Jumat, 27 Desember 2013

2 KORINT 13

2 Korint 13


13:1 Patoluhalihon ma ahu roh sonari marayak nasiam. Sipaputuson do sagala parsahapan marhitei hasaksian ni dua atap tolu halak saksi. (5 Mus. 19:15; 1 Tim. 5:19.) 

13:2 Songon na dob hupatugah bani parrohku paduahalihon ijia, sonai age sonari, age pe lang ijin ahu, ahu patugahkon use bani sidea, na mardousa hinan, sonai homa bani haganup halak na legan, paboa rohhonsi ahu holi, seng maralang-alang ahu atap bani ise pe. 

13:3 Ipangindo nasiam do tene tanda, atap na tongon do marsahap Kristus marhitei ahu, na seng galek bani nasiam, tapi marhagogohon do itongah-tongahnasiam. 

13:4 Ai tarsilang pe Ia halani hagalekon, tapi manggoluh do Ia marhitei hagogohon ni ELOHIM . Anjaha hanami pe galek do ibagas Ia, tapi manggoluh do rap pakonsi marhitei hagogohon ni ELOHIM itongah-tongahnasiam. (Pil. 2:7, 8.) 

13:5 Lajou nasiam ma dirinasiam, atap na ibagas haporsayaon do nasiam, pareksa nasiam ma dirinasiam. Ai na so ibotoh nasiam do bani dirinasiam, paboa na ibagas nasiam do Jesus Kristus? Anggo lang, na so talup ma nasiam. (1 Kor. 11:28.) 

13:6 Tapi arap do uhurhu, botohonnasiam do, paboa sedo na so talup hanami. 

13:7 Tapi martonggo do hanami bani ELOHIM , ase ulang ihorjahon nasiam na jahat, sedo ase talup hanami idahon, tapi ase ihorjahon nasiam do na madear, hanami na songon na so talup idahon. 

13:8 Ai seng adong gogohnami mangimbang hasintongan in, tapi manghophop hasintongan in do. 

13:9 Ai malas do uhurnami anggo galek hanami, tapi margogoh ia nasiam. Lanjar in do tonggonami, ase lambin toguh uhurnasiam. 

13:10 Husurat do on, sanggah holang ope ahu, ase ulang rohkonsi ahu, koras ahu mamakei kuasa na binere ni Tuhan in bangku. laho pauli-ulihon, sedo laho parsedahon. (bd. 11:8.) 

13:11 Ambah ni ai, nasiam sanina, malas ma uhur nasiam, sai ra ma nasiam patorsaon, sai ra ma nasiam palumbaon, sauhur ma nasiam, sai mardamei ma nasiam, anjaha ihasomani ELOHIM parholong anjaha pardamei in ma nasiam. (Rom 15:33; Pil. 4:4.) 

13:12 Marsitabian ma nasiam marhitei summah na mapansing. (1 Kor. 16:20.) 

13:13 Idop ni uhur ni Tuhanta Jesus kristus ampa holong ni uhur ni ELOHIM pakon parsaoran ni Tonduy Na pansing ma manghasomani nasiam haganup!(Rom 5:5; Gal. 6:18.)

0 komentar:

Posting Komentar