Sabtu, 28 Desember 2013

1 TIMOTEUS 2

1 Timoteus 2


2:1 Ai pe on do sipaingathu parlobei humbani haganup. Sihol ma dalanhononkon pangindoan, partonggoon, pangapition ampa hatarimakasihon manghophop haganup jolma, (Pil. 4:6.) 

2:2 manghophop raja-raja ampa haganup siparkuasa, ase boi hita sonang anjaha mardamei-damei manggoluh, daulat anjaha hormat ibagas haganup. 

2:3 Dear do in, anjaha harosuh ni Sipaluah hita, ai ma ELOHIM , (bd. 1:1; 4:10.) 

2:4 na mangkarosuhkon, ase haganup jolma maluah anjaha das mananda hasintongan in. (Hes. 18:23; 2 Ptr. 3:9.) 

2:5 Ai sada do ELOHIM , anjaha sada do siholang ni ELOHIM pakon jolma, ai ma jolma Kristus Jesus in,(Rom 3:29, 30; Heb. 12:24.) 

2:6 na mamberehon dirini gabe tobus manghophop haganup; in ma sisaksihononkon bani panorang na dearhonsi.(Gal. 1:4; 2:20; Tit. 2:14.) 

2:7 Hujin do ahu ipabangkit gabe parambilan ampa apostel, guru bani sipajuh begu-begu ibagas haporsayaon ampa hasintongan; sintong do hatangku, seng marladung ahu. (Gal. 3:7, 8; 2 Tim. 1:11.) 

2:8 Ai pe iparsinta uhurhu do, sihol ma martonggo sagala dalahi bani ganup ianan, manombahkon tangan na pansing, ulang ibagas ringis atap paringoran. 

2:9 Anjaha naboru-naboru pe, hormat anjaha bulus ma pamakeini, ulang ma marjambulan na marpanjagar na malobihtu, barang irungkub dirini bani omas atap mata intan atap pakeian-pakeian na maharga-maharga, (1 Ptr. 3:3-5.) 

2:10 tapi marhitei pambahenan na madear ma, songon na patut bani naboru, na mangaku, na daulat ia ilobei ni ELOHIM . (bd. 5:10.) 

2:11 Masip ma naboru ibagas na marguru, marunduk ni uhur tumang. (Ep. 5:22.) 

2:12 Seng hulopas naboru mangajari barang manrajai dalahi, tapi sip ma ia. (1 Mus. 3:16; 1 Kor. 14:34.) 

2:13 Ai parlobei do si Adam itompa, dob ai pe ase si Hawa; (1 Mus. 1:27; 2:7, 22.) 

2:14 anjaha sedo si Adam hona paoto-oto; naboru ai do hona paoto-oto, gabe manlanggar. (1 Mus. 3:6; 2 Kor. 11:3.) 

2:15 Tapi maluah do ia marhitei na mantubuhkon anak, anggo totap ia ibagas haporsayaon ampa holong pakon hapansingon marhasoman hahormaton.

0 komentar:

Posting Komentar