Jumat, 27 Desember 2013

2 KORINT 1

2 Korint 1


1:1 Humbani si Paulus, apostel ni Kristus Jesus, marhitei rosuh ni ELOHIM , pakon si Timoteus, sanina ni, humbani kuria ni ELOHIM , na i Korint, ampa hubani haganup halak na mapansing, na i sab Akaya. (1 Kor. 1:1.) 

1:2 Idop ni uhur ma bani nasiam ampa damei humbani ELOHIM Bapanta ampa humbani Tuhan Jesus Kristus. (Rom 1:7.) 

1:3 Puji-pujian ma bani ELOHIM , Bapa ni Tuhan Jesus Kristus, Bapa paridop ni uhur ampa ELOHIM sipangapoh in, (Rom 15:5.) 

1:4 na mangapoh hanami ibagas sagala sitarononnami, ase tarapoh hanami hasoman na ibagas bagei ni sitaronon, hinorhon ni apoh-apoh na jinalonami sandiri humbani ELOHIM . 

1:5 Ai songon surung ni sitaronon ni Kristus sogop bannami, sonai do homa surung ni pangapohon bannami marhitei Kristus. (Ps. 34:20; 94:19; Kol. 1:14.) 

1:6 Ia marsik pe iahap hanami, bahen apoh-apoh ampa huluahon do in bani nasiam; ia tarapoh hanami, gabe apoh-apoh bani nasiam do in, ase margogoh nasiam manaron sitarononnasiam, na dos songon tinaronnami. (bd. 4:15, 17.) 

1:7 Anjaha pangarapannami pasal nasiam totap do, ai ibotoh hanami: Songon na dihut nasiam parrupei bani sitaronon, sonai do homa bani apoh-apoh. 

1:8 Ai seng marosuh hanami, nasiam sanina, lang ibotoh nasiam sitaronon na mangonai bannami i Asia borat tumang, lobih humbani na tarporsan, pala putus ma pangarapannami manggoluh. (Lah. 19:23; 1 Kor. 15:32.) 

1:9 Tongon, matei mando hanami nini uhurnami, ase ulang dirinami ihatengerhon hanami, tapi ELOHIM ma, sipuhoi na dob matei. 

1:10 Ia do na paluahkon hanami humbani hamateian, anjaha paluahonni ope, anjaha tenger do uhurnami Bani, paluahonni do age hunjon-hunjanan, (2 Tim. 4:18.) 

1:11 marhitei na iurupi nasiam homa hanami marhitei tonggo, andohar buei hasoman na manghatarima-kasihkon idop ni uhur na jinalonami, pangkorhon ni tonggo ni sidea na buei ai. 

1:12 On do onjolan ni puji-pujiannami: Isaksihon panggora ni uhurnami do, na marparlahou hanami ilobei ni dunia on, tarlobih ma ilobeinasiam, ibagas hapansingon ampa hapolinon na humbani ELOHIM , sedo ibagas hapentaron pardagingon, tapi ibagas idop ni uhur ni ELOHIM do. (bd. 2:17; Heb. 13:18.) 

1:13 Ai seng legan arti ni suratnami humbani na binasa ampa na niarusannasiam. Anjaha huarapkon do, ase gok ma pangarusionnasiam, 

1:14 songon na dob mamungkuh iarusi nasiam hanami, paboa hanami do puji-pujian bani nasiam anjaha nasiam puji-pujian bannami bani ari ni Tuhanta Jesus. (bd. 5:12; Pil. 2:16.) 

1:15 Mangunsagahkon in, adong hinan do sura-surangku marayak nasiam, ase lompit idop ni uhur jaloonnasiam, 1:16 Sihol tuluy do ahu hubani nasiam laho hu Makedonia, anjaha dob hun Makedonia, mulak use bani nasiam, ase nasiam paingkathon ahu laho hu judea. (1 Kor. 16:5, 6.) 

1:17 Marhampung ni uhur do ahu mansura-surahon in? Atap marguru hubani daging do sura-surangkin, gabe rap jumpah bangku hata eak ampa hata lang? 

1:18 Tapi songon ELOHIM hatengeran ni uhur, seng marhata eak anjaha marhata lang hanami bani nasiam. 

1:19 Ai Jesus Kristus, Anak ni ELOHIM , na iambilankon hanami bani nasiam, ai ma ahu, si Siluanus ampa si Timoteus, seng rap dong Bani hata eak ampa hata lang, tapi hata eak do hansa adong Bani. 

1:20 Ai sagala bagah-bagah ni ELOHIM marhiteihonSi do ai saud. Halani ai marhiteihonSi do hita mangkatahon Amen, bahen hasangapon ni ELOHIM .(Pangk. 3:14.) 

1:21 Tapi ELOHIM do na patotapkon hanami pakon nasiam ibagas Kristus, anjaha iminaki do hanami. (1 Joh. 2:27.) 

1:22 Lanjar Ia do mambahen lak bannami, anjaha ibere do Tonduyni hubagas uhurnami songon jaminan. (bd. 5:5; Rom 8:16; Ep. 1:13, 14.) 

1:23 Tapi ELOHIM do hudilo saksi bani tonduyhu, halani manimbangi nasiam do, ase lang roh ope ahu hu Korint. (bd. 11:31; Rom 1:9.) 

1:24 Ai sedo na laho manrajai haporsayaonnasiam hanami, tapi hasoman parhorja do hanami bani malas ni uhurnasiam, ai na dob jongjong do nasiam ibagas haporsayaon. (1 Ptr. 5:3.)

0 komentar:

Posting Komentar