Sabtu, 28 Desember 2013

2 TESSALONIKA 1

2 Tessalonika 1


1:1 Humbani si Paulus, si Silpanus, ampa si Timoteus, hubani kuria Tessalonik, na ibagas ELOHIM Bapanta ampa Tuhan Jesus Kristus. (1 Tes. 1:1.) 

1:2 Idop ni uhur ma bani nasiam ampa damei humbani ELOHIM Bapanta ampa Tuhan Jesus Kristus. (Rom 1:7.) 

1:3 Patut tumang do hanami, nasiam sanina, tongtong mangkatahon tarima kasih bani ELOHIM halani nasiam. Patut do sonai, ai lambin ganda tumang do haporsayaonnasiam, anjaha martambah do holong ni uhur ni ganup nasiam samah nasiam. (bd. 2:13; 1 Tes. 1:2, 3.) 

1:4 Hanami sandiri mamuji-muji dirinami halani nasiam ilobei ni ganup kuria ni ELOHIM , halani hatotapon ampa haporsayaonnasiam ibagas sagala parburuon ampa hamarsikon, na tinaronnasiam. (2 Kor. 7:4.) 

1:5 In ma na patandahon pintor ni paruhuman ni ELOHIM , gabe talup nasiam ihira masuk hu harajaon ni ELOHIM ; halani ai do manaron nasiam nuan. (Luk. 21:36; Pil. 1:28.) 

1:6 Pintor do in tongon, nini uhur ni ELOHIM , mambalaskon hamarsikon bani na mangarsik-arsik nasiam, (Pangk. 18:6, 7.) 

1:7 tapi hasonangan bani nasiam, na niarsik-arsik, rap pakon hanami, bani partalar ni Tuhan Jesus tuad hun nagori atas rap pakon malekat ni hagogohonni, (Mat. 25:31.) 

1:8 ibagas apuy na marjilam-jilam, laho mandabuh uhum bani na so mananda ELOHIM , anjaha na so ra mambalosi ambilan na madear ni Tuhanta Jesus. (Rom 2:8.) 

1:9 Hona uhum ma sidea, ai ma hamagouan sisadokah ni dokahni, humbani bohi ni ELOHIM ampa humbani hasangapon ni hagogohonni, (Jer. 2:10, 19.) 

1:10 sanggah roh Ia bani ari ai, ase marsangap Ia humbani na mapansingni anjaha longang sagala na porsaya bani, ai porsaya do nasiam tongon bani hasaksian na binoannami bani nasiam. (Kol. 3:4.) 

1:11 Jadi martonggo do hanami tongtong pasal nasiam, ase ELOHIM nta ma na patalup nasiam domu hubani pandiloonni ai, anjaha ipasaud ma ganup sura-sura na madear ampa ganup horja haporsayaon marhitei hagogohonni, 

1:12 ase marsangap ma goran ni Tuhanta Jesus Kristus ibagas nasiam, sonai homa nasiam ibagas Ia, domu hubani idop ni uhur ni ELOHIM nta ampa Tuhan Jesus Kristus.

0 komentar:

Posting Komentar