Rabu, 02 April 2014

MALEAKI 1

Holong ni Naibata bani Israel
1.1 Hata pangungkabon ni Jahowa bani Israel marhitei si Maleaki.
1.2 “Holong do uhur-Hu bannima,” nini Jahowa. Tapi ihatahon hanima, “Sonaha ma pangkaholongi-Mu bennami?” “Ai lang si Esau do namin abang ni si Jakob,” nini Jahowa, “hape si Jakob do Huhaholongi, (1 Mus. 25:23; Rom 9:13)
1.3 tapi sogam do uhur-Hu bani si Esau. Halani ai do ase gabe halimisan Hubahen dolog-dologni, anjaha Huondoskon parbagiananni gabe ianan ni sorigala, na somal marianan i halimisan.” (1 Mus. 36:18; Jes. 34:13; Jer. 49:17; Obj. 18)
1.4 Porini nini Edom, ʻDomma tongon iparseda hanami, tapi ulakkononnami do paulihon na mareong ai,ʼ hatahonon ni Jahowa Zebaot ma, ʻSidea paulihon, tapi Ahu use manreongkon; goranon ni halak ma sidea, “Tanoh hajahaton, bangsa siringisan ni Jahowa sadokah ni dokahni.”
1.5 Idahon ni matanima ope ai, gabe hatahononnima ma, “Banggal do Jahowa, age i darat ni parbalogan ni Israel.” ʼ
Sipanggalang na So Talup
16 Nini Jahowa Zebaot, “Ipasangap anak do bapani, anjaha ihabiari juakjuak tuanni. Anggo bapa do Ahu, ija do hasangapon-Ku? Anggo Tuhan Ahu, ija do biar dompak Ahu? Hanima malim-malim sipahiri goran-Ku. Hape nini hanima ope, ʻSonaha, hanami pahiri goran-Mu?ʼ (2 Mus. 20:12; Joh. 8:49)
1.7 Iboan hanima do bani anjapanjap-Ku ruti na mabutak. Anjaha ihatahon hanima do, ʻSonaha ibahen hanami pabutak ai?ʼ Marhitei na ipingkiri hanima, ʻBoi do pahirion meja ni Jahowa.ʼ (3 Mus. 21:6)
1.8 Anggo iboan hanima pinahan na mapitung bahen galangan, ai lang na sambor ma ai? Anggo igalangkon hanima na oyangon atap na boritan, ai lang na sambor ma ai? Parsiluah hanima ma ai bani panggomgominima, mintor tumaram ma rosuh uhurni mangidah ho barang layak ia bam?” nini Jahowa Zebaot. (3 Mus. 22:20, 23)
1.9 “Ai pe buat hanima ma uhur ni Naibata marhitei galangan sisonai ai, ase idop uhur-Ni banta! Sonai do pambahenannima, mintor tarbahen ma rosuh uhur-Ni mangidah hanima?” nini Jahowa Zebaot.
1.10 “Ambit adong ma namin sada halak hun tongah-tongahnima na ra manutup labah ni Rumah Panumbahan in, ase ulang sisoya-soya pannahitinima apuy bani anjapanjap-Kin. Seng marosuh uhur-Hu mangidah hanima,” nini Jahowa Zebaot, “anjaha seng tarharosuhkon Ahu galangan hun tangannima. (bd. 2:13; Jes. 1:13; Ams. 5:21)
1.11 Ai hun hapoltakan das hu hasundutan timbul do goran-Ku i tongah-tongah ni bangsa-bangsa anjaha bani ganup ianan igalangkon do dahupa bani goran-Ku ampa galangan sipanganon na pitah; ai timbul do goran-Ku i tongah-tongah ni bangsa-bangsa,” nini Jahowa Zebaot. (Jes. 60:1-7; Ps. 113:3)
1.12 “Tapi anggo hanima ipabutak hanima do in, marhitei na hinatahonnima, ʻBoi do butak bahenon meja ni Jahowa, anjaha mapas uhur bani sipanganon na ijai ai.ʼ
1.13 Nini hanima, ʻTonggor ma, loja ni in!ʼ Anjaha mapas do uhurnima Bangku,” nini Jahowa Zebaot. “Iboan hanima do na nirampok, na oyangon ampa na boritan, iboan hanima do ai gabe galangannima. Mintor tarharosuhkon Ahu ma manjalo ai hun tangannima?” nini Jahowa.
1.14 “Sai hona papa ma sipangoto-otoi, na marnah pinahan tunggal namin bani hulananni, na dob binagahkonni, hape na martikas do saudni igalangkon bani Tuhan in! Ai Raja na bolon do Ahu,” nini Jahowa Zebaot, “anjaha sihabiaran do goran-Ku i tongah-tongah ni bangsa-bangsa.” (3 Mus. 22:19)

Kamis, 02 Januari 2014

PANGUNGKABON 22

Pangungkabon 22

22:1 Dob ai ipatuduhkon ma hubangku sada bah banggal hagoluhan, lihou songon kasa, na luar humbani paratas ni ELOHIM pakon Anak ni Biri-biri in. (Hes. 47:1; Joel 4:18; Sak. 14:8.) 

