Jumat, 27 Desember 2013

2 KORINT 2

2 Korint 2


2:1 Domma hupaputus ibagas uhurhu, na so ulakanku be roh bani nasiam ibagas pusok ni uhur. (bd. 12:21; 1 Kor. 4:21.) 

2:2 Ai anggo hupusoki uhurnasiam, ise ma na boi pamalas uhurhu, ai lang na hupusoki in do? 

2:3 Anjaha husurat pe on, ase ulang, anggo roh ahu, marpusok ni uhur ahu humbani na patut pamalas uhurhu; ai tenger do uhurhu bani nasiam haganup, paboa malas ni uhurhu, malas ni uhurnasiam do homa ai. (1 Kor. 5.) 

2:4 Ai ibagas buei sitaronon ampa pusok ni uhur do hubahen surat on bani nasiam, marhasoman buei iluh-iluh, sedo ase pusok uhurnasiam, tapi ase ibotoh nasiam do holong ni uhurhu na tarlobih in bani nasiam. 

2:5 Tapi na mambahen pusok ni uhur ai, sedo ahu tumang pinusokanni, tapi hinaotikni, ase ulang salputu parsahaphu, nasiam haganup do tene. (1 Kor. 5:1.) 

2:6 Sungkup ma bani halak sisonai ai pinsang-pinsang humbani halak simbuei. 

2:7 Tapi suharni ai, dearan ma sasap nasiam salahni, anjaha apoh nasiam ma ia, ase ulang ibondut pusok ni uhur na tarlobih in ia. 2:8 Halani ai huojur ma nasiam, manotapkon holong ni uhur bani. 

2:9 Lanjar in do tujuan ni surathu bani nasiam, laho manguji nasiam, ase hubotoh atap pambalosi do nasiam bani haganup. 

2:10 Barang ise na dob isasap nasiam salahni, ahu pe husasap do. Anjaha ahu pe, barang aha na husasap, halani nasiam do husasap ai, ilobei ni Kristus, (Luk. 22:31.) 

2:11 ase ulang iakali sibolis in hita, ai sedo na so ibotoh hita uhurni ai. (Luk. 22:31.) 

2:12 Tapi dob das ahu i Troas, laho mangambilankon ambilan na madear ni Kristus, mungkab do labah bangku ibagas Tuhan in, (Lah. 14:27; 1 Kor. 16:9.) 

2:13 tapi seng sonang uhurhu, halani seng jumpah ahu si Titus, sanina in ijai. Jadi mamuhun ma ahu hubani sidea, anjaha laho ma ahu hu Makedonia. (Lah. 20:1.) 

2:14 Tapi tarima kasih ma bani ELOHIM , na tongtong manogu-nogu hanami ibagas hamonanganni marhitei Kristus, anjaha ipatalar do misbou ni habotohon pasalsi marhitei hanami bani haganup ianan. 

2:15 Ai uap na misbou ni Kristus do hanami ilobei ni ELOHIM bani halak na maluah, age bani halak na laho magou, (1 Kor. 1:18.) 

2:16 bani na deba ai uap hamateian hu hamateian, bani na deba nari uap hagoluhan hu hagaluhon. Anjaha ise do na talup hujai? (bd. 3:5, 6; Luk. 2:34.) 

2:17 Ai seng usih hanami songon na mabuei in, na mambuat untung bani diri sandiri marhitei hata ni ELOHIM , tapi humbani pitah ni uhur do, sinuruh ni ELOHIM , ihatahon hanami in ilobei ni ELOHIM , ibagas Kristus. (bd. 1:12.)

0 komentar:

Posting Komentar