Jumat, 27 Desember 2013

1 KORINT 3

1 Korint 3


3:1 Ahu pe, nasiam sanina, seng tarbahen ahu hinan marsahap bani nasiam songon bani partonduy, tapi songon dompak pardaging do, anjaha poso-poso ibagas Kristus. (Joh. 16:12.) 

3:2 Dadih do hupainumkon bani nasiam, sedo sipanganon hinan, ai seng tarjalo nasiam ope in; gari sonari, seng tarjalo nasiam ope, (Rom 5:12, 13; 1 Ptr. 2:2.) 

3:3 ai tong ope nasiam pardaging. Ai anggo masa bani nasiam parsimburuon ampa parsalisihan, ai lang pardaging do nasiam, anjaha marparlahou domu hubani biak hajolmaon? (bd. 1:10; 11:18.) 

3:4 Ai anggo adong na mangkatahon: "Susian ni si Paulus do ahu", anjaha na legan use mangkatahon, "Susian ni si Apollos do ahu", ai lang paruhur hajolmaon do nasiam ai? (bd. 1:12.) 

3:5 Ai ise do si Apollos? Ise si Paulus? Juak-juak do sidea, parhiteiannasiam gabe porsaya, anjaha ganup domu hubani pambere ni Tuhan bani. (Lah. 18:24, 27.) 

3:6 Ahu do manuan, si Apollos mangarbahi, tapi ELOHIM do patubuhkon. (Lah. 18:4, 11.)

3:7 Sedo sipanuan atap sipangarbahi na penting, tapi ELOHIM , na patubuhkon ai do. 

3:8 Dos do sipanuan ampa sipangarbahi, anjaha ganup manjalo upahni domu hubani horjani bei. (bd. 4:5.) 

3:9 Ai hasoman parhorja ni ELOHIM do hanami; juma ni ELOHIM anjaha rumah ni ELOHIM do ia nasiam. (Mat. 13:3-9; Ep. 2:20.) 

3:10 Domu hubani idop ni uhur ni ELOHIM , na binereni bangku, hupauli onjolan ai, songon binahen ni tukang na pandei; tapi na legan do na pajongjongkon iatasni. Tapi ganup ma mardiateihon, sonaha parpajongjongni iatas ni ai. (bd. 15:10.) 

3:11 Ai seng tarpauli onjolan na legan, sobali na dob pinajonam in, ai ma Jesus Kristus in.(1 Ptr. 2:4-6.) 

3:12 Ase anggo adong halak na paulihon iatas ni ai, omas, pirak, batu na maharga, hayu, lamlam atap anggala pe, 

3:13 hinorjahon ni ganup halak maningon talar do ai. Ai ari simagira ai do patandahon ai, halani marhitei apuy do ai roh, anjaha apuy ai do manguji barang sonaha horja ni ganup halak. (bd. 4:5.) 

3:14 Anggo totap horja ni atap ise pe, na pinajongjongni iatas ni ai, jaloonni do upah. 

3:15 Tapi anggo bois mosog hinorjahonni, rugi ma ia; maluah do anggo ia sandiri namin, tapi songon na manlopusi apuy ma. 

3:16 Ai seng ibotoh nasiam, rumah ni ELOHIM do nasiam anjaha Tonduy ni ELOHIM marianan ibagas nasiam? (bd. 6:19; 2 Kor. 6:16.) 

3:17 Anggo adong na parsedahon rumah ni ELOHIM , parsedaon ni ELOHIM do ia, ai na pansing do rumah ni ELOHIM , ai ma nasiam. 

3:18 Ulang ma adong na paoto-otohon dirini. Anggo adong itongah-tongahnasiam na mamingkir na pentar ia i tanoh on, gabe oto ma ia lobei, andohar pentar use. (Pangk. 3:17, 18.) 

3:19 Ai hapentaron ni dunia on, haotoon do in ilobei ni ELOHIM , ai tarsurat do: Itangkap do halak na pentar ibagas akal ni sidea. (Job 5:12, 13.) 

3:20 Dob ai use: Ibotoh Tuhan in do, sisoya-soya do pingkiran ni halak na pentar. (Ps. 94:11.) 

3:21 Ase ulang ma adong na mangunsagah bani jolma. Ai haganup in nasiam do simadasi, 

3:22 barang si Paulus, si Apollos, si Kepas, dunia on, hagoluhan, hamateian, na masa sonari ampa na sihol masa, haganup do bani nasiam, (bd. 1:12.) 

3:23 tapi Kristus do simada nasiam anjaha ELOHIM do simada Kristus.

0 komentar:

Posting Komentar