22:2 Itongah-tongah ni alaman ni huta ai pakon angkup topi ni bah ai, dong do hayu hagoluhan, na marbuah sapuluh dua hali setahun, na mamberehon buah siap bulan; ia bulung ni hayu ai gabe hamalumon do ai bani bangsa-bangsa. (1 Mus. 2:9; Hes. 47:12.) 

22:3 Seng be dong na hona bura ijai. Paratas ni ELOHIM pakon Anak ni Biri-biri in do jongjong ijai, anjaha juak-juakni marugas Bani. (Sak. 4:11.) 

22:4 Idahon ni sidea ma bohini, anjaha Goranni tarsurat bani pardompakan ni sidea. (bd. 21:3; Ps. 17:15; Mat. 5:8.) 

22:5 Seng masa be ijai borgin, seng porlu be bani sidea sondang ni suluh atap sondang ni mata ni ari, ai sondangan ni Tuhan ELOHIM ma sidea, anjaha manrajai ma sidea ronsi sadokah ni dokahni. (bd. 21:22-25; Jes. 60:19; Dan. 7:18:27.) 

22:6 Jadi ihatahon ma hubangku: Ia hata on hatengeran ni uhur do anjaha sintong; isuruh Tuhan ELOHIM , simada tonduy ni nabi-nabi do malekatni, laho patuduhkon hubani juak-juakni na laho barah masa. (bd. 1:1; 21:5; Dan. 2:28.) 

22:7 Tonggor ma, barah do Ahu roh! Martuah ma na manramotkon hata ni panjahaion na ibagas buku on! (bd. 1:3; 3:11; 12:20.) 

22:8 Ahu, si Johannes, do na mambogei anjaha na mangidah na masa in. Jadi dob hubogei anjaha huidah, manrogop ma ahu anjaha marsombah hulobei ni nahei ni malekat, na patuduhkon ai hubangku. (bd. 19:10.) 

22:9 Jadi nini ma dompak ahu: Ulang sonai! Ai hasomanmu juak-juak do ahu anjaha hasoman juak-juak ni saninamu, nabi-nabi ai, ampa na manramothon hata ni buku on. ELOHIM ma sombah! 

22:10 Dob ai nini ma dompak ahu: Ulang ma lak hata panjahaion ni buku on! Ai dohor ma panorangni. (bd. 10:4; Dan. 8:26; 12:4.) 

22:11 Halak sihorjahon hajahaton inunut ma mambahen na jahat, anjaha halak na butak lambin mambutaki dirini; tapi halak parpintor manghorjahon hapintoran, anjaha halak na pansing papansing dirini. (Dan. 12:10.) 

22:12 Tonggor ma, podas do Ahu roh! Huboan do upah, laho mambalas hubani ganup halak romban hubani na hinorjahonni bei. (bd. 3:11; Jes. 40:10; Rom 2:6.) 

22:13 Ahu do Alpa pakon Omega, Na parlobei pakon Na parpudi, Bonani pakon Ujungni. (bd. 1:8, 17; 21:6; Jes. 44:6.) 

22:14 Martuah ma sagala na mamburihi hiouni, gabe marhak sidea marrupei bani hayu hagoluhan ai, anjaha boi masuk hun horbangan ai hubagas huta ai. (1 Mus. 2:9.) 

22:15 Idarat ma anggo baliang pakon sipartabas pakon parbangkis pakon pamunuh pakon parELOHIM na legan ampa sagala na mangkarosuhkon anjaha na mangkorjahon ladung. (bd. 21:8; Mat. 7:6; 1 Kor. 6:9, 10; Pil. 3:2.) 

22:16 Ahu, Jesus, marsuruh malekathu bani nasiam, manaksihon on bani kuria in. Ahu do Urat pakon marga ni si Daud, Bintang buha siang, na marsinalsal in. (bd. 1:1, 2; Jes. 11:1, 10; Luk. 1:78.) 

22:17 Jadi ihatahon Tonduy pakon tunangan ai ma: Roh ma Ham! Anjaha na mambogei ai pe ihatahon ma: Roh ma Ham! Barang ise na horahan, roh ma; na marhasihol, ijalo ma bah hagoluhan in seng pala marpamboli. (bd. 21:6; Jes. 55:1; Joh. 7:37; Rom 8:23.) 

22:18 Ahu manaksihon bani sagala na mambogei hata ni panjahaion na bani buku on: Anggo adong na manambahi hujin, tambahan ni ELOHIM ma bani hamarsikon na tarsurat ibagas buku on. (5 Mus. 4:2.) 

