Sabtu, 28 Desember 2013

1 TESSALONIKA 1

1 Tessalonika 1

1:1 Humbani si Paulus, si Silpanus pakon si Timoteus, hubani kuria na i Tessalonik, na ibagas ELOHIM Bapa pakon Tuhan Jesus Kristus: Idop ni uhur ma bani nasiam ampa damei! (Lah. 16:19; 17:1, 10; 2 Tes. 1:1.) 

1:2 Mangkatahon tarima kasih do hanami tongtong hubani ELOHIM halani nasiam haganup, anjaha itarsingati hanami do nasiam ibagas tonggonami. 

1:3 Idingat hanami do totap ilobei ni ELOHIM horja haporsayaonnasiam, horja holongnasiam ampa hatotapon ni pangarapannasiam bani Tuhanta Jesus Kristus. (1 Kor. 13:13.) 

1:4 Ai ibotoh hanami do, nasiam na hinaholongan ni ELOHIM , na dob pinilihni do nasiam, (Kol. 3:12.) 

1:5 ai pangambilankonnami bani ambilan na madear in bani nasiam seng pitah ibagas hata masa ai bani nasiam, tapi homa ibagas hagogohon ampa ibagas Tonduy na Pansing do, marhasoman atok ni uhur na gok. Ibotoh nasiam do, sonaha marparlahou hanami itongah-tongahnasiam, halani nasiam. (1 Kor. 2:5.) 

1:6 Ase domma gabe sipaniru nasiam bannami ampa bani Tuhan in, ai ibagas buei sitaronon do ijalo nasiam hata in, marhasoman malas ni uhur na humbani Tonduy na Pansing, (1 Kor. 4:16.) 

1:7 gabe siusihan do nasiam bani sagala na porsaya i Makedonia ampa i Akaya. 

1:8 Ai humbani nasiam do tarambilan hata in, seng pitah i Makedonia ampa Akaya, tapi bani ganup ianan do sar haporsayaonnasiam bani ELOHIM , gabe seng pala be taringatannami pasal ai. (Rom 1:8.) 

1:9 Ai sidea sandiri do mambaritahon pasal sonaha parmasuknami bani nasiam, anjaha sonaha parmubahnasiam humbani sisombah-sombahon hubani ELOHIM , laho mambalosi ELOHIM na manggoluh ampa na sintong in, (Lah. 14:15; 1 Kor. 12:2.) 

1:10 anjaha paima-imahon bani Anakni roh hun nagori atas, na pinapuhoni humbani na matei, ai ma Jesus, na paluahkon hita humbani ringis na sihol roh. (Tit. 2:13.)

0 komentar:

Posting Komentar