Jumat, 27 Desember 2013

EPESUS 3

Epesus 3


3:1 Halani ai, ahu si Paulus, na tarrantei halani Kristus Jesus, halani nasiam sipajuh begu-begu. 

3:2 Tontu domma ibogei nasiam pasal jabatan mandalankon idop ni uhur ni ELOHIM , na dob pinadasni ai hubangku, laho paturei-tureihon nasiam. 

3:3 Marhitei pangungkabon do ipabotohkon bangku rusia ai, songon na dob husuratkon hinan otik pasal ai. (bd. 1:9, 10.) 

3:4 Bani na mambasa ai, boi ma botohonnasiam sonaha pangarusionku bani rusia ni Kristus. 

3:5 Seng ipabotohkon ope ai bani anak ni jolma bani sundut sapari, tapi domma ipatalar ai nuan bani apostelni na pansing in ampa nabi-nabini, ibagas Tonduy, (Kol. 1:26.) 

3:6 paboa dihut halak sipajuh begu-begu hasoman panean anjaha hasoman saangkula anjaha hasoman parrupei bani bagah-bagah na ibagas Kristus Jesus, marhitei ambilan na madear in. (bd. 2:13, 18, 19.) 

3:7 Na dob gabe siparugas ni ai do ahu, domu hubani idop ni uhur na binere ni ELOHIM hubangku, domu hubani pangkorhon ni hagogohon ni ai. 

3:8 Hubangku, sietekan humbani haganup halak na mapansing in, ibere idop ni uhur on, ai ma mangambilankon bani sipajuh begu-begu habayakon ni Kristus, na so tardadap in, (bd. 1:7; 1 Kor. 15:9, 10; Gal. 1:10.) 

3:9 anjaha patorangkon sonaha dalan parsaud ni rusia ai, na ponop humbani mulani ibagas ELOHIM , Sitompa haganup, (Rom 16:25; Kol. 1:16.) 

3:10 ase ipatandahon ma sonari, marhitei kuria in, buei ni masam ni hapentaron ni ELOHIM bani sipanrajai anjaha na markuasa i nagori atas, (Rom 11:33; 1 Ptr. 1:12.) 

3:11 domu hubani na sinurahon-Ni humbani mula ni mulani, gabe ipasaud ibagas Kristus Jesus, Tuhanta in. (bd. 1:11.) 

3:12 Marhiteihonsi jumpah hita do hinsah ni uhur ampa dalan masuk ibagas tenger ni uhur halani haporsayaon Bani. (Joh. 14:6; Rom 5:2; Heb. 4:16.) 

3:13 Halani ai, hupindo ma bani nasiam, ase ulang mandolei nasiam mangidah sitarononku, na manghopkop nasiam, ai hasangaponnasiam do in. (Kol. 1:24.) 

3:14 Halani ai, manrogop do ahu ilobei ni Bapa in. 

3:15 Marpanggorani hu-Bani do sagala bapa ni bangsa-bangsa, na i nagori atas age nai tanoh on, 

3:16 ase, domu hubani habayakon ni hasangaponNi in, ibere gogoh ampa kuasa marhitei Tonduyni bani jolma parbagas nasiam, (bd. 1:7; 6:10.) 

3:17 ase marianan Kristus marhitei haporsayaon ibagas uhurnasiam, gabe totap nasiam marurat anjaha maronjolan bani holong,(Joh. 14:23; Kol. 2:7.) 

3:18 ase boi nasiam rap pakon haganup halak na pansing in mangarusi sonaha ganjangni ampa bolagni, bagasni ampa gijangni, 

3:19 anjaha mananda holong ni uhur ni Kristus, na mangatasi sagala pangarusion, ase das ma bani nasiam haganup hagogok ni ELOHIM . 

3:20 Tapi tarbahen-Si do lobih humbani na pinindonta barang na piningkiranta, domu hubani hagogohon na marhorja ibagas hita. 

3:21 Bani ma hasangapon ibagas kuria in ampa ibagas Kristus marsundut-sundut ronsi sadokah ni dokahni Amen.

0 komentar:

Posting Komentar