22:19 anggo adong halak na mambuati hata na ibagas buku panjahaion on, buaton ni ELOHIM ma rupeini na bani hayu hagoluhan in ampa na bani huta na pansing in, na tarsurat ibagas buku on. (1 Mus. 2:9.) 

22:20 Ihatahon sisaksihon on: Tongon, barah do Ahu roh! Amen! Roh ma Ham, Tuhan Jesus!(ay. 7:12; bd. 1:7; 1 Kor. 16:22.) 22:21 Idop ni uhur ni Tuhan Jesus ma manghasomani nasiam haganup! (Rom 16:24.)


PANGUNGKABON 21

Pangungkabon 21


21:1 Dob ai huidah ma langit na bayu pakon tanoh na bayu; ai domma salpu langit na parlobei ai pakon tanoh na parlobei ai, laut ai pe seng dong be. (bd. 20:11; Jes. 65:17; 66:22; 2 Ptr. 3:13.) 

21:2 Anjaha huidah ma huta na pansing ai, ai ma Jerusalem na bayu, susur hun nagori atas, humbani ELOHIM , na pinasirsir songon tunangan na pinajagar marayak paramangonni. (bd. 19:7, 8; Gal. 4:26; Heb. 11:10, 16; 12:22.) 

21:3 Dob ai hubogei ma sada sora na gogoh humbani paratas ai, mangkatahon: Tonggor ma, on ma ianan ni ELOHIM itongah-tongah ni jolma; marianan ma Ia itongah-tongah ni sidea, anjaha sidea ma bangsani anjaha ELOHIM sandiri saor bani sidea.(Hes. 37:27; Sak. 2:14.) 

21:4 Anjaha apusanni ma sagala iluh humbani ni sidea, seng dong be hamateian, age pusok ni uhur age partangison age halojaon seng dong be, ai domma salpu na parlobei in.(bd. 7:17; Jes. 25:8; 35:10.)

21:5 Dob ai nini Na hundul bani paratas ai ma: Tonggor ma, bayu do hubahen haganup. Ambahni ai ihatahon do: Surathon ma in, hatengeran anjaha sintong do hata in. (bd. 4:2, 9; 5:1; 2 Kor. 5:17.) 

21:6 Lanjar ihatahon ma hubangku: Domma saud! Ahu do Alpa pakon Omega, bonani pakon ujungni. Bereonku do minum halak na horahan humbani bah tubuh hagoluhan, seng pala marpamboli. (bd. 1:8; 22:17; Jes. 55:1; Sak. 14:8.) 

21:7 Na monang in do manean ai haganup, Ahu ma gabe ELOHIM bani, anjaha ia ma gabe anak Bangku.(bd. 2:7; 2 Sam. 7:14; Sak. 8:8.) 

21:8 Tapi halak siparbiar, na so porsaya, na butak, pamunuh, parriah-riah, partabas-tabas, parELOHIM na legan ampa sagala parladung, parrupei do bani laut na gara ibahen apuy pakon hirtah. Ai ma hamateian na paduahon. (bd. 20:14; 22:15.) 

21:9 Dob ai roh ma sahalak humbani na pitu malekat ai, na manjolom batil na pitu ai, na marisi hamarsikon parpudi na pitu ai, marsahap ma ia dompak ahu, nini ma: Roh ma, ase hupatuduhkon bam tunangan ai, parinangon ni Anak ni Biri-biri in. (15:1, 6, 7; 19:7.) 

21:10 Jadi iboan ma ahu ibagas tonduy hubani sada dolog na banggal anjaha na gijang, anjaha ipatuduhkon ma hubangku huta na pansing ai, ai ma Jerusalem, na susur hun nagori atas, humbani ELOHIM , (bd. 21:2; Hes. 40:2.) 

21:11 ibagas hasangapon ni ELOHIM . Sinalsalni usih hubani mata intan na maharga, songon mata intan jaspis na marlinang-linang. (bd. 3:23; Jes. 60:1, 2, 19.) 

21:12 Banggal janah gijang do tembokni, horbanganni sapuluh dua do anjaha sapuluh dua malekat i atasni; anjaha tarsurat do goran-goran ijai, ai ma goran ni marga ni halak Israel na sapuluh dua ai: (Hes. 48:31-35.) 

21:13 Dompak purba tolu horbangan dompak utara tolu horbangan, dompak dangsina tolu horbangan anjaha dompak pastima tolu horbangan. 

21:14 Sapuluh dua do batu onjolan ni tembok ni huta ai, anjaha tarsurat do ijai goran ni na sapuluh dua apostel ni Anak ni Biri-biri in. (Ep. 2:20; Heb. 11:10.) 

21:15 Ijolom na marsahapkon ahu ai do sada tungkot sibar-sibar na humbani omas, laho manibar huta ai, horbanganni ampa tembokni. (bd. 11:1; Hes. 40:3.) 

