Sabtu, 28 Desember 2013

1 PETRUS 5

1 Petrus 5


5:1 Ase, hupaingat ma sintua-sintua na itongah-tongah-nasiam, songon hasoman sintua anjaha saksi pasal sitoronon ni Kristus, homa siparrupei bani hasangapon na sihol sipatalaron ope: (Rom 8:17; 2 Joh. 1.) 

5:2 Parmahani nasiam ma hulanan ni ELOHIM na bani nasiam, ulang songon paksaan, tapi humbani malas ni uhur ma, domu hubani rosuh ni ELOHIM ; ulang ma halani uhur haut, tapi humbani porlu ni uhur ma. (Joh. 21:16; Lah. 20:28; 1 Tim. 3:2-7.) 

5:3 Ulang ma songon na mamaksa dompak hasoman, na niondoskon bani nasiam, tapi gabe siusihan ma bani na pinarmahan in. (2 Kor. 1:24; Tit. 2:7.) 

5:4 Jadi, jaloonnasiam ma sortali hasangapon na so ra melus ai, talarhonsi Parmahan bolon in. (bd. 2:25; 1 Kor. 9:25; 1 Tim. 4:8; Heb. 13:20.) 

5:5 Lanjar sonai ma homa nasiam na maposo, unduk ma nasiam bani partua-partua. Haganup ma nasiam margondithon toruh ni uhur samah nasiam, ai iimbang ELOHIM do sigijang uhur, tapi ibere do idop ni uhur bani na toruh maruhur. (Pod. 3:34; Mat. 23:12; Ep. 5:21; Jak. 4:6.) 

5:6 Halani ai patoruh nasiam ma dirinasiam hutoruh ni tangan ni ELOHIM na gogoh in, ase ipagijang nasiam bani panorangni. (Job 22:29; Jak. 4:10.) 

5:7 Ompashon nasiam ma haganup na hinolsohkon nasiam hu-Bani, ai isarihon do nasiam.(Ps. 55:23; Mat. 6:25; Pil. 4:6.) 

5:8 Torang ma uhurnasiam anjaha puho ma nasiam, ai mawat-awat do imbangnasiam, sibolis in, songon singa na maraum, mangindahi sibondutonni. (1 Tes. 5:6.) 

5:9 Imbang nasiam ma ia marhitei haporsayaon na toguh, ai ibotoh nasiam do, age haganup saninanasiam na i sab dunia on ihonai sitaronon na sonai do. (Ep. 6:11-13; Jak. 4:7.) 

5:10 Tapi ELOHIM , paridop ni uhur in, na mandilo nasiam ibagas Kristus Jesus hu hasangaponni na manongtong in, pauli-ulionni, patotaponni, pargogohanni anjaha pajonamonni do nasiam, dob manaron nasiam tongkin.(bd. 1:6; Heb. 13:21.) 

5:11 Bani ma hagogohon ronsi sadokah ni dokahni. Amen. (bd. 4:11.) 

5:12 Marhitei humbani si Siluannus, na huhira hasoman hatengeran ni uhur, hubahen do surat na pondok on bani nasiam, laho pagolpahon anjaha manaksihon, in do tongon idop ni uhur ni ELOHIM na sintong in, hajongjongannasiam in. (Heb. 13:22.) 

5:13 Manongos tabi do bani nasiam kuria na i Babel, na tarpilih songon nasiam; sonai homa anakku si Markus. 

5:14 Marsitabian ma nasiam marhitei summah holong ni uhur. Damei ma bani nasiam haganup na ibagas Kristus. (Rom 16:16; 1 Kor. 16:20; 2 Kor. 13:12.)

0 komentar:

Posting Komentar