Minggu, 29 Desember 2013

1 JOHANNES 4

1 Johannes 4


4:1 Nasiam hinaholongan, ulang ma haganup tonduy haporsayai nasiam, tapi uji nasiam ma tonduy in, atap na humbani ELOHIM do in, ai domma buei nabi sipakulah-kulah roh hu dunia on. (1 Tes. 5:21.) 

4:2 Hunjon ma tandaon nasiam Tonduy ni ELOHIM : Ganup tonduy, na mangakuhon, na dob roh Jesus Kristus ibagas daging, ai ma na humbani ELOHIM . 

4:3 Anjaha ganup tonduy, na so mangakui Jesus, seng humbani ELOHIM in. In ma tonduy ni Antikristus, na dob ibogei nasiam pasal parrohni, anjaha domma i dunia on Ia nuan. (bd. 2:18, 22.) 

4:4 Nasiam dakdanakku, humbani ELOHIM do nasiam, anjaha domma italuhon nasiam, sidea ai banggalan do Ia na ibagas nasiam, humbani na ibagas dunia on. 

4:5 Hun dunia on do sidea, halani ai sahap parduniaon do sahap ni sidea, anjaha itangihon dunia on do sidea. (Joh. 15:19.) 

4:6 Hita nani humbani ELOHIM do. Halak na mananda ELOHIM , ai do na manangihon hita, ise na so humbani ELOHIM , ai do na so manangihon hita. Hunjon do tandaonta Tonduy hasintongan ampa tonduy sipaoto-oto. (Joh. 8:47.) 

4:7 Nasiam hinaholongan, marsihaholongan ma hita, ai humbani ELOHIM do haholongan in, anjaha ganup na marholong ni uhur, ai ma na dob tubuh humbani ELOHIM anjaha itanda do ELOHIM . 

4:8 Halak na so marholong ni uhur, seng itanda ELOHIM ; ai ELOHIM ai ma haholongon. 

4:9 Hunjon do gabe talar holong ni uhur ni ELOHIM banta, ai ma humbani na dob sinuruhni Anakni na sasada in hu dunia on, ase manggoluh hita marhiteihonsi. (Joh. 3:16.) 

4:10 Ibagas on do haholongan ai, ai ma, sedo hita na manghaholongi ELOHIM , tapi Ia do na mangkaholongi hita, anjaha isuruh do Anakni bahen pardearan pasaloseihon dousanta. (bd. 2:2.) 

4:11 Nasiam na hinaholongan, anggo sonin ma holong ni uhur ni ELOHIM banta, maningon do age hita marsihaholongan samah hita. (Mat. 18:33.) 

4:12 Seng dong atap ise na ongga mangidah ELOHIM . Anggo marsihaholongan samah hita, marianan ma ELOHIM ibagas hita, anjaha gok ma holongni in ibagas hita. (Joh. 1:18.) 

4:13 Hunjon ma ibotoh hita, na marianan hita ibagas Ia, anjaha Ia ibagas hita, ai ma halani na dob binereni ai banta humbani Tonduyni in. (bd. 3:24.) 

4:14 Domma iidah anjaha isaksihon hanami, paboa domma isuruh Bapa in Anakni, ai ma Sipaluah dunia on. (bd. 1:1; Joh. 3:17.) 

4:15 Barang ise na mangakui, Jesus do Anak ni ELOHIM , totap ma marianan ELOHIM ibagas ia anjaha ia ibagas ELOHIM . (bd. 5:5.) 


4:16 Anjaha domma ibotoh anjaha ihaporsayai hita pasal holong ni uhur ni ELOHIM banta. ELOHIM do haholongon in, anjaha halak na totap ibagas holong, ai do na totap ibagas ELOHIM , anjaha ELOHIM ibagas ia. (ay. 8.) 

4:17 Ijai ma gok dear ni holong ai ibagas hita, pala marhinsah ni uhur hita bani ari paruhuman ai; ai songonsi sonai do homa hita i dunia on. (bd. 2:28.) 

4:18 Seng dong biar ibagas holong, tapi ipadaoh holong na dob gokan dear ai do biar, ai marisi uhum do biar, anjaha halak parbiar, seng gokan dear ibagas holong ni uhur. 

4:19 Maruhur holong ma hita, ai parlobei do Ia manghaholongi hita. 

4:20 Anggo adong halak na mangkatahon holong uhurni bani ELOHIM , hape idomdomi hasomanni, parladung do ai. Ai anggo seng ihaholongi hasomanni na niidahni, ELOHIM , na so niidahni pe, seng boi haholonganni. 

4:21 On do titah, na ijalo hita hum-Bani: Na manghaholongi ELOHIM , maningon haholonganni do homa saninani. (Mrk. 12:29-31.)

0 komentar:

Posting Komentar