Sabtu, 28 Desember 2013

1 TESSALONIKA 2

1 Tessalonika 2


2:1 Ai ibotoh nasiam sandiri do, nasiam sanina, na so soya parrohnami bani nasiam. (bd. 1:5, 9.) 

2:2 Ai age pe marsitaronon hinan anjaha hona arsik hanami i Pilippi, songon na binotohnasiam, marhinsah ni uhur do hanami ibagas ELOHIM , mangambilankon bani nasiam ambilan na madear na humbani ELOHIM , ibagas buei parlawanan. (Lah. 16:22; 17:5.) 

2:3 Ia pamodahionnami, sedo ibagas hakahouon ai barang hasipakulah-kulahon barang akal-akal, 

2:4 tapi songon na dob niakuhon ni ELOHIM hanami gabe haondosan ni ambilan na madear in, sonai do ihatahon hanami, sedo ase harosuh hanami bani jolma, tapi bani ELOHIM do, siuji uhurnami. (Gal. 1:10; 1 Tim. 1:11.) 

2:5 Ai seng ongga hanami marhata lemes-lemes, songon na binotohnasiam, barang marakal-akal laho mambuat arta, ELOHIM do saksi pasal ai; (Lah. 20:33.) 

2:6 barang mangindahi sangap hanami humbani jolma, atap humbani nasiam, atap humbani na legan pe, age pe songon apostel ni Kristus boi hanami namin marhatunggungon, (Joh. 5:41, 44.) 

2:7 Tapi basar do hanami itongah-tongahnasiam songon parinangon patorsa-torsa niombahni. 

2:8 Sonai ma, halani masihol hanami bani nasiam, ihamalashon uhurnami do mamberehon bani nasiam, sedo pitah ambilan na madear in, tapi dihut do hosahnami, halani na dob holong uhurnami bani nasiam. 

2:9 Ai idingat nasiam do, nasiam sanina, halojaon ampa hasunsahannami: Arian pakon borngin do hanami marhorja, ase ulang marhaboratan age ise nasiam. Sonin do pangambilankonnami bani nasiam ambilan na madear na humbani ELOHIM . (1 Kor. 4:12.) 

2:10 Nasiam do saksi, ELOHIM homa, paboa daulat, pintor anjaha seng panurakon parlahounami dompak nasiam, na porsaya, 

2:11 ai ibotoh nasiam do, sonaha hanami songon bapa hubani niombahni mamodahi nasiam sada-sada, mangojur anjaha pabijahon nasiam, 

2:12 ase marparlahou na patut nasiam dompak ELOHIM , na dob mandilo nasiam hubagas harajaonni ampa hasangaponni. (Ep. 4:1; Pil. 1:27.) 

2:13 Halani ai mangkatahon tarima kasih do hanami tongtong bani ELOHIM , ai ijalo nasiam do hata ni ELOHIM , na binogeinasiam humbannami, ijalo nasiam do in, sedo songon hata ni jolma, tapi songon hata ni ELOHIM do, ai in do in tongon, gabe marpangkorhon ibagas uhurnasiam na porsaya. (bd. 1:5; Gal. 1:11.) 

2:14 Nasiam sanina, na dob gabe paniru do nasiam bani kuria ni ELOHIM na i nagori Judea, na ibagas Kristus Jesus, ai manaron na parngit do nasiam humbani hasomannasiam sabangsa, songon sidea na niarsik-arsik ni halak Jahudi, 

2:15 na mambunuh Tuhan Jesus ampa nabi-nabi, na mangayak-ayak hanami anjaha na mambahen sogam ni uhur ni ELOHIM , imbang ni haganup jolma, (Lah. 2:23; 7:52.) 

2:16 na manlarang hanami mangambilankon ambilan na madear bani sipajuh begu-begu, ase andohar maluah sidea. Sonai ma tongtong igoki sidea suhat-suhat ni dousa ni sidea. Jadi sogop ma bani sidea ringis ai bani ujungni. (Mat. 23:32, 33.) 

2:17 Ia hanami, nasiam sanina, dob lingod nasiam tongkin humbannami lingod bani panonggor, tapi sedo bani uhur, lambin ihaporluhon hanami do marhasoman uhur na masihol tumang sihol mangidah bohinasiam. (Rom 1:11, 13.) 

2:18 Halani ai, sihol roh do hanami marayak nasiam, ahu tene si Paulus, sahali barang dua hali, tapi tarlanglang do hanami ibahen sibolis in. 

2:19 Ai ise do pangarapan bannami, malas ni uhur ampa sortali puji-pujian sobali nasiam ilobei ni Tuhanta Jesus Kristus, bani parrohni ai? (Pil. 2:16; 4:1.) 

2:20 Tongon, nasiam do hasangapon ampa malas ni uhur bannami.

0 komentar:

Posting Komentar