21:16 Marompat suhi do pou-pou ni huta ai, dos do ganjangni pakon bolagni. Isibar ma huta ai marhitei sibar-sibar ai: Sapuluh dua ribu stadia. Dos do ganjangni pakon bolagni pakon gijangni. (Hes. 40:16; 48:16, 17.) 

21:17 Isibar ma homa tembok ni huta ai: Saratus ompat puluh ompat asta; sibar-sibar ni jolma do sibar-sibar ni malekat ai. 

21:18 Ia onjolan ni tembok ni huta ai mata intan jaspis do, anjaha huta ai sandiri omas pitah do, lihar songon kasa. 

21:19 Ipajagar do onjolan ni tembok ni huta ai marhitei bagei ni batu na maharga: Onjolan na parlobei jaspis do, na paduahon sapir, na patoluhon kalsedon, na paompathon samarah, (Jes. 54:11, 12.) 

21:20 na palimahon sardonik, na paonomhon sardion, na papituhon kerisolit, na paualuhkon beril, na pasiahkon topasion, na pasapuluhkon kerisopras, na pasapuluh sadahon kiasin, na pasapuluh duahon ametis. 

21:21 Ia na sapuluh dua horbangan ai, sapuluh dua mutiha do, ganup horbangan ipauli humbani sada mutiha; ia alaman ni huta ai omas pitah do songon kasa na lihou. (bd. 22:2.) 

21:22 Seng dong huidah rumah panumbahan ibagas huta ai, ai Tuhan ELOHIM , Sigomgom haganup do na gabe rumah panumbahan ijai, rap pakon Anak ni Biri-biri in. 

21:23 Seng porlu bani huta ai mata ni ari atap bulan, laho manondangisi; ai hasangapon ni ELOHIM do na paliharhonsi anjaha Anak ni Biri-biri in do panondangni. (bd. 22:5; Jes. 24:23; 60:19, 20.) 

21:24 Mardalani ma bangsa-bangsa ibagas sinalsalni, anjaha boanon ni raja-raja ni tanoh on ma hamuliaon ni sidea hubagas. (Jes. 60:3, 5.) 

21:25 Seng pala itutup horbanganni arian, ai seng masa ijai borgin. (Ps. 89:28; Jes. 60:11.) 

21:26 Boanon ni sidea ma hasangapon pakon hamuliaon ni sagala bangsa hubagas huta ai. 

21:27 Tapi seng anjai masuk hubagas huta ai sagala na mabutak, na mangkorjahon hagigi pakon ladung, pitah na dob tarsurat bani buku hagoluhan ni Anak ni Biri-biri ai do hansa. (bd. 20:15; Pil. 4:3.)

PANGUNGKABON 20

Pangungkabon 20

20:1 Dob ai huidah ma sada malekat susur hun nagori atas, na manjolom anakkunsi ni ruang partoruh anjaha gari banggal do bani tanganni. (bd. 9:1; 2 Ptr. 2:4; Jud. 6.) 

20:2 Jadi itangkap ma naga ai, ulog na basaia ai, ai ma sibolis pakon setan, anjaha igarihon ma ia saribu tahun dokahni. (bd. 12:9; 1 Mus. 3:1.) 

20:3 Idabuhkon ma ia hu ruang partoruh, itutup anjaha ilak ma i atasni, ase ulang be ipakahou sagala bangsa, paima gok na saribu tahun ai. Dob salpu ai maningon paluahon do ia tongkin. 

20:4 Jadi huidah ma buei paratas anjaha adong do na hundul i atasni, ibere ma bani sidea kuasa manguhumi. Anjaha huidah ma tonduy ni sagala na hona tampul uluni halani na manaksihon Jesus pakon halani hata ni ELOHIM , sagala na so manombah binatang ai atap gambaranni pe, anjaha na so manjalo tanda bani pardompakanni atap bani tanganni. Mulak manggoluh do sidea anjaha manrajai rap pakon Kristus saribu tahun dokahni. (Dan. 7:9, 22, 27; Mat. 19:28; 1 Kor. 6:2.) 

20:5 Ia na matei na legan, seng mulak manggoluh, paima salpu na saribu tahun ai. Ai ma parpuhoon na parlobei. (1 Kor. 15:23; 1 Tes. 4:16.) 

20:6 Na martuah anjaha na pansing do halak na marrupei bani parpuhoon na parlobei ai. Seng markuasa be hamateian na paduahon ai bani sidea, gabe malim ni ELOHIM pakon Kristus do sidea anjaha mamarentah rap pakonsi saribu tahun dokahni. (bd. 5:10; Jes. 61:6.) 

20:7 Dob salpu na saribu tahun ai, ipaluah ma sibolis ai humbani tutupanni. 

20:8 Jadi luar ma ia pakahouhon sagala bangsa na bani na ompat deisa ni tanoh on, ai ma Gok pakon Magog, laho patumpuhon sidea hu parmunsuhan; ia bilangan ni sidea songon horsik na i topi ni laut do. (Hes. 38:2, 9, 15.) 

