Sabtu, 28 Desember 2013

2 TESSALONIKA 2

2 Tessalonika 2


2:1 Tapi anggo pasal parroh ni Tuhanta Jesus Kristus ampa pardasta hubani, mangindo ma hanami, bani nasiam sanina, (1 Tes. 4:13-17.) 

2:2 ase ulang urah idugur nasiam humbani totap ni paruhuron, anjaha rusak ibahen marhitei tonduy ni sipartonduy atap hata, barang marhitei surat na ihatahon roh humbannami, na patugahkon, paboa na dob roh do ari ni Tuhan in. 

2:3 Ulang ma adong na paoto-otohon nasiam atap marhitei aha pe. Ai seng anjai roh ari ai, anggo seng masa lobei parbalikon, anjaha ipatalar jolma na so parduli bani titah in, ai ma anak hamagouan ai, (1 Tim. 4:1; 1 Joh. 2:18; 4:3.) 

2:4 na manlawan anjaha na pabangkit dirini dompak haganup na targoran ELOHIM ampa sisombahon, na pahundul dirini i rumah ni ELOHIM , na maningtingkon, paboa ia do ELOHIM . (Dan. 11:36.) 

2:5 Ai lang idingat nasiam, na dob hupatugah in hinan, sanggah rap ope ahu pakon nasiam? 

2:6 Ambahni ai, ibotoh nasiam do, aha na mangambatsi nuan, paima roh panorangni patalaron ia. 

2:7 Ai domma marhorja nuan gogoh ni rusia ni hajahaton ai, paima ipadaoh na mangambatsi nuan. (Lah. 20:29.) 

2:8 Dob ai pe ase patalaron siparjahat ai, tapi ripashonon ni Tuhan Jesus ma ia marhitei hosah ni pamanganni, anjaha siaphononni ma ia talarhonsi Ia bani parrohni ai. (Jes. 11:4; Pangk. 19:15, 20.) 

2:9 Humbani kuasa ni sibolis do parroh ni parjahat ai, marhasoman haganup bagei ni hagogohon ampa tanda ampa halongangan ladung, (Mat. 24:24; Pangk. 13:11-13.) 

2:10 ambahni ai marhasoman haganup bagei ni hajahaton sipaoto-oto bani halak na laho magou, halani lang ijalo sidea holong na humbani hasintongan in, ase maluah namin sidea. (2 Kor. 2:15; 14:3.) 

2:11 Halani ai isuruh ELOHIM do bani sidea tonduy na pakahouhon, ase porsaya sidea bani ladung, (Rom 1:28; 2 Tim. 4:4.) 

2:12 ase hona uhum sagala na so porsaya bani hasintongan in, na marosuh bani hagedukon. 

2:13 Tapi na patut do hanami manghatahon tarima kasih tongtong bani ELOHIM halani nasiam, sanina na hinaholongan ni Tuhan in, ai ipilih ELOHIM do nasiam humbani mulani, ase saud nasiam maluah marhitei pangurasion ni Tonduy in ampa haporsayaon bani hasintongan in. (bd. 1:3, 4; Ep. 1:4.) 

2:14 Ai hujai do nasiam idilo marhitei ambilan na madear, na niambilankonnami, ase parrupei nasiam bani hasangapon ni Tuhan Jesus Kristus. 

2:15 Ase nasiam sanina, totap ma nasiam jongjong anjaha marsijoloman bani podah, na niajarhonnami bani nasiam, marhitei hata atap surat pe. (bd. 3:6.) 

2:16 Ase Tuhanta Jesus Kristus pakon ELOHIM Bapanta, na mangkaholongi hita anjaha na mambere banta apoh-apoh na manongtong ampa pangarapan na madear marhitei idop ni uhur, 

2:17 Ia ma mangapohi anjaha patotaphon uhurnasiam bani sagala horja ampa hata na madear.

0 komentar:

Posting Komentar