Jumat, 27 Desember 2013

1 KORINT 1

1 Korint 1


1:1 Humbani si Paulus, na tardilo gabe apostel ni Kristus Jesus mangihutkon rosuh ni ELOHIM , ampa si Sostenes sanina in, 

1:2 hubani kuria ni ELOHIM na i Korint, na dob pinapansing ibagas Kristus Jesus, halak na mapansing, na tardilo rap pakon haganup halak na mandilo Goran ni Tuhanta Jesus Kristus atap ija pe Tuhan ni sidea ampa Tuhanta: (ay. 6, 11; Lah. 9:14.) 

1:3 Idop ni uhur ma bani nasiam ampa damei humbani ELOHIM Bapanta ampa humbani Tuhan Jesus Kristus! (Rom 1:7.) 

1:4 Mangkatahon tarima kasih do ahu tongtong bani ELOHIM halani nasiam, mardingat idop ni uhur ni ELOHIM na binereni bani nasiam ibagas Kristus Jesus. 

1:5 Ai na dob bayak do nasiam ibagas Ia pasal haganup, ibagas ganup hata in ampa bani ganup pangarusion, 

1:6 halani hasaksian pasal Jesus domma totap bani nasiam, 

1:7 gabe seng marhahurangan be nasiam pasal haganup masam ni sibere-bere partonduyon ibagas na paimahon nasiam bani partalar ni Tuhanta Jesus Kristus. (Tit. 2:13.) 

1:8 Patotaponni do nasiam ronsi ujungni, gabe seng sihataon be bani ari ni Tuhan Jesus Kristus. (Pil. 1:6; 1 Tes. 3:13; 5:23.) 

1:9 Haposan do ELOHIM , na mandilo nasiam hu parsaoran pakon Anakni Jesus Kristus Tuhanta in.(1 Tes. 5:24.) 

1:10 Tapi hupodahi ma nasiam, nasiam saninangku, marhitei Goran ni Tuhanta Jesus Kristus, ase sahata ma nasiam haganup, ulang ma adong parbolah-bolahan bani nasiam, tapi totap ma nasiam sada marhitei sada ni uhur ampa sada ni pingkiran. (Pil. 2:2; 3:16.) 

1:11 Ai das do hubangku marhitei parrumah ni si Kloe pasal nasiam, saninangku, paboa adong do paringoran itongah-tongahnasiam. 

1:12 On do na huhatahon: Ganup do nasiam mangkatahon: Ahu susian ni si Paulus! Ahu susian ni si Apollos! Ahu susian ni si Kepas! Ahu susian ni Kristus! (bd. 3:4; Joh. 1:42; Lah. 18:24-27.) 

1:13 Ai na binagi do Kristus in? Ai na dob tarsilang do si Paulus manghophop nasiam? Ai hubagas goran ni si Paulus do nasiam tardidi? 

1:14 Tarima kasih ma huhatahon, halani seng dong hudidi humbani nasiam sobali si Krispus ampa si Gayus, (Lah. 18:8; Rom 16:23.) 

1:15 ase ulang adong na mangkatahon hubagas goranku sandiri nasiam tardidi. 

1:16 Tapi dihut do tene parrumah ni si Stepanas hudidi; na legan, seng hubotoh atap adong ope, na dob hudidi. (bd. 16:15, 17.) 

1:17 Ai seng isuruh Kristus ahu mandidihon, tapi mangambilankon ambilan na madear do, anjaha ai pe seng marhata hapentaron, ase ulang lumei kuasa ni silang ni Kristus. (bd. 2:4; Mat. 28:19; Joh. 4:2.) 

1:18 Ai haotoon do hata pasal silang in bani halak na laho magou, tapi hagogohon ni ELOHIM do in banta, na jumpahan haluahon.(Rom 1:16; 2 Kor. 4:3.) 

1:19 Ai tarsurat do: Huparseda do hapentaron ni na pentar, anjaha huambukkon do uhur ni siparuhur. (Jes. 29:14.) 

1:20 Ija do halak na pentar? Ija do sibotoh surat? Ija do siparsual-sual ni dunia on? Ai lang gabe haotoon do hapentaron ni dunia on ibahen ELOHIM ? 

1:21 Ai halani ibagas hapentaron ni ELOHIM , seng itanda dunia on ELOHIM marhitei hapentaron, gabe iharosuhkon ELOHIM ma paluahon na porsaya in marhitei ambilan haotoon. (Mat. 11:25.) 

1:22 Ai na mangindo tanda do halak Jahudi, anjaha mangindahi hapentaron halak Gorik. (Mat. 12:38; Joh. 4:48; Lah. 17:18, 32.) 

1:23 Tapi anggo hanami, Kristus na tarsilang in do iambilankon hanami; parsangsian do in bani Jahudi anjaha haotoon bani halak sipajuh begu-begu. (bd. 2:14; Rom 9:32.) 

1:24 Tapi bani na dob tardilo ai, halak Jahudi age halak Gorik, Kristus, ai ma hagogohon ni ELOHIM ampa hapentaron ni ELOHIM . (ay. 18; Kol. 2:3.) 

1:25 Ai haotoon ni ELOHIM , pentaran do ai ase jolma in, anjaha hagalekon ni ELOHIM , gogohan do ai ase jolma in. (2 Kor. 13:4.) 

1:26 Tonggor nasiam ma pandiloonni in bani nasiam, saninangku, seng piga nasiam na pentar mangihutkon pardagingon, seng piga na markuasa, seng piga na sangap. (Mat. 11:25; Joh. 7:48; Jak. 2:1-5.) 

1:27 Tapi na oto nini uhur ni dunia on, ipilih ELOHIM laho pailahon na pentar, anjaha na galek nini uhur ni dunia on, ipilih ELOHIM laho pailahon na gogoh. 

1:28 Na toruh anjaha na mahiri i dunia on ipilih ELOHIM , na lang in do tene, ase langkononni na adong hinan, 1:29 ase ulang adong hajolmaon na mangunsagah ilobei ni ELOHIM . (Rom 3:27; Ep. 2:9.) 

1:30 Tapi marhiteihonsi do ase ibagas Kristus Jesus nasiam, ai Ia do gabe hapentaron banta humbani ELOHIM , hapintoron ampa hapansingon ampa haluahon,(Jer. 23:5, 6; Joh. 17:19; 2 Kor. 5:21.) 

1:31 ase saud na dob tarsurat in: Na mamuji dirini, ibagas Tuhan in ma ia mamuji!

0 komentar:

Posting Komentar