20:9 Jadi tangkong ma sidea hu hanopan na bolag ai, anjaha ihubu ma bala ni halak na pansing pakon huta na hinaholongan ai; gabe madabuh ma apuy hun nagori atas, ai ma na mamboiskon sidea. (Hes. 38:22; 39:6; Sak. 12:9.) 

20:10 Anjaha sibolis ai, na pakahouhon sidea ai, idabuh ma hu laut apuy pakon hirtah, hu ianan ni binatang pakon nabi sipahulah-kulah ai, ase iarsik-arsik arian pakon borgin ronsi sadokah ni dokahni. (bd. 14:10, 11; 19:20.) 

20:11 Dob ai huidah ma sada paratas na banggal anjaha na putih ampa Na hundul i atasni ai. Mandompakkon bohini maporus do tanoh pakon langit, seng dong be jumpah ianan bani sidea. (Jes. 6:1; Dan. 7:9; Mat. 25:36-46; 2 Ptr. 3:7, 10, 12.) 

20:12 Dob ia huidah ma sagala na matei, na banggal pakon na etek, jongjong ilobei ni paratas ai; jadi iungkab ma buku-buku. Dob ai iungkab ma sada buku na legan, ai ma buku hagoluhan ai, gabe iuhum ma na matei ai mangihutkon na tarsurat ibagas buku-buku ai, romban hubani horja ni sidea bei. (Jer. 17:20; Dan. 7:10; Rom 2:6; Pil. 4:3.) 

20:13 Jadi ibere laut ai ma sagala na matei ibagas ai, anjaha hamateian pakon nagori toruh ai pe ibere ma sagala na matei na ijai ai; jadi iuhum ma ganup sidea domu hubani horja ni sidea. (Joh. 5:28, 29.) 

20:14 Ia hamateian pakon nagori toruh ai idabuh ma hubagas laut apuy ai. Ai ma hamateian na paduahon, laut apuy ai. (1 Kor. 15:26, 55.) 

20:15 Barang ise na so jumpah tarsurat bani buku hagoluhan ai, idabuhkon ma ia hubagas laut apuy ai. (bd.19:20; Dan 12:1; Mat. 25:41.)

PANGUNGKABON 19

Pangungkabon 19


19:1 Dob salpu ai hubogei ma sora na gogoh humbani humpulan banggal i nagori atas, mangkatahon: Haleluya! Haluahon pakon hasangapon ampa hagogohon, ELOHIM nta do simada ai, (bd. 11:15.) 

19:2 Ai sintong anjaha pintor do uhumni; ai domma iuhumi boru jalang na banggal ai, na dob mangagou tanoh in marhitei parriah-riahonni, anjaha ibalashon do hubani daroh ni juak-juakni (bd. 16:7; 5 Mus. 32:43.) 

19:3 Dob ai ihatahon sidea ma padualihon: Haleluya! Anjaha naik do timusni ai ronsi sadokah ni dokahni. (Jes. 34:10.) 

19:4 Jadi manrogop ma sintua na dua puluh ompat ai pakon pargoluh na ompat ai marsombah bani ELOHIM , na hundul bani paratas ai, nini: Amen! Haleluya! (bd. 5:14; Ps. 106:48.) 

19:5 Anjaha roh ma sada sora humbani paratas ai, mangkatahon: Puji nasiam ma ELOHIM nta, nasiam haganup juak-juakni, na mangkabiarisi, na etek age na banggal! (Ps. 22:24; 115:13.) 

19:6 Jadi hubogei ma songon sora ni jolma mabuei, songon sora ni buei bah banggal, songon sora ni longgur na gogoh, manghatahon: Haleluya! Ai domma manrajai Tuhan ELOHIM nta, Sigomgom haganup. (Ps. 93:1; Hes. 1:24.) 

19:7 Marmalas ni uhur ma hita anjaha marolob-olob, anjaha bere hita ma hasangapon Bani! Ai jumpah ma pesta parunjukon ni Anak ni biri-biri in, domma sirsir parinangonni. (bd. 21:2, 9; Ps. 118:24.) 

19:8 Domma ibere hubani hiou putih na borsih sipaheionni. Ia hiou putih ai, ai ma horja hapintoran ni halak na mapansing. (Ps. 45:14, 15; Jes. 61:10.) 

19:9 Anjaha nini ma hubangku: Surathon ma: Martuah do na niontang bani pesta parunjukon ni Anak ni Biri-biri in. Dob ai ihatahon ma hubangku: Hata on tongon do hata humbani ELOHIM .(Luk. 14:15.) 

19:10 Jadi manrogop ma ahu ilobei ni naheini laho manombahsi, tapi nini ma dompak ahu: Ulang sonin, hasomanmu juak-juak do ahu anjaha hasoman juak-juak ni saninamu, na manjolom hasaksian ni Jesus, ELOHIM do sisombahonmu! Ai hasaksian ni Jesus, ai ma tonduy ni panjahaion. (bd. 12:17; 22:8; Lah. 10:25, 26.) 

