Minggu, 29 Desember 2013

1 JOHANNES 5

1 Johannes 5


5:1 Ganup na porsaya, Jesus do Kristus, ai ma na dob tubuh humbani ELOHIM , anjaha ganup na manghaholongi Ia, na manubuhkonsi, holong do homa uhurni bani halak, na dob tubuh hum-Bani. (bd. 4:15, 16.) 

5:2 Hunjon do ibotoh hita, na dob holong uhurta bani anak ni ELOHIM , anggo holong uhurta bani ELOHIM anjaha ihorjahon hita titahni. 

5:3 Ai on do holong ni uhur bani ELOHIM , anggo idalankon hita titahni, anjaha seng borat titahni in. (bd. 2:5; Mat. 11:30; Joh. 14:15-23.) 

5:4 Ai sagala na dob tubuh humbani ELOHIM , ai do na manaluhon dunia on. Haporsayaonta, in do na dob monang manaluhon dunia on.(Joh. 16:33.) 

5:5 Ise do na manaluhon dunia on, anggo lang na porsaya, paboa Jesus do Anak ni ELOHIM ? 

5:6 Ia do in, na dob roh marhitei bah pakon daroh, ai ma Jesus Kristus, seng pitah ibagas bah, tapi ibagas bah ampa daroh do. Anjaha Tonduy in do na manaksihon, ai Tonduy in do hasintongan. (Joh. 19:34-35.) 

5:7 Ai tolu do na manaksihon, 

5:8 ai ma Tonduy in, bah in ampa daroh in, anjaha sada do na tolu in. 5:9 Ia hasaksian humbani jolma ijalo hita do, tapi banggalan do hasaksian na humbani ELOHIM , ai hasaksian na humbani ELOHIM do on, na sinaksihonni pasal Anakni in. 

5:10 Na porsaya bani Anak ni ELOHIM , ijolom do hasaksian in. Na so porsaya bani ELOHIM , ibahen do Ia parladung, halani lang porsaya ia bani na sinaksihon ni ELOHIM pasal Anakni in. (Rom 8:16.) 

5:11 Anjaha on do na sinaksihonni ai, ai ma, na dob ibere ELOHIM do banta hagoluhan na sadokah ni dokahni, anjaha ibagas Anakni in do hagoluhan in. 

5:12 Simada Anak in, bani do hagoluhan in, na so simada Anak ni ELOHIM , seng bani hagoluhan in. (Joh. 3:36; 14:6.) 

5:13 Ase husurat on bani nasiam, na porsaya bani goran ni Anak ni ELOHIM , ai ma, ase ibotoh nasiam, na dob bani nasiam do hagoluhan na sadokah ni dokahni. 

5:14 Anjaha on do hinsah ni uhurta, na dong banta i lobeini: Anggo ipindo hita atap aha domu hubani rosuh ni uhurni, itangihon do hita. (bd. 3:21, 22; Joh. 14:13; 16:23.) 

5:15 Anjaha, anggo ibotoh hita, itangihon do hita pasal atap aha pe na pinindonta, jadi ibotoh hita ma, na tongon ma jumpah hita na pinindonta ai hum-Bani. 

5:16 Anggo, iidah sada halak hasomanni mardousa, na so marujung hu hamateian, martonggo ma ia, jadi bereonni ma bani hagoluhan, ai ma bani sipardousa, na so marujung hu hamateian ai. Adong do dousa, na marujung hu hamateian, seng huhatahon, ase itonggohon anggo ai. (Mat. 12:31; Heb. 6:4-6.) 

5:17 Sagala hagedukon, dousa do ai, anjaha adong do dousa, na so marujung hu hamateian. 

5:18 Ibotoh hita do, na so mardousa sagala halak na dob tubuh humbani ELOHIM , tapi marsijoloman bani ELOHIM do halak, na dob tubuh hum-Bani, anjaha seng tarkahua parjahat in ia. (bd. 3:9.) 

5:19 Ibotoh hita, na humbani ELOHIM do hita, anjaha ganup dunia on ibagas kuasa ni hajahaton do. (bd. 4:4; Gal. 1:4.) 

5:20 Tapi ibotoh hita do, na dob roh do Anak ni ELOHIM , anjaha ibere do uhur banta, ase itanda hita Ia na sintong in. Anjaha ibagas Ia na sintong in do hita, ibagas Anakni Jesus Kristus. Ia do ELOHIM na sintong in ampa hagoluhan na sadokah ni dokahni.(Joh. 17:3; Rom 9:5.) 

5:21 Nasiam dakdanakku, jaga nasiam ma dirinasiam dompak sisombahon na lepak. (1 Kor. 10:14.)

0 komentar:

Posting Komentar