:29.)

0 komentar:

Posting Komentar