19:11 Dob ai huidah ma mungkab nagori atas, anjaha tonggor ma, sada huda na putih, anjaha na mangajak ai margoran do Haposan anjaha Parsintong, anjaha ibagas hapintoron do Ia manguhumi anjaha mamorang. (bd. 1:5; 3:14; Jes. 11:4, 5.) 

19:12 Songon gara ni apuy do matani, anjaha buei do sortali bani uluni; adong do goranni tarsurat, na so binotoh ni age ise, sobali Ia sandiri. (bd. 1:4; 2:18.) 

19:13 Ipakei do hiou na nironjamhon bani daroh anjaha goranni ai ma: Hata ni ELOHIM . (Jes. 63:1, 2; Joh. 1:1.) 

19:14 Mangihut do Bani sagala bala na i surga mangajak huda putih. Hiou na putih anjaha na borsih do pakeian ni sidea. 

19:15 Mandarat do humbani pamanganni podang na marot, sitampulhononni bani bangsa-bangsa. Parmahanonni ma sidea marhitei tungkot bosi, anjaha Ia do mandogei pangilangan anggur ni ringis banggal ni ELOHIM , Sigomgom haganup. (Ps. 2:9; Jes. 63:3.) 

19:16 Tarsurat do goranni bani hiouni pakon binongeini: Raja ni sagala raja anjaha Tuhan ni sagala tuan. (bd. 17:14; 1 Tim. 6:15.) 

19:17 Dob ai huidah ma sada malekat jongjong ibagas mata ni ari, anjaha mandilohon marhitei sora na gogoh bani manuk-manuk na i awang-awang na gijang in: roh ma hanima martumpu bani pesta mangan-mangan bolon ni ELOHIM . (Hes. 39:4, 17-20.) 

19:18 laho manganhon daging ni raja-raja, daging ni puanglima pakon halak na gogoh, daging ni sagala huda pakon daging ni na mangajaksi, daging ni sagala halak na mardeka pakon jabolon, age na etek age na banggal. (bd. 6:15.) 

19:19 Jadi huidah ma binatang ai ampa raja-raja ni tanoh on rap pakon bala ni sidea martumpu laho marmunsuh dompak na mangajak huda ai pakon balani. (bd. 16:14, 16; 17:12-14; Ps. 2:2.) 

19:20 Gabe tartangkap ma binatang ai rap pakon nabi sipahulah-kulah ai, na dob mambahen tanda-tanda i lobeini, parhiteianni paoto-otohon sagala na manjalo tanda ni binatang ai pakon na manombah gambaranni. Manggoluh do na dua ai idabuhkon hu laut apuy na gajag marhasoman hirtah. (bd. 13:11-17; 20:10; Dan. 7:11,26.) 

19:21 Ia na tading ai ibunuh do marhitei podang na kaluar humbani pamangan ni na mangajak huda ai, gabe bosur ma sagala manuk-manuk ibahen daging ni sidea.

PANGUNGKABON 18

Pangungkabon 18


18:1 Dob salpu ai huidah ma sada malekat na legan, susur hun nagori atas, na markuasa na banggal, jadi isondangi hasangaponni ma tanoh in. (Hes. 43:2.) 

18:2 Jadi mardilo-dilo ma ia marhitei sora na maling, nini ma: Domma madabuh, domma madabuh Babilon na bolon in, domma gabe ianan ni setan-setan ai ampa parponopan ni sagala tonduy na mabutak, pakon barang ni sagala manuk-manuk na mabutak, sihagigihononkon. (bd. 14:8; Jes. 21:8; Jer. 50:39; Dan. 4:27.) 

18:3 Ai na dob minum do sagala bangsa humbani anggur parbangkisonni, na pagaranghon ai, anjaha raja-raja ni tanoh in marriah-riahi do pakonsi, anjaha gabe bayak do partiga-tiga ni tanoh in marhitei banggal ni hadoharonni. (Jer. 51:7; Neh. 3:4.) 

18:4 Dob ai hubogei ma use sora na legan hun nagori atas manghatahon: Kaluar ma nasiam. ale bangsaku, hun tongah-tongahni, ase ulang saor nasiam bani dousani, anjaha ulang dihut nasiam ihonai sitarononni. (Jer. 50:8; 51:6, 9.) 

18:5 Ai domma sundol ronsi langit sagala dousani, anjaha idingat ELOHIM do sagala hajahatonni. (1 Mus. 18:20; Jer. 51:9.) 

18:6 Balashon nasiam ma hubani romban hubani pambahenanni bani nasiam, marlompit ma balashon nasiam na binahenni ai; marlompit ma saorhon nasiam bani panginuman, na sinaorni bani nasiam. (Ps. 137:8; Jer. 50:15, 29.) 

18:7 Honahon ma hubani na maborit ampa hamarsikon ansa buei ni hamuliaon ampa hamantinonni hinan. Ai nini do ibagas uhurni: Marparatas do ahu songon raja naboru, sedo na mabalu ahu seng anjai idahonku pusok ni uhur. (Jes. 47:7, 8.) 

18:8 Halani ai ibagas sadari do roh bani sitarononni: Hamateian, pusok ni uhur ampa lohei, dob ai tutungon ma ia bani apuy, ai na gogoh do Tuhan ELOHIM , na manguhumsi. (Jes. 47:9; Jer. 50:31.) 

18:9 Tangisan anjaha doruhan ni raja-raja ni tanoh in ma ia, ai ma hasomanni marbangkis anjaha marhabutakon sanggah na iidah sidea timus ni apuy, na manutungsi ai. (bd. 17:2.) 

18:10 Mandaoh-daoh mando sidea jongjong halani biar mangidah sitarononni ai, nini: Aih, aih, ale huta Babel na bolon in anjaha na toguh in! ibagas sajam do mangonai hu bam. (bd. 14:8; Jes. 21:9.) 

18:11 Tangis anjaha marhoru do partiga-tiga ni tanoh on mangidahsi, halani seng dong be na mamboli boniaga ni sidea, (Hes. 27:36.) 

18:12 ai ma boniaga omas pakon pirak, mata intan, mutiara, hiou putih, hasumba, sitora, hiou sigerger pakon sagala hayu na misbou-misbou, pakon masam ni parugas na pinauli humbani gading, pakon parkakas na pinauli humbani hayu na maharga, humbani tombaga, bosi ampa batu marmar, (Hes. 27:12, 13, 22.) 

18:13 ambah ni ai kulit manis pakon minak na morum, hamonan, mir pakon dahupa, anggur, minak jetun, topung pakon gandum, lombu pakon biri-biri, huda pakon gareta, jabolon pakon jolma. 

18:14 Buah ni hayu pe, na hinarosuhkon ni uhurmu, mosor do humbam, anjaha sagala hajengeson ampa hajombuton magou do humbam, seng anjai jumpah be ai. 

18:15 Halak na martiga-tigahon ai, na dob bayak marhitei ai. jongjong do mandaoh-daoh, halani mabiar mangidah sitarononni, tangis anjaha mandoruhi, nini: (Hes. 27:36.) 

18:16 Aih, aih, huta na banggal in, na marhiou hiou putih, saholat ampa hasumba, nilampis bani omas, mata intan pakon mutiara! Ibagas sajam do mahansur habayakon na sonai! (bd. 17:4.) 

18:17 Anjaha haganup kapiten ni kapal ampa halak siparlayar, halak siparhorja i kapal ampa na marpansarian hun laut, jongjong do sidea mandaoh-daoh, (Hes. 27:27-29.) 

18:18 anjaha doruh-doruh mangidah timus ni apuyni ai, nini: Huta ja ma na songon huta na banggal an? (Jes. 34:10.) 

18:19 Inahkon sidea ma orbuk bani uluni, sanggah na tangis-tangis anjaha na mandoruhi ai, nini: Aih, aih, huta na banggal in, na mambahen bayak sagala siparkapal na i laut marhitei artani! Ibagas sajam do seda haganupan ai! (Jes. 27:30-34.) 

18:20 Marmalas ni uhur ma pasalsi, ale nagori atas, ale halak na mapansing, apostel ampa nabi-nabi! Ai domma idabuh ELOHIM uhum bani halani nasiam. (Jes. 44:23; Jer. 51:48.) 

18:21 Jadi roh ma sada malekat na gogoh mangangkat sada batu na salosung banggalni, anjaha idabuhkon ma ai hu laut, nini ma: Sonai ma sampakhononhon huta Babel na banggal in, anjaha seng anjai jumpah be. (Jer. 51:63, 64; Hes. 26:11.) 

18:22 Seng tarbogei be ibagas ho sora ni parhusapi pakon sipandoding, sipartulila, pakon sipartarompit; seng jumpah be ibagas ho situkangi atap aha pe, anjaha sora hun losung pe seng tarbogei be ibagas ho; (Jes. 24:8; Hes. 26:13.) 

18:23 anjaha sinondang ni sada palita pe lang be marsinalsal ibagas ho, anjaha sora ni siparunjuk pakon tunanganni seng tarbogei be itongah-tongahmu. Ai partiga-tigamu do gabe halak na sangap-sangap i tanoh on, anjaha sagala bangsa kahou do ibahen uti-utianmu; (Jes. 23:8; Jer. 7:34; 16:9.) 

18:24 anjaha ibagas huta ai do jumpah daroh ni nabi-nabi pakon halak na mapansing, sonai homa daroh ni haganup na dob binunuh iatas tanoh in. (bd. 17:6; 19:2; Jer. 51:49.)

PANGUNGKABON 17

Pangungkabon 17


17:1 Dob ai roh ma sada humbani malekat na pitu ai, na manjolom batil na pitu ai, marsahap ma ai hubangku, nini ma: Roh ma, ase hupatuduhkon bam uhum bani boru jalang na banggal ai, na hundul bani bah na mabuei ai. (bd. 15:1; Jer. 51:13.) 

17:2 Hasomanni marbangkis do raja-raja ni tonah in, anjaha mabuk do ganup pangisi ni dunia on ibahen anggur parbangkisonni ai. (bd. 14:8; 18:3; Jes. 23:17.) 

17:3 Jadi iboan ma ahu ibagas tonduy hubani sada halimisan. Jadi huidah ma sada naboru, hundul bani sada binatang sigerger, na gok bani goran panrisaion, pitu do uluni anjaha sapuluh tandukni. (bd. 13:1.) 

17:4 Ia pakeian ni naboru ai hiou saholat pakon hiou hasumba do, na ilampis bani omas, intan pakon mutiha; adong do bani tanganni panginuman omas, gok marisi hagigi pakon habutakon ni parbangkisonni. (bd. 18:16; Jer. 51:7; Hes. 28:13.) 

17:5 Bani pardompakanni tarsurat do sada goran na marrusia: Babel na banggal in, inang ni sagala parbangkison pakon hagigi na i tanoh on. (bd. 16:19; Dan. 4:27.) 

17:6 Jadi huidah do naboru ai mabuk ibahen daroh ni halak na mapansing ampa daroh ni saksi-saksi ni Jesus. Longang tumang do uhurhu mangidahsi. (bd. 18:24.) 

17:7 Gabe ihatahon malekat ai ma dompak ahu: Mase longang uhurmu? Hupatugah ma hubam rusia ni naboru on pakon rusia ni binatang na mambobansi ai, na marulu pitu anjaha na martanduk sapuluh ai. 

17:8 Ia binatang na niidahmai, na manggoluh do ai hinan, sonari lang be, anjaha naik ma ai use hun ruang partoruh ai, laho masuk hu hamagouan; anjaha sagala pangisi ni tanoh in, na so tarsurat goranni bani buku hagoluhan humbani tombei ni dunia on, longang ma mangidah binatang ai, na dob dong hinan, sonari seng dong be, hape roh use. (bd. 13:1, 2; Dan. 7:3.) 

17:9 Ibagas on porlu do pangarusion na marhasoman hauhuron! Na pitu ulu ai, ai ma pitu dolog, na hinundulan ni naboru ai, anjaha pitu raja do ai. (bd. 13:18.) 

17:10 Lima hunjai domma madabuh, na sada adong ope, na sada nari lang roh ope; anjaha anggo roh, tongkin do hansa ia adong. 

17:11 Ia binatang, na adong hinan, anjaha sonari seng dong be, ai do na paluahkon, anjaha humbani na pitu ai do ai, anjaha nalaho ma ia hu hamagouan. 

17:12 Ia na sapuluh tanduk niidahmai, ai ma sapuluh raja, na so manjalo harajaonni ope. Tapi jaloon ni sidea do kuasa songon raja-raja sajam dokahni rap pakon binatang ai. (bd. 13:1; Dan. 7:20, 24.) 

17:13 Sauhur do sidea anjaha ibere sidea do gogoh pakon kuasa ni sidea bani binatang ai. 

17:14 Marmunsuh ma sidea dompak Anak ni biri-biri in, tapi taluhononkon ni Anak ni biri-biri in do sidea; ai Ia do tuan ni sagala tuan anjaha Raja ni sagala raja. Halak na raphonsi ai pe monang do, ai ma sagala na nidilo, na pinilih anjaha na porsaya. (bd. 19:14, 16.) 

17:15 Dob ai nini ma dompak ahu: Ia sagala bah na niidahmai, na hinundulan ni boru jalang ai, ai ma bangsa-bangsa, halak simbuei, suku pakon hata. (Jes. 8:7; Jer. 47:2.) 

17:16 Ia tanduk na sapuluh ai, na niidahmai, pakon binatang ai, domdoman ni sidea ma boru jalang ai, lungunan ma bahenon ni sidea ia anjaha talanjang, panganon ni sidea ma dagingni, anjaha tutungon ni sidea ma ia bani apuy. (ay. 12, 13; 18:8.) 

17:17 Ai ipuhoi ELOHIM do uhur ni sidea, laho pasaudkon sura-sura ni uhurNi, laho pasadahon sura-sura ni sidea, laho mangondoshon harajaon ni sidea bani binatang ai, ronsi saud hagogok ni hata ni ELOHIM . (bd. 10:7.) 

17:18 Ia naboru, na niidahmai, ai ma huta na banggal in, na manggomgomi raja-raja na i tanoh on. (bd. 18:10; Ps. 2:2; 